អត្តពលកម្ម៖ ឯកឧត្តម សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសហព័ន្ធខ្មែរអត្តពលកម្មស្ម័គ្រចិត្ត បានចាត់ទុកវេទិកានៃការប្រកួតកីឡាបឋមសិក្សាថ្នាក់ជាតិ គឺជាឱកាសបណ្ដុះបណ្ដាលកុមារឲ្យស្រលាញ់ និងចេះលេងកីឡាតាំងពីក្មេង។
ការលើកឡើងនេះ បន្ទាប់ពីសហព័ន្ធក្នុងនាមអ្នកទទួលបន្ទុករៀបចំបច្ចេកទេសការប្រកួត បានរៀបចំពិធីបើកការប្រកួតផ្នែកកីឡាអត្តពលកម្មផ្លូវការ ក្នុងព្រឹត្តិការណ៍កីឡាបឋមសិក្សាថ្នាក់ជាតិប្រចាំឆ្នាំ២០២២ កាលពីថ្ងៃទី០៤ ខែឧសភាម្សិលមិញនៅពហុកីឡដ្ឋានជាតិអូឡាំពិកកម្ពុជា។ ប្រមុខសហព័ន្ធដដែលបានថ្លែងអំណរគុណក្រសួងអប់រំ យុវជន និងកីឡា ដែលបានបញ្ចូលប្រភេទកីឡាអត្តពលកម្មក្នុងព្រឹត្តិការណ៍ប្រចាំឆ្នាំនេះ ដែលរួមចំណែកសំខាន់ក្នុងការជំរុញឲ្យកុមារស្រលាញ់ និងចេះលេងកីឡាពីដើមទី។ ឯកឧត្តមបានលើកទឹកចិត្តកុមារទាំងអស់ចូលរួមការប្រកួតក្របខណ្ឌបឋមសិក្សានេះ ហើយសហព័ន្ធបានប្ដេជ្ញាបំផុសចលនានេះ រហូតឈានដល់ការរៀបចំការប្រកួតប្រចាំខេត្តទៀតផង។
កញ្ញា ហេង ម៉ីជូ អគ្គលេខាធិការស្តីទីសហព័ន្ធខ្មែរបានបញ្ជាក់ថា ការប្រកួតកីឡាសិស្សបឋមសិក្សាថ្នាក់ជាតិនេះ ត្រូវបានរៀបចំដោយក្រសួងអប់រំ យុវជន និងកីឡា និងចូលរួមសហការរៀបចំលើផ្នែកបច្ចេកទេស ដោយសហព័ន្ធខ្មែរអត្តពលកម្មស្ម័គ្រចិត្ត ក្នុងគោលបំណងជំរុញឲ្យសិស្សានុសិស្ស មាតាបិតា អាណាព្យាបាល សាធារណជន គ្រូបង្វឹក គ្រូជំនួយ និងអត្តពលិកមានជំនឿទុកចិត្ត គាំទ្រ និងចូលរួមយ៉ាងសកម្មកីឡាជាមួយរាជរដ្ឋាភិបាល ក្នុងការធ្វើឲ្យវិស័យកីឡា ជាពិសេសកីឡាអត្តពលកម្មកាន់តែមានការអភិវឌ្ឍ និងរីកចម្រើនបន្ថែមទៀត។ កញ្ញាបន្ដថា ព្រឹត្តិការណ៍នេះក្រសួងបានកំណត់កីឡា ៨ប្រភេទក្នុងកម្មវិធីដែលចាប់ផ្ដើមពីថ្ងៃទី២៩ ខែមេសា ហើយគ្រោងបញ្ចប់នាថ្ងៃទី០៨ ខែឧសភាខាងមុខ ខណៈកីឡាអត្តពលកម្មនឹងធ្វើការប្រកួតរយៈពេល ៤ថ្ងៃចាប់ពីថ្ងៃទី០៤ ដល់ថ្ងៃទី០៧ ខែឧសភា ដោយមានកីឡាករ-កីឡាការិនីចូលរួមសរុប ២០០នាក់ និងធ្វើការប្រកួតលើ ៩វិញ្ញាសារួមមានវិញ្ញាសារត់ ៦០ម៉ែត្រកុមារា, រត់ ៦០ម៉ែត្រកុមារី, រត់ ៨០០ម៉ែត្រកុមារា, រត់ ៨០០ម៉ែត្រកុមារី, លោតចម្ងាយកុមារា, លោតកម្ពស់កុមារា-កុមារី និងវិញ្ញាសាអត្តពលកម្មកុមារចម្រុះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
