ក្រុមអាជ្ញាធរនិយាយថា ព្យុះភ្លៀងបានបោកបក់លើតំបន់ភាគកណ្តាល និងតំបន់ភាគខាងត្បូងប្រទេសឈីលី បណ្តាលឲ្យមនុស្ស ៣នាក់ស្លាប់ កាត់ផ្តាច់ចរន្តអគ្គិសនីទ្រង់ទ្រាយធំ បង្កការជន់លិច និងបិទផ្លូវ ស្របពេលដែលប្រទេសមួយនេះ ប្រឈមនឹងប្រព័ន្ធព្យុះមានភ្លៀងធ្លាក់ខ្លាំងបំផុត ។

រដ្ឋាភិបាលឈីលីនិយាយថា មនុស្សស្លាប់ ៣នាក់ រួមទាំងកម្មករម្នាក់ដែលកំពុងបោសសម្អាតផ្លូវនៅទីក្រុងភាគខាងត្បូង Negrete មនុស្សម្នាក់ដែលធ្លាក់ពីលើដំបូលផ្ទះ ហើយនិងមនុស្សម្នាក់ទៀតដែលឆក់ខ្សែភ្លើង នៅទីក្រុង Temuco ។

អ្នកស្រី Alicia Cebrian គឺជាប្រធានទីភ្នាក់ងារគ្រប់គ្រងការឆ្លើយតបគ្រាអាសន្ន Senapred និយាយថា មកទល់នឹងពេលនេះ មនុស្ស ៧នាក់ បានរងរបួស ។

អតិថិជនប្រហែល ២៥៧.០០០នាក់ បានបាត់បង់ចរន្តអគ្គិសនីប្រើប្រាស់នៅតំបន់ភាគខាងត្បូងឈីលី ស្របពេលដែលក្រុមអាជ្ញាធរបន្តឆ្លើយតបចំពោះផលប៉ះពាល់បង្កឡើងដោយសារព្យុះ ។

ខណៈពេលនោះដែរ ប្រធានាធិបតីឈីលីលោក Jose Antonio Kast បានធ្វើដំណើរទៅកាន់តំបន់ Biobio ដែលស្ថិតក្នុងចំណោមតំបន់រងផលប៉ះពាល់ខ្លាំងជាងគេបំផុតដោយសារព្យុះ ៕