​បាល់ទាត់៖ ​ខ្សែប្រយុទ្ធ​របស់​ក្លិប​បារាំង Paris Saint Germain, Kylian Mbappe ត្រូវបាន​ជ្រើសរើស​ក្នុង​បញ្ជី​ឈ្មោះ​កីឡាករ​ដែល​អាច​ឈ្នះ​ពាន​កីឡាករ​ឆ្នើម​បំផុត​ប្រចាំឆ្នាំ ខណៈ​មិត្ត​រួម​ក្រុម Lionel Messi និង Neymar មិន​ជាប់​ឈ្មោះ​។

​​កីឡាករ​វ័យ ២៣​ឆ្នាំ​រូបនេះ​គឺជា​កីឡាករ​ដែល​ស៊ុត​បញ្ចូល​ទី​ច្រើន​ជាង​គេ​រដូវ​កាល​នេះ​សរុប ២៥គ្រាប់ និង​បញ្ជូន​ច្រើន​ជាង​គេ​ដែរ​សរុប ១៥​លើក​នៅ​ពីលើ​មិត្ត​រួម​ក្រុម Lionel Messi ដែល​មាន ១៣​លើក​។ ​​ផ្ទុយទៅវិញ​ខ្សែប្រយុទ្ធ Rennes, Martin Terrier និង​ខ្សែប្រយុទ្ធ Monaco, Ben Yedder ស្ថិតក្នុង​បញ្ជី​នេះ​ក្រោយ​ស៊ុត​បញ្ចូល​ទី​បាន​សរុប ២១គ្រាប់​ដូចគ្នា ខណៈដែល​ក្លិប​ Marseille ក៏មាន Dimitri Payet និង Lyon មាន Lucas Paqueta ដែល​សុទ្ធតែជា​បេក្ខភាព​អាច​ឈ្នះ​ពាន​នេះ​។

​​ដោយឡែក​សំរាប់​ពាន​គ្រូបង្វឹក​ឆ្នើម​ប្រចាំឆ្នាំ​វិញ គេ​មិនឃើញ​មាន​វត្តមាន​គ្រូបង្វឹក PSG លោក Mauricio Pochettino ក្នុង​បញ្ជី​ផ្តាច់ព្រ័ត្រ​ឡើយ​ បើទោះជា​ដឹកនាំ​ក្រុម​ឈ្នះ​ជើងឯក​រដូវ​កាល​នេះ​ក៏ដោយ​។ ​​អ្នក​ដែល​ស្ថិតក្នុង​បញ្ជី​នោះ​មាន​គ្រូបង្វឹក Marseille លោក Jorge Sampaoli, គ្រូបង្វឹក Nice លោក Christophe Galtier និង​គ្រូបង្វឹក Rennes លោក Bruno Genesio ជាដើម​៕

​អត្ថបទ​៖​នាង សុភា​វុ​ធ