អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃអង្គារថា យោធារុស្ស៊ីនៅតែបន្តបាញ់ផ្លោងនៅរោងចក្រ Azovstal ក្នុងទីក្រុង Mariupol ជាមួយនឹងបំណងវាយលុករោងចក្រនេះ ទោះបីជាមានកិច្ចព្រមព្រៀងជម្លៀសក៏ដោយ។
លោក Zelenskyy បាននិយាយថា ប្រជាជន ១៥៦នាក់បានទៅដល់ទីក្រុង Zaporizhzhia ដែលភាគច្រើនជាស្ត្រី និងកុមារបានចំណាយពេលច្រើនជាង ២ខែនៅក្នុងលេណដ្ឋានក្រោមរោងចក្រដែក។ លោក Zelenskyy និយាយថា នេះមិនមែនជាជ័យជម្នះនៅឡើយទេ ហើយលោកជឿថា វាមានឱកាសដើម្បីជួយសង្គ្រោះអ្នកដទៃទៀតរបស់យើង ដែលនៅជាប់នៅក្នុងនោះ។ មេបញ្ជាការអ៊ុយក្រែនបាននិយាយកាលពីថ្ងៃអង្គារថា កងកម្លាំងរុស្ស៊ីគាំទ្រដោយរថក្រោះបានចាប់ផ្ដើមវាយលុករោងចក្រដែលលាតសន្ធឹងលើផ្ទៃដី ១១គីឡូម៉ែត្រការ៉េ។ ថាតើចំនួនអ្នកប្រយុទ្ធអ៊ុយក្រែនប៉ុន្មាននាក់លាក់ខ្លួននៅខាងក្នុងនៅមិនច្បាស់នោះទេ ប៉ុន្តែរុស្ស៊ីបានដាក់ចំនួនប្រមាណ ២០០០នាក់ក្នុងប៉ុន្មានសប្ដាហ៍ថ្មីៗនេះ ហើយ ៥០០នាក់ត្រូវបានរាយការណ៍ថារងរបួស។
ឧបនាយករដ្ឋមន្ត្រីអ៊ុយក្រែនលោកស្រី Iryna Vereshchuk បាននិយាយថា ជនស៊ីវិល ២០០ ទៅ ៣០០នាក់ក៏បន្តនៅទីនោះដែរ។ លោក Zelenskyy បានប្តេជ្ញាថា នឹងបន្តការប៉ុនប៉ងដើម្បីជម្លៀសមនុស្សគ្រប់គ្នាដែលនៅសល់ក្នុងរោងចក្រ Azovstal រួមទាំងជនស៊ីវិល និងទាហាន។ នៅក្នុងសុន្ទរកថាលោក Zelenskyy បាននិយាយថា រុស្ស៊ីកំពុងបង្ហាញភាពអស់សង្ឃឹម ដោយសារតែអ៊ុយក្រែនលើសពីកម្លាំងរបស់ពួកគេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
