សហភាពអឺរ៉ុប៖ បណ្ដាប្រទេសនៅសហភាពអឺរ៉ុបបានខ្វែងគំនិតគ្នា ជុំវិញការស្វែងរកមធ្យោបាយឲ្យបានឆាប់រហ័ស ដើម្បីកាត់ផ្ដាច់ការពឹងពាក់លើការផ្គត់ផ្គង់ថាមពលពីប្រទេសរុស្ស៊ី។ ខណៈដែលទណ្ឌកម្មត្រូវបានអនុវត្តន៍ទៅលើផ្នែកខ្លះនៃពាណិជ្ជកម្ម សហភាពអឺរ៉ុបនៅតែពឹងផ្អែកខ្លាំងលើប្រេង និងឧស្ម័នរបស់រុស្ស៊ី។
រដ្ឋមន្ត្រីសេដ្ឋកិច្ចអាល្លឺម៉ង់បាននិយាយថា ប្រទេសរបស់ខ្លួននឹងអាចធានាឲ្យដាក់បម្រាមលើការនាំចូលប្រេងពីរុស្ស៊ីនៅត្រឹមដំណាច់ឆ្នាំ២០២២ ខណៈលោកទំនងជាគាំទ្រឲ្យមានការរឹតបន្តឹងទណ្ឌកម្មកាន់តែខ្លាំងជាងមុន។ ទោះយ៉ាងណាក៏ដោយប្រទេសហុងគ្រីបាននិយាយថា ខ្លួនបានជំទាស់នឹងចំណាត់ការនេះដោយលើកឡើងថា ខ្លួននឹងមិនគាំទ្រវិធានការនានាដែលអាចបង្កគ្រោះថ្នាក់ដល់ចរន្តផ្គត់ផ្គង់ថាមពលឡើយ។
បណ្ដារដ្ឋមន្ត្រីសហភាពអឺរ៉ុបកាលពីថ្ងៃចន្ទ បានជួបពិភាក្សាពីមធ្យោបាយគ្រប់គ្រងស្ថានភាពក្រោមសម្ពាធដ៏ខ្លាំងក្លា ដើម្បីកាត់បន្ថយចរន្តប្រាក់ចំណេញជាប្រភពជំនួយដល់ការធ្វើសង្គ្រាមរបស់លោក Putin នៅអ៊ុយក្រែន។ រដ្ឋជាសមាជិកកំពុងជួបបញ្ហាប្រឈមសំខាន់ពីរ គឺមធ្យោបាយក្នុងការទូទាត់ថាមពលឲ្យរុស្ស៊ីតាមរបៀបដែលមិនរំលោភ ឬប៉ះពាល់ដល់ទណ្ឌកម្មរបស់សហភាពអឺរ៉ុប ហើយក៏ពិភាក្សាផងដែរលើមធ្យោបាយស្វែងរកប្រភព និងជម្រើសផ្គត់ផ្គង់ផ្សេងដើម្បីងាកចេញពីការពឹងពាក់លើរុស្ស៊ី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
