ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី៤ ឧសភានេះ បានចុះហត្ថលេខាលើអនុស្សរណៈនៃការយោគយល់គ្នា(MOU)ជាមួយអង្គការ ហេទ្បែន ខេលល័រ អន្តរជាតិ និងទីភ្នាក់ងារកិច្ចសហប្រតិបត្តិការអាល្លឺម៉ង់ លើការអនុវត្តគម្រោងសាកល្បងលើកកម្ពស់សុខភាព អាហារូបត្ថម្ភ និងការចិញ្ចឹមទារក និងកុមារនៅតាមរោងចក្រសហគ្រាស(MUSEFO)។

ប្រភពពីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា អនុស្សរណៈនៃការយោគយល់​គ្នានេះ មាន​សុពលភាពរយៈពេល ១៥ខែ ដែលត្រូវបានចុះហត្ថលេខារវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ​ជាមួយលោកស្រីបណ្ឌិត ហ្គ្វីណេត ខុតស៍ (Gwyneth Cotes) ​នាយិកាប្រចាំប្រទេសអង្គការ​ ហេទ្បែន ខេលល័រ (Helen Keller) និងលោក ហ្វារីដ ស៊ែលមី (Farid Selmi) ​នាយកគម្រោងសាកល្បងលើកកម្ពស់សុខភាព ​អាហារូបត្ថម្ភ និង​ការ​ចិញ្ចឹមទារក ​និងកុមារនៅតាមរោងចក្រសហគ្រាស ក្នុងគោលបំណងបង្កើតនូវក្របខណ្ឌ​សហប្រតិបត្តិការ​បច្ចេកទេស រវាងអង្គការ ​និងក្រសួង ​ក្នុងការអនុវត្ត ស្របតាមយុទ្ធសាស្រ្ត​ចតុកោណ​ក្នុងការរួមចំណែកលើកកម្ពស់​សុខុមាលភាព​កម្មករ កម្មការិនី ​ផលិតភាពការងារ និងសេដ្ឋកិច្ចកម្ពុជា។

គម្រោងនេះ ផ្ដោតលើរោងចក្រចំនួន ១៨កន្លែង ដែលមានអ្នកធ្វើការសរុបចំនួនជាង ២ម៉ឺននាក់។ ដោយផ្តល់ការបណ្តុះបណ្តាល ស្តីពីសារៈសំខាន់នៃការលើកកម្ពស់សុខភាព អាហារូបត្ថម្ភ និងការចិញ្ចឹមទារក និងកុមារដល់និយោជក ឬតំណាងរបស់ខ្លួន កម្មករ កម្មការិនីក្នុងវ័យបន្តពូជ និងកម្មការិនីកំពុងមានផ្ទៃពោះ និងបំបៅដោះកូន។

សូមបញ្ជាក់ថា បច្ចុប្បន្នអង្គការ ហេទ្បែន ខេលល័រ កំពុងរៀបចំដំណើរការសាកល្បង​គម្រោង​លើក​កម្ពស់សុខភាព និងអាហារូបត្ថម្ភដល់ស្ត្រី ​និងកុមារនៅតាមរោងចក្រមួយចំនួន តាមរយៈការគាំទ្រ​ថវិកា​របស់គម្រោង GIZ-MUSEFO ដើម្បីរួមគ្នាលើកកម្ពស់សុខភាព ផលិតភាពការងារ និងសេដ្ឋកិច្ចកម្ពុជា។

កម្មវិធីនេះ បានផ្តោតទៅលើការអប់រំដល់បុគ្គលិក កម្មករ កម្មការិនីអំពីសារៈសំខាន់នៃសុខភាព និង​អាហារូបត្ថម្ភ ដូចជា៖ សារៈសំខាន់នៃអាហារូបត្ថម្ភក្នុងការលើកកម្ពស់សុខភាព និងការពារ​ពីជំងឺផ្សេងៗ, អត្ថប្រយោជន៍ការបរិភោគអាហារចម្រុះដែលមានសារជាតិចិញ្ចឹមខ្ពស់ដើម្បីសុខភាព និងថាមពលមាំមួន, ការថែទំាសុខភាពពេលលំហែមាតុភាព​ និងក្រោយសម្រាលកូន ​និងការអប់រំ ស្តីពី​ការចិញ្ចឹមទារក និងកុមារតូចក្នុងកំទ្បុងពេលធ្វើការងារដើម្បីឱ្យកូនៗ​របស់ពួកគេមាន​សុខភាព​ល្អ និងក្លាយជាពលរដ្ឋមាន​សក្តានុពល​ប្រកបដោយ​ផលិតភាពខ្ពស់​ក្នុងការលើកស្ទួយ​សេដ្ឋកិច្ចជាតិ​នាពេលអនាគត។

គម្រោងនេះដែរ នឹងផ្តល់ជូននូវសម្ភារអប់រំផ្សព្វផ្សាយព្រមទំាងបំពាក់នូវឧបករណ៍មួយចំនួន ដូចជា៖ ទូទឹកកក តុ កៅអី កង្ហារ ម៉ាស៊ីនបូមទឹកដោះ កន្សែងជូតដៃ និងសាប៊ូលាងដៃជាដើម ដល់បន្ទប់​បំបៅដោះកូន​ដែលមានស្រាប់នៅតាមរោងចក្រគោលដៅនីមួយៗ៕

អត្ថបទ៖ ឈិត បូរ៉ាវី