ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ដឹកនាំដោយលោក ឡៅ គឹមឈី អនុ​ប្រធាន​នាយកដ្ឋាន ដោយមានការចូលរួមពីមន្ទីរបរិស្ថានខេត្តកំពត នៅថ្ងៃទី២៣ ខែកក្កដា ឆ្នាំ​២០២៦ បានបន្ដចុះត្រួតពិនិត្យកសិដ្ឋានចិញ្ចឹមជ្រូក ចំនួន ២ទីតាំង រួមមានកសិដ្ឋានចិញ្ចឹមជ្រូក ហែម ម៉ាច និងកសិដ្ឋានចិញ្ចឹមជ្រូក អ៊ុត ប៊ុនហេង ដែល​មាន​ទីតាំង​នៅ​ ក្នុង​ភូមិសាស្រ្តឃុំជំពូវ័ន្ត ស្រុកជុំគីរី ខេត្តកំពត បន្ទាប់ពីមានសេចក្តីរាយការណ៍ថា បានបង្កក្លិនស្អុយ និង​បង្ហូរ​សំណល់​កខ្វក់​ប៉ះ​ពាល់​ដល់ដីស្រែ និងការរស់នៅប្រជាពលរដ្ឋ។

ក្រុមការងារបានចុះពិនិត្យជាក់ស្តែងដល់មូលដ្ឋានកសិដ្ឋានទាំង២ បានរក​ឃើញ​កសិដ្ឋាន​ចិញ្ចឹម​ជ្រូក ​ហែម ម៉ាច បានបង្ហូរសំណល់រាវចេញពីស្រះស្ដុកចូលដីស្រែប្រជាពលរដ្ឋ និងបង្កក្លិនស្អុយ និង​បានដំណើរ​ការ​អាជីវកម្ម​ដោយ​ពុំ​បាន​រៀបចំ​របាយការណ៍​វាយ​តម្លៃ​ហេតុ​ប៉ះ​ពាល់​បរិស្ថាន​ដំបូង​។​ ដោយឡែកកសិដ្ឋានចិញ្ចឹមជ្រូក អ៊ុត ប៊ុនហេង បានបង្ក​ឱ្យ​មាន​ក្លិន​ស្អុយ​ភាយ​ចេញ​ពី​រោង​ចិញ្ចឹម​ជ្រូក និង ដំណើរ​ការ​អាជីវកម្ម​ដោយ​ពុំ​បាន​រៀបចំ​របាយការណ៍​វាយ​តម្លៃ​ហេតុ​ប៉ះ​ពាល់​បរិស្ថាន​ដំបូង​។

ក្រុមការងារក្រសួងបរិស្ថានបានចាត់វិធានការឱ្យកសិដ្ឋានទាំង២ ត្រូវធ្វើការ​បិត​ភ្ជិត​ចំណុច​ប្រសព្វ​ជាមួយ​ប្រឡាយ​សាធារណៈក្បែរកសិដ្ឋានជាបន្ទាន់ និងត្រូវធ្វើការសម្អាតរោងជ្រូក និងរក​វិធី​សាស្រ្ត​ក្នុង​ការ​បំបាត់ក្លិនចេញពីកសិដ្ឋានចិញ្ចឹមជ្រូក។ កសិដ្ឋានត្រូវរៀបចំរបាយការណ៍ វាយ​តម្លៃ​ហេតុ​ប៉ះ​ពាល់​បរិស្ថាន ដាក់ជូនក្រសួងបរិស្ថាន ពិនិត្យ និងផ្ដល់យោបល់។ ករណី​ពុំ​មាន​របាយការណ៍​វាយ​តម្លៃហេតុប៉ះពាល់បរិស្ថាន ល្មើសនឹងមាត្រា៦៦៨ នៃក្រមបរិស្ថាន និង​ធន​ធាន​ធម្ម​ជាតិ ​និងករណីបញ្ចេញសំណល់រាវចូលដីស្រែប្រជាពលរដ្ឋ ល្មើសនឹងមាត្រា១៥៦ បង្ក​ក្លិន​ស្អុយ ​ល្មើសមាត្រា១៦១ នៃក្រមបរិស្ថាននិងធនធានធម្មជាតិ។ ជាមួយគ្នា​នេះ​ក្រសួង​បរិស្ថាន​តម្រូវ​ឱ្យ​កសិដ្ឋាន ត្រូវផ្ដល់សំណងផលប៉ះពាល់ និងការខូចខាតបរិស្ថាន ផងដែរ៕