​បាល់ទាត់៖ ​ក្រុមបាល់ទាត់​នៅ​ទីក្រុង​ឡុង​ដ៍ Tottenham Hotspur បាន​បន្ត​ក្តី​សង្ឃឹម​ក្នុង​ការ​ឈានឡើង​តំបន់​កំពូល​ទាំង​បួន ដើម្បី​ឱកាស​នៅ Champions League រដូវ​កាល​ក្រោយ បន្ទាប់ពី​ជ័យជំនះ​នៅ​ទឹកដី Aston Villa ២-០ យប់មិញ​។

​​ក្រុម​របស់លោក Jose Mourinho ​ដែល​ធ្លាក់​ពី Europa League គួរឲ្យភ្ញាក់ផ្អើល​កាលពី​ពាក់កណ្តាល​សប្តាហ៍ បាន​ងាក​មក​ផ្តោតអារម្មណ៍​ខ្លាំង​នៅ​ការប្រកួត​ក្នុងស្រុក ខណៈ​ការប្រកួត​យប់មិញ​នៅ​កីឡដ្ឋាន Villa Park របស់ Aston Villa កីឡាករ Carlos Vinicius ​ជា​អ្នក​រកបាន​គ្រាប់​នាំមុខ​នៅ​នាទី​ទី២៩ និង​គ្រាប់​ទី​ពីរ​នៅ​វគ្គ​ទី២ ដោយ​បាល់ពិន័យ ១១ម៉ែត្រ​របស់​ខ្សែប្រយុទ្ធ​អង់គ្លេស Harry Kane នៅ​នាទី​ទី៦៨​។ ​​ជ័យជំនះ​នេះ​ធ្វើឲ្យ Spurs រំកិល​ឡើងមក​លេខ៦ មាន ៤៨ពិន្ទុ​ដេញ​ពីក្រោយ​ក្រុម​លេខ៥ West Ham ១ពិន្ទុ និង​ដេញ​ពីក្រោយ​ក្រុម​លេខ៤ Chelsea ៣ពិន្ទុ​។

​​ងាក​មក​ក្រុម​កាំភ្លើង​ធំ Arsenal យប់មិញ​ធ្វើដំណើរ​ទៅសួរសុខទុក្ខ ​ក្រុម​រួម​ទីក្រុង​ឡុង​ដ៍​ដែរ​គឺ​ញញួរ​ធំ West Ham​។ ​​ក្រុម​ម្ចាស់ផ្ទះ West Ham ចាប់ផ្តើម​ដោយ​ជំនឿ​ចិត្ត​ដោយ​នាំមុខ​មុន​ដល់ ៣គ្រាប់​ធ្វើបាន​ដោយ​កីឡាករ​ខ្ចី​ជើង​ពី Manchester United, Jesse Lingard, Jarrod Bowen និង Tomas Soucek​។ ​​តែ​ក្រុម​របស់លោក Mikel Arteta ​បាន​វាយបក ៣គ្រាប់​តាម​ស្មើ​វិញ​ដោយ​គ្រាប់​បាល់​ចូល​ខ្លួនឯង ២គ្រាប់​របស់ West Ham ដោយ Tomas Soucek​ និង Craig Dawson មុនពេល​ដែល Alexander Lacazette​ តែ​ត​បញ្ចូល​ទី​តាម​ស្មើ​នៅ​នាទី​ទី៨២​។ ​លទ្ធ​ផល​ស្មើ​នេះ​ធ្វើឲ្យ West Ham បន្ត​រក្សាខ្លួន​នៅ​លេខ៥ មាន ៤៩ពិន្ទុ​ដេញ​ពីក្រោយ Chelsea ១ពិន្ទុ និង​នៅ​ពីលើ Spurs ១ពិន្ទុ​៕

​អត្ថបទ​៖​នាង សុភា​វុ​ធ