ភ្នំពេញ៖ លោកជំទាវ Tina REDSHAW ឯកអគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា បានអញ្ជើញទៅបំពេញទស្សនកិច្ច នៅបណ្ឌិត្យសភានគរបាលកម្ពុជា និងប្តេជ្ញាចិត្តខ្ពស់ក្នុងការបន្តសហការជិតស្និទ្ធជាមួយបណ្ឌិត្យសភានគរបាលកម្ពុជា ដើម្បីពិភាក្សាលើការអភិវឌ្ឍកម្មវិធីសិក្សាថ្នាក់បរិញ្ញាបត្រវិទ្យាសាស្រ្តនគរបាលនាពេលអនាគតផង។

លោកជំទាវ Tina REDSHAW ឯកអគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា នៅ​ថ្ងៃទី៤ ខែឧសភា បានទៅបំពេញទស្សនកិច្ចនៅបណ្ឌិត្យសភានគរបាលកម្ពុជា ដើម្បី​ស្វែងយល់​ពី​វឌ្ឍនភាព​និងការងារបណ្តុះបណ្តាល​កងកម្លាំងនគរបាល របស់បណ្ឌិត្យសភានគរបាលកម្ពុជា។

ក្នុងឱកាសនោះ ឯកឧត្តម សេង ផល្លី បានលើកឡើងអំពីកិច្ចសហប្រតិបត្តិការអន្តរជាតិ​ដ៏ល្អរវាង​ប្រទេសអង់គ្លេស​និងព្រះរាជាណាចក្រកម្ពុជា ព្រមទាំងកិច្ចសហការល្អរវាងនគរបាលអង់គ្លេស និង​បណ្ឌិត្យសភានគរបាលកម្ពុជា។

ជាមួយគ្នានេះដែរ ឯកឧត្តម ក៏បានលើកឡើងអំពីវឌ្ឍនភាពរបស់បណ្ឌិត្យសភា​នគរបាលកម្ពុជា​នាពេល​បច្ចុប្បន្ននេះ​ ដោយសារតែមានការឧបត្ថម្ភគាំទ្រទាំងថវិកា និងសម្ភារៈពីសំណាក់រាជ​រដ្ឋា​ភិបាល​កម្ពុជា និងការខិតខំប្រឹងប្រែងរបស់ថ្នាក់ដឹកនាំ​ គ្រូ​នគរបាលជាតិ និងមន្ត្រីទាំងអស់របស់​បណ្ឌិត្យសភា ​ព្រមទាំងការជួយ​ឧបត្ថម្ភ​ពី​សប្បុរសជននានាផងដែរ។

ក្រោយពីបានពិភាក្សាការងារ លោកជំទាវឯកអគ្គរាជទូត​ បានអញ្ជើញធ្វើដំណើរទស្សនាដោយផ្ទាល់​នូវ​សមិទ្ធផលនានា ​និងទីតាំង ហ្វឹកហាត់​នានាក្នុងបរិវេណបណ្ឌិត្យសភានគរបាលកម្ពុជា ដោយបាន​សម្តែងសេចក្តីសប្បាយរីករាយ ​និង​ថ្លែងកោតសរសើរចំពោះការដឹកនាំ​គ្រប់គ្រង និងលើក​កម្ពស់​គុណភាព​នៃការបណ្តុះបណ្តាលកងកម្លាំងនគរបាល៕អត្ថបទ៖ គឹមហុក