ភ្នំពេញ ៖ កម្មវិធីជាតិសុខភាពភ្នែក នៃក្រសួងសុខាភិបាល និងទីភ្នាក់ងារអន្តរជាតិសម្រាប់ការការពារភាពពិការភ្នែក សហការជាមួយដៃគូអភិវឌ្ឍន៍ និងអង្គការមិនមែនរដ្ឋាភិបាល ព្រឹកថ្ងៃទី៤ ខែឧសភានេះ បើកសិក្ខាសាលាស្តីពីយុទ្ធសាស្រ្ត ដើម្បីគ្រប់គ្រង និងបង្ការភាពពិការភ្នែកសម្រាប់ចក្ខុវិស័យ២០៣០។

សិក្ខាសាលានេះក្រោមវត្តមានឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ដោយមានការអញ្ជើញចូលរួមរបស់លោកស្រី អាម៉ាន់ដា ដេវីស ប្រធានប្រចាំតំបន់អាស៊ីប៉ាស៊ីហ្វិច នៃទីភ្នាក់ងារអន្តរជាតិសម្រាប់ការការពារភាពពិការភ្នែក និងលោកវេជ្ជបណ្ឌិត ហ្វាប្រ៊ីហ្ស៊ីយ៉ូ ទីប្រឹក្សាអ្នកគ្រប់គ្រង នៃជំងឺមិនឆ្លង អង្គការសុខភាពពិភពលោកប្រចាំតំបន់អាស៊ីប៉ាស៊ីហ្វិច។

ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែក បានឲ្យដឹងថា សិក្ខាសាលានាព្រឹកនេះ មានគោលដៅប្រមូលផ្តុំភាគីដែលពាក់ព័ន្ធសំខាន់ៗនៅកម្ពុជា រួបរួមគ្នា និងប្តេជ្ញាចិត្ត ដើម្បីសម្រេចបាននូវក្របខ័ណ្ឌ និងយុទ្ធសាស្រ្តសកល បង្កើតចេញជាបរិបទយុទ្ធវិធីស្របតាមស្ថានភាពសុខភាពភ្នែកនៅកម្ពុជានាពេលបច្ចុប្បន្ន និងធ្វើឲ្យមានការឯកភាពគ្នាលើមហិច្ឆិតា សម្រាប់ការអនុវត្តយុទ្ធសាស្រ្តចក្ខុវិស័យ២០៣០ និងមានភាពសម្រុងគ្នាលើជំហានជាក់ស្តែង និងការកំណត់ពេលវេលា។

ជាមួយគ្នានោះ ឯកឧត្តម សាស្រ្តាចារ្យ ម៉ម ប៊ុនហេង បានថ្លែងថា ជាងពីរទសវត្សរ៍កន្លងមកនេះ រាជរដ្ឋាភិបាលកម្ពុជា បានបន្តខិតខំប្រឹងប្រែងយ៉ាងខ្លាំងក្លាក្នុងការពង្រឹងគុណភាព និងពង្រីកវិសាលភាពសុខភាពភ្នែកក្រោមគោលនយោបាយសមធម៌សុខភាពសាធារណៈ របស់ក្រសួងសុខាភិបាល នៃរាជរដ្ឋាភិបាល។ ជាពិសេសការចូលទៅប្រើប្រាស់សេវាថែទាំ សុខភាពភ្នែក ក៏មានការកើនឡើង ហើយសេវាសុខភាពភ្នែកត្រូវបានដាក់បញ្ចូលទៅក្នុងប្រព័ន្ធថែទាំសុខភាពនៅគ្រប់កម្រិតទាំងអស់។ ជាលទ្ធផលអត្រាប្រេវ៉ាឡង់ នៃភាពពិការភ្នែក ក្នុងចំណោមប្រជាជនទូទៅបានធ្លាក់ចុះពី១,២% ក្នុងឆ្នាំ១៩៩៥ មក០,៣៨% ក្នុងឆ្នាំ២០០៧ ហើយបានបន្តធ្លាក់ចុះមកត្រឹម ០,៣៧% នៅឆ្នាំ២០១៩។ ជំងឺត្រាក់កូម មិនមែនជាបញ្ហាសុខភាពសាធារណៈ និងជំងឺខ្វាក់មាន់ដែលបណ្តាលមកពីកង្វះជីវជាតិអា ត្រូវបានលុបបំបាត់នៅក្នុងព្រះរាជាណាចក្រកម្ពុជា។ 

ឯកឧត្តម រដ្ឋមន្រី្ត បានបញ្ជាក់ទៀតថា យ៉ាងណាមិញ បម្រែបម្រួលនៃប្រជាករ និងការរីកចម្រើនលើវិស័យបច្ចេកវិទ្យា បានធ្វើឲ្យតម្រូវការសុខភាពភ្នែកមានការកើនឡើង ដែលទាមទារឲ្យយើងបង្កើតផែនការយុទ្ធសាស្រ្តជាតិលើកទី៣ សម្រាប់ការគ្រប់គ្រង និងបង្ការភាពពិការភ្នែកដល់ឆ្នាំ២០៣០ ដោយមានគោលបំណងរួម កាត់បន្ថយអត្រាប្រេវ៉ាឡង់ នៃភាពពិការភ្នែកមកត្រឹម០,៣៥% នៅឆ្នាំ២០៣០ ហើយយុទ្ធសាស្រ្តជាតិនេះ ស្របតាមអនុសាសន៍របស់អង្គការសុខភាពពិភពលោក និងទីភ្នាក់ងារអន្តរជាតិសម្រាប់ការការពារភាពពិការភ្នែក ហើយក៏ស្របតាមផែនការយុទ្ធសាស្រ្តសុខាភិបាល២០២២-២០៣០៕​អត្ថបទ ៖ រដ្ឋា