ភ្នំពេញ៖ ក្រសួងពាណិជ្ជកម្មកម្ពុជា នៅព្រឹកថ្ងៃទី៤ ឧសភា ឆ្នាំ២០២២នេះ បានរៀបចំពិធីអបអរសាទរ ព្រះរាជាណាចក្រកម្ពុជាទទួលបានពានរង្វាន់ប្រាក់ពិភពលោក ពីគណៈកម្មការរៀបចំពិព័រណ៍ពិភពលោក និងការិយាល័យពិព័រណ៍អន្តរជាតិ (BIE) បន្ទាប់ពីកម្ពុជាបានចូលរួមពិព័រណ៍ពិភពលោក២០២០ ឌុយបៃ សហភាពអារ៉ាប់រួម អស់រយៈពេល ៦ខែកន្លងមកនេះ។

នៅក្នុងសន្និសីទសារព័ត៌មាន ក្រោយចប់ពិធីអបអរសាទរនេះ ឯកឧត្តម ប៉ាន សូរស័ក្តិ រដ្ឋមន្ត្រី​ក្រសួងពាណិជ្ជកម្ម និងជាប្រធានគណៈកម្មការអន្តរក្រសួង ដើម្បីរៀបចំនិងចូលរួមពិព័រណ៍​ពិភពលោក និងពិព័រណ៍ពាណិជ្ជកម្ម អន្តរជាតិ និងជាអគ្គស្នងការកម្ពុជាសម្រាប់ពិព័រណ៍ពិភពលោក ២០២០ ឌុយបៃ មានប្រសាសន៍ថា ពានរង្វាន់ប្រាក់ពិភពលោក ១គ្រឿង ដែលកម្ពុជាទទួលបាននេះ ដោយសារការរចនា​ពន្លា​ជាតិ​បានល្អជាងគេ ​ក្នុងសង្កាត់និរន្តរភាព​ ក្នុងចំណោមប្រទេសចំនួន៤៥ ដែល​មានទីតាំងស្ថិតនៅក្នុងសង្កាត់នោះ​ ហើយនេះជាលើកទី២ ដែលកម្ពុជាមានកិត្តិយស​បាន​ទទួល​ពាន​រង្វាន់ប្រាក់នេះ​ បន្ទាប់ពីបានទទួលពានរង្វាន់ ប្រាក់លើក ដំបូងពីការចូលរួមពិព័រណ៍​ពិភព​លោកឆ្នាំ២០១៥ នៅទីក្រុងមីឡង់ ប្រទេសអ៊ីតាលី។

ឯកឧត្តមរដ្ឋមន្ត្រី បានលើកឡើងបន្តថា ពានរង្វាន់នេះ ធ្វើឡើងតាមរយៈការវាយតម្លៃយ៉ាងសុក្រឹត ដោយផ្អែក ​លើការរៀបចំតុបតែងពន្លាជាតិស្របតាមខ្លឹមសារ ​និងប្រធានបទ រួមទាំងកំណត់​ទៅ​តាមទំហំ និងប្រភេទពន្លាជាតិ ដោយត្រូវឆ្លងកាត់ការវាយតម្លៃផ្អែកលើទិដ្ឋភាពរួមចំនួន៣ ដូចជា ១.ស្ថាបត្យកម្ម និងទស្សនីយភាព ២. ការរចនា ពន្លាជាតិ និង៣. ការបកស្រាយប្រធានបទ។

សូមបញ្ជាក់ថា កម្ពុជាធ្លាប់មានបទពិសោធន៍ និងទទួលបានជោគជ័យចំនួន ៤លើករួចមកហើយ ក្នុងការ​ចូលរួមពិព័រណ៍ពិភពលោកចាប់តាំងពីឆ្នាំ២០០០ ​រហូតដល់បច្ចុប្បន្ន ក្នុងនោះពិព័រណ៍ពិភព​លោក ២០០៥ នៅទីក្រុងអាយជី ប្រទេសជប៉ុន, ពិព័រណ៍ពិភពលោក ២០១០ នៅទីក្រុងសៀងហៃ ប្រទេសចិន, ពិព័រណ៍ពិភពលោក ​២០១៥ នៅទីក្រុងមីទ្បង់​ ប្រទេសអ៊ីតាលី ​និងពិព័រណ៍ពិភពលោក ២០២០ ឌុយបៃ នៅសហភាពអារ៉ាប់រួម។

នៅឆ្នាំ២០២៥ខាងមុខ ដោយមានការអនុញ្ញាតពីរាជរដ្ឋាភិបាល កម្ពុជានឹងចូលរួមពិព័រណ៍​ពិភព​លោក ២០២៥ អូសាកា-កាន់សៃ ជប៉ុន (Expo 2025 Osaka, Kansia, Japan) ក្រោមប្រធានបទ “Designing Future Society for Our Lives”។

សូមរម្លឹកទៀតថា ពិព័រណ៍ពិភពលោក ២០២០ ឌុយបៃនេះ បានប្រព្រឹត្តទៅ ចាប់ពីថ្ងៃទី១ ខែតុលា ឆ្នាំ២០២១ ដល់ថ្ងៃទី៣១ ខែមីនា ឆ្នាំ២០២២ ​មានរយៈពេល ៦ខែ​ ដោយបានទាក់ទាញភ្ញៀវជាតិ និង​អន្តរជាតិ ចូលទស្សនាបានចំនួនជាង ២៤លាននាក់ ជាមួយប្រធានបទ​ ការតភ្ជាប់គំនិត ដើម្បី​ស្ថាបនាអនាគត (Connecting Minds, Creating the Future) និងមានប្រធានបទរងសំខាន់ចំនួនបី គឺ ៖ កាលានុវត្តភាព វឌ្ឍនភាព និងនិរន្តរភាព ត្រូវបានរៀបចំ ​ឡើងនៅទីក្រុងឌុយបៃ . សហភាព​អារ៉ាប់រួម នៅលើផ្ទៃដីចំនួន ៤៣៨ហិកតា ​ដោយមានការចូលរួមពីប្រទេស និងអង្គការ អន្តរជាតិធំៗ ចំនួន ១៩២៕អត្ថបទ៖ ឈិត បូរ៉ាវី