ភ្នំពេញ៖ ក្រសួងសង្គមកិច្ច ក្នុងឱកាសអបអរសាទរទិវាយល់ដឹងមនុស្សមានអូទីស្សឹម និងដោនស៊ីនដ្រូម បង្ហាញនូវគោលដៅ ឱ្យមានការបង្កើនគ្រូបង្រៀនពិសេស ដើម្បីបង្រៀនដល់កុមារដែលមានបញ្ហា អូទីស្សឹម និងដោនស៊ីនដ្រូម។

ឯកឧត្តម ឯម ច័ន្ទមករា រដ្ឋលេខាធិការក្រសួង សង្គមកិច្ច អតីតយុទ្ធជន និងយុវនីតិសម្បទា បាន​លើកឡើងក្នុងឱកាសចូលរួម អបអរសាទរទិវាយល់ដឹងមនុស្សមានអូទីស្សឹម ​និងដោនស៊ីនដ្រូម ដោយចង់អោយវិទ្យាល័យអប់រំពិសេសក្រុងតាខ្មៅ ​ពិភាក្សាជាមួយគរុកុសល្យអប់រំ ក្នុងការ​បង្កើន​ចំនួនគ្រូបង្រៀនពិសេស ​ដើម្បីបង្រៀន​កុមារមានអូទីស្សឹម​ និងដោនស៊ីនដ្រូម។

ឯកឧត្តម រដ្ឋលេខាធិការ លើកឡើងថា គ្រូបង្រៀនពិសេសគឺត្រូវភ្ជាប់​មកជាមួយនូវបេះដូងពិត ក្នុងការ​បំពេញការងារ​ មិនគិតពីផលប្រយោជន៍​ និងត្រូវមានយល់ដឹងពីពិការភាព។ ការលើកឡើងបែបនេះ ​ដោយហេតុថាការបង្រៀនកុមារមានអូទីស្សឹម​ និងដោនស៊ីនដ្រូម ពុំមែន​ជារឿងងាយស្រួល និងទាមទារភាពអត់ធ្មត់ជាខ្លាំងខុសពីការបង្រៀនកុមារធម្មតា។

លើសពីនេះ សម្រាប់ក្រសួងសង្គមកិច្ច ក៏បានពិចារណាសម្រាប់ពេលអនាគត ដើម្បីធានាការរស់នៅ​របស់កុមារមានអូទីស្សឹម ​នៅពេលដែលពួកគាត់ធំពេញវ័យផងដែរ។

ពាក់ព័ន្ធនឹងកុមារមានអូទីស្សឹម​លោក ចាន់ សារិន ជានាយកវិទ្យាល័យអប់រំពិសេសក្រុងតាខ្មៅ លើកឡើងដែរថា ​បច្ចុប្បន្នសាលាគឺមានកុមារមានអូទីស្សឹម ​និងដោនស៊ីនដ្រូមជាច្រើន កំពុង​ទទួល​បានការបង្រៀន។ ​ជាគោលដៅ ​គឺសាលានឹងសាងសង់អាគារថែម ​ដើម្បីអាចមានលទ្ធភាព ផ្ដល់​ការបង្រៀនអប់រំ ​កុមារមានអូទីស្សឹម ​និងដោនស៊ីនដ្រូម ​កាន់តែច្រើន។

លោក បញ្ជាក់ថា កុមារអូទីស្សឹមគឺមានការលូតលាស់មិនជាក់លាក់ ​និងបាត់ទំនាក់ទំនងសង្គម ដែល​មកទល់បច្ចុប្បន្ននេះ ​ក៏មិនទាន់មានការបញ្ជាក់ពីមូលហេតុបង្ករជាក់លាក់ផងដែរ៕

អត្ថបទ៖ គឹមហុក