បាល់ទាត់៖ ការប្រកួតក្របខណ្ឌលីគកំពូលកម្ពុជាសប្ដាហ៍ទី៣ ដែលបានពន្យាពេលមកប្រកួត នៅថ្ងៃទី២៣-២៤ ខែមីនានេះនៅសល់ត្រឹម ១ប្រកួតប៉ុណ្ណោះ បន្ទាប់ពី ៤ប្រកួតផ្សេងទៀតត្រូវបានគណៈកម្មការប្រកួតបាល់ទាត់ជាតិកម្ពុជា-CNCC ប្រកាសលើកពេលជាបន្ដបន្ទាប់ដោយបញ្ហាកូវីដ-១៩។
ក្នុងចំណោម ៤ប្រកួតដែលបានលើកពេលនេះមាន ២គូប្រកួតត្រូវបាន CNCC ប្រកាសកាលពីរាត្រីថ្ងៃទី២១ ខែមីនាម្សិលមិញ រួមមានក្រុមសូលទីឡូអង្គរគ្រោងជួបក្រុមគិរីវង់សុខសែនជ័យ នាថ្ងៃទី២៣-មីនា និងក្រុមអង្គរថាយហ្គឺរត្រូវជួបក្រុមបឹងកេតនាថ្ងៃទី២៤-មីនា ដែលសូលទីឡូអង្គរ និងអង្គរថាយហ្គឺរត្រូវប្រើប្រាស់កីឡដ្ឋាន SRU ខេត្តសៀមរាបធ្វើជាម្ចាស់ផ្ទការប្រកួតដូចគ្នា។ ប៉ុន្ដែដោយយោងលិខិតប្រកាសព័ត៌មាន របស់រដ្ឋបាលខេត្ដសៀមរាបស្ដីពីការផ្អាកបណ្ដោះអាសន្ននូវការចរាចរណ៍ចេញ-ចូលចំពោះប្រជាពលរដ្ឋរស់នៅក្នុងសង្កាត់គោកចក ក្រុងសៀមរាប CNCC បានធ្វើការជាមួយភាគីក្រុមម្ចាស់ផ្ទះទាំងពីរ ដោយតម្រូវឲ្យក្លិបសូលទីឡូអង្គរ និងអង្គរថាយហ្គឺរធ្វើការប្រមូលព័ត៌មាន សម្រង់ឈ្មោះដាក់ក្នុងបញ្ជីបើមានបុគ្គលណាជាប់ពាក់ព័ន្ធ និងរាយការណ៍ជាបន្ទាន់នូវស្ថានភាពមន្ដ្រី ក្រុមកីឡាករ ការគ្រប់គ្រងក្លិប ការស្នាក់នៅ និងការធ្វើដំណើរនាពេលកន្លងមក រហូតមកដល់ពេលនេះ។
ផ្អែកលើស្ថានភាពបច្ចុប្បន្ននៃក្រុងសៀមរាប បន្ទាប់ពីមានករណីបុរសម្នាក់ដែលមានវិជ្ជមានកូវីដ-១៩ បានទៅពន្យាបាល និងទៅកន្លែងជាច្រើន ស្របពេលក្រុមសូលទីឡូអង្គរ និងអង្គរថាយហ្គឺរគឺជាក្រុមមានមូលដ្ឋាននៅទីនោះ ខណៈកីឡាករខ្លះរស់នៅសង្កាត់គោកចក ដែលជាតំបន់ផ្អាកចរាចរណ៍ចេញ-ចូលបណ្ដោះអាសន្នផង CNCC ក៏សម្រេចលើកពេលការប្រកួតរវាងសូលទីឡូអង្គរប៉ះគិរីវង់សុខសែនជ័យ និងអង្គរថាយហ្គឺរប៉ះក្រុមបឹងកេត ទៅប្រកួតពេលក្រោយ ខណៈកាលបរិច្ឆេទថ្មី CNCC នឹងប្រកាសពេលក្រោយ។ ដោយឡែក ២ប្រកួតផ្សេងទៀតដែលបានលើកពេល រួមមានជំនួបរវាងក្រុមសិង្ហក្រហមភ្នំពេញក្រោន និងខេត្តព្រៃវែង ដែលត្រូវបានគណៈកម្មការប្រកួតបាល់ទាត់ជាតិកម្ពុជា-CNCC ឯកភាពតាមការស្នើសុំពីក្លិបបាល់ទាត់ខេត្តព្រៃវែង បន្ទាប់ពីសមាជិកក្រុមចំណូលថ្មីនេះ បានចូលបរិភោគអាហារនៅភោជនីយដ្ឋានមួយក្នុងក្រុងព្រៃវែង ដែលមានអ្នកវិជ្ជមានជំងឺកូវីដ-១៩ ចូល ហេតុនេះតម្រូវឲ្យពួកគេធ្វើតេស្ដសំណាក និងធ្វើចត្ដាឡីស័កសិន។ ប៉ុន្ដែការលើកពេលនេះ CNCC ពុំទាន់កំណត់ពីកាលបរិច្ឆេទប្រកួតថ្មីនោះទេ។
ចំណែកការប្រកួតរវាងក្រុមនគរបាលជាតិ និងណាហ្គាវើលដ៏ត្រូវបានលើកការប្រកួតដូចគ្នា តាមសំណើររបស់ក្លិបនគរបាលជាតិ ដែលខ្ចីកីឡដ្ឋានអគ្គិសនីកម្ពុជាធ្វើម្ចាស់ផ្ទះបណ្ដោះអាសន្ន។ តែដោយកីឡដ្ឋានអគ្គិសនីកម្ពុជា ត្រូវបាញ់សម្លាប់មេរោគ និងចាក់វ៉ាក់សាំងជូនមន្ដ្រី និងកីឡាកររបស់អគ្គិសនីកម្ពុជានៅថ្ងៃទី២៤ ខែមីនា មិនអាចរៀបចំការប្រកួតបាន CNCC ក៏បានឯកភាពក្នុងការលើកការប្រកួតនេះ ទៅប្រកួតនាថ្ងៃទី២៨ ខែមេសាវិញ។ ក្រោយការលើកពេលការប្រកួតជាបន្ដបន្ទាប់នេះ រួមទាំងជំនួបរវាងក្រុមវិសាខា និងក្រុមព្រះខ័នរាជស្វាយរៀង ដែលបានលើកទៅប្រកួតនាថ្ងៃទី៥ ខែឧសភា បានធ្វើឲ្យលីគកំពូលកម្ពុជាសប្ដាហ៍ទី៣ នៅសល់ ១ប្រកួតប៉ុណ្ណោះ ដែលជាការប្រកួតរវាងក្រុមអាស៊ីអឺរ៉ុប ជាមួយក្រុមកងយោធពលខេមភូមិន្ទ នាថ្ងៃទី២៤-មីនានៅកីឡដ្ឋាន AEU Sport Park ដូចការប្រកួតកាលពីសប្ដាហ៍ទី២ ដែរ ដែលនៅសល់ ១ប្រកួតដូចគ្នារវាងក្រុមព្រះខ័នរាជស្វាយរៀង ជាមួយក្រុមអគ្គិសនីកម្ពុជា៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
