ប្រដាល់៖ សមាជិកក្រុមកីឡាប្រដាល់សកលជម្រើសជាតិកម្ពុជា បានធ្វើដំណើរមកដល់មាតុភូមិវិញហើយក្រោយបោះជុំរុំហ្វឹកហាត់ជាង ១ខែនៅប្រទេសថៃ ខណៈកីឡាករ សៅ រង្សី និង វី សុភ័ស បានអះអាងថា ខ្លួនបានទទួលបទពិសោធន៍ និងបច្ចេកទេសថ្មីៗច្រើនពីការហ្វឹកហាត់នេះ សម្រាប់ត្រៀមការប្រកួតកីឡាស៊ីហ្គេមលើកទី៣១ នៅប្រទេសវៀតណាមនាពេលខាងមុខ។
ជើងខ្លាំងប្រដាល់សកលកម្ពុជាទាំង ២រូបបានបញ្ជាក់ថា បោះជុំរុំនៅថៃគឺមានការហ្វឹកហាត់ខ្លាំង ហើយក៏មានការប្រកួតសមជាមួយកីឡាករម្ចាស់ផ្ទះ ហ្វីលីពីន និងសិង្ហបុរីជាដើម ដែលធ្វើឲ្យសមត្ថភាពរបស់ពួកគេមានការវិវឌ្ឍន៍ល្អប្រសើរគួរឲ្យកត់សម្គាល់។ តាមរយៈនេះពួកគេរំពឹងថា ស៊ីហ្គេមលើកទី៣១ នាពេលខាងមុខ ពួកគនឹងធ្វើបានល្អប្រសើរដើម្បីនាំមកនូវជ័យជម្នះជូនជាតិ។ ដោយឡែកលោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានថ្លែងក្រោយទៅទទួលដំណើរវិលត្រឡប់កីឡាករ ក្រោយបញ្ចប់ការហ្វឹកហាត់នៅថៃថា ឆ្លងកាត់ការហ្វឹកហាត់ជាង ១ខែកន្លងមក លោកសង្កេតឃើញសិទ្ធផលរបស់កីឡាករម្នាក់ៗ មានការកើនឡើងគួរឲ្យកត់សម្គាល់។ ដូច្នេះលោករំពឹងថា ស៊ីហ្គេមនាពេលខាងមុខ ពួកគេនឹងអាចធ្វើបានល្អជាងស៊ីហ្គេមលើកទី៣០ នៅហ្វីលីពីន។
សូមបញ្ជាក់ថា កម្ពុជាបានត្រៀមប្រតិភូ និងអត្តពលិក ៥៦០នាក់លើ ៣៣ប្រភេទកីឡាទៅចូលរួមប្រកួតកីឡាស៊ីហ្គេម លើកទី៣១ នៅទីក្រុងហាណូយ ក្នុងនោះក៏មានកីឡាប្រដាល់សកលផងដែរ។ សម្រាប់កីឡាប្រដាល់នឹងបញ្ជូនកីឡាករ-កីឡាការិនី ៨រូបទៅចូលរួមរួមមានកីឡាករ សៅ រង្សី, វី សុភ័ស, ទូច ដេវីត, ហ៊ុន គឹមហ៊ាង, អុង ភារ៉ាក់, នៅ សុខទី រួមជាមួយកីឡាការិនី សឿន សុខលី និងកីឡាការិនី វី ស្រីស្រស់ ដែលដឹកនាំដោយលោក ឆឹង យ៉ៅយ៉េន ជាប្រធានសហព័ន្ធកីឡាប្រដាល់សកលកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
