ភ្នំពេញ៖ លោក Ivan Velimir Starčević ឯកអគ្គរាជទូតតែងតាំងថ្មី នៃសាធារណរដ្ឋក្រូអាស៊ីប្រចាំកម្ពុជា សរសើរប្រទេសកម្ពុជា មានការផ្លាស់ប្តូរ និងរីកចំរើនលើគ្រប់វិស័យយ៉ាងឆាប់រហ័ស ហើយមានសង្ឃឹមជឿជាក់ថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសកម្ពុជា និងសាធារណរដ្ឋក្រូអាស៊ី នឹងកាន់តែរីកចម្រើនថែមទៀតផងដែរ។

នៅក្នុងកិច្ចជំនួបជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រ​កម្ពុជា នៅព្រឹកថ្ងៃទី៥ ខែឧសភា ឆ្នាំ២០២២នេះ នៅវិមានព្រឹទ្ធសភា លោកឯកអគ្គរាជទូត បានលើកឡើងថា ប្រទេសកម្ពុជាមានការផ្លាស់ប្តូរ​ និងរីកចម្រើន​ លើគ្រប់វិស័យ​យ៉ាងឆាប់រហ័ស។ លោក​មាន​ជំនឿ​ជឿ​ជាក់​ថា​ទំនាក់ទំនង​មិត្តភាព និងកិច្ចសហប្រតិបត្តិការរវាង​ប្រទេស​ទាំង​ពីរ​នឹង​កាន​តែរីកចម្រើន​ថែមទៀត‍។

នៅក្នុងកិច្ចជំនួប​លោក​ឯកអគ្គរាជទូត​ក៏​បានថ្លែងអំណរគុណយ៉ាងជ្រាលជ្រៅចំពោះ សម្តេចប្រធាន​ព្រឹទ្ធសភា​ដែលបានចំណាយពេលដ៏មានតម្លៃទទួលជួប​ឯកឧត្តមនាពេលនេះ។

លោក បានរម្លឹកអំពីជំនួបជាប្រវត្តិសាស្រ្តរវាងអតីតថ្នាក់ដឹកនាំ​នៃសាធារណរដ្ឋក្រូអាស៊ី និង​ព្រះករុណា​ព្រះបាទ សម្តេចព្រះ នរោត្តម សីហនុ ​ព្រះបរមរតនកោដ្ឋ ​ដែលបានរួមចំណែកដ៏សំខាន់ ដើម្បី​បង្កើត និងរឹតចំណងមិត្តភាព និងកិច្ចសហប្រតិបត្តិការរវាង​ប្រទេសទាំងពីរតាំង​ពី​ទសវត្សទី៥០។

លោក ក៏បានលើកឡើងផងដែរថា តាម​រយៈបេកសកកម្មការ​ទូត​របស់​លោក​នៅ​ព្រះរាជាណាចក្រ​កម្ពុជា លោក​ឯកអគ្គរាជទូត​ ត្រៀមខ្លួន​ជា​ស្រេច​ដើម្បី​ខិតខំប្រឹងប្រែង អស់ពីកម្លាំងកាយ​ចិត្ត​ក្នុង​ការ​ពង្រឹង​ពង្រីកទំនាក់ទំនង​ និងកិច្ចសហប្រតិបត្តិការរវាងប្រទេសទាំង​ពី​របន្ថែមទៀត។

ថ្លែងនៅក្នុងកិច្ចជំនួបនោះដែរ ​សម្តេចប្រធានព្រឹទ្ធសភាមានជំនឿជាក់ថា ​ក្នុងអាណត្តិបេសកកម្មការ​ទូត​របស់លោកនៅព្រះរាជាណាចក្រកម្ពុជា ​នឹងលើក​កម្ពស់ទំនាក់ទំនង ​និងកិច្ចសហប្រតិបត្តិការ​រវាងប្រទេសទាំងពីរ ឱ្យកាន់តែល្អប្រសើរជាងទៀត ​ដើម្បីជាគុណប្រយោជន៍សម្រាប់ប្រជាជនកម្ពុជា និងប្រជាជនក្រូអាស៊ី ​ទាំងពេលបច្ចុប្បន្ន ​និងពេលអនាគត។

សម្តេចប្រធានព្រឹទ្ធសភា បានលើកឡើងទៀតថា ​សម្តេច​បានត្រៀមខ្លួនជានិច្ច ដើម្បីធ្វើកិច្ច​សហប្រតិបត្តិការ ដ៏​ជិតស្និទ​ជាមួយនឹងឯកអគ្គរាជទូត ​ដើម្បីរួម​ចំណែក​ពង្រឹង​ពង្រីក​ចំណងមិត្តភាព និង​កិច្ចសហប្រតិ- បត្តិការនាំមកនូវផលប្រយោជន៍​ទៅវិញ​ទៅមកជូនប្រជាជន ​និងប្រទេសទាំងពីរ៕អត្ថបទ៖​ បានចក់