ភ្នំពេញ៖ នាខែមិថុនា ខាងមុខ រដ្ឋសភារៀបចំកិច្ចប្រជុំប្រចាំឆ្នាំ​ស្តីពីក្រុមប្រឹក្សាពិគ្រោះយោបល់អាយប៉ាស្តីពីគ្រឿងញៀនលើកទី៥។

នៅថ្ងៃទី៥ ខែឧសភា ឆ្នាំ២០២២ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាប្រធានក្រុមជាតិអាយប៉ាកម្ពុជា ប្រធានគណៈកម្មការរៀបចំសម្រាប់កិច្ចប្រជុំប្រចាំឆ្នាំ​អាយប៉ាលើកទី៥ ​បានអញ្ជើញដឹកនាំប្រជុំត្រៀមលក្ខណៈរៀបចំកិច្ចប្រជុំប្រចាំឆ្នាំលើកទី៥ នៃក្រុមប្រឹក្សាពិគ្រោះយោបល់អាយប៉ាស្តីពី"គ្រឿងញៀន"។

កិច្ចប្រជុំនេះ មានការអញ្ជើញចូលរួមពី ឯកឧត្តម អនុប្រធាន សមាជិក សមាជិកា នៃគណៈកម្មការរៀបចំប្រធាន អនុប្រធាន សមាជិក សមាជិកា នៃអនុគណៈកម្មការនានា គណៈប្រតិភូសភាកម្ពុជា ក្រុមប្រឹក្សាយោបល់ ព្រមទាំងមន្រ្តីនៃអគ្គលេខាធិការដ្ឋានជាតិអាយប៉ា-កម្ពុជា។

ឯកឧត្តមកិត្តិសេដ្ឋាបណ្ឌិត ជាម យៀប មានប្រសាសន៍ថា តាងនាមសម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា និងជាប្រធាន​អន្តរសភាអាស៊ានលើកទី៤៣ បាន​សម្រេចកម្មវិធី​ជាក់លាក់​សម្រាប់ការរៀបចំកិច្ចប្រជុំប្រចាំឆ្នាំលើកទី៥ នៃ​ក្រុម​ប្រឹក្សា​ពិគ្រោះយោបល់​អាយប៉ាស្តីពី "គ្រឿងញៀន" ​ដែលនឹងប្រារព្ធធ្វើឡើង នាថ្ងៃទី២៤ ខែមិថុនា ឆ្នាំ២០២២ ខាងមុខ។

ឯកឧត្តម ប្រធានក្រុមជាតិអាយប៉ាកម្ពុជា ​បានស្នើឲ្យអនុគណៈកម្មការនានា ពាក់ព័ន្ធនឹង​កិច្ចប្រជុំ​ខាងលើ ​ត្រៀមលក្ខណៈអោយ​បានគ្រប់ជ្រុងជ្រោយ ​ដើម្បីកិច្ចប្រជុំប្រចាំឆ្នាំលើកទី៥ នៃ​ក្រុម​ប្រឹក្សាពិគ្រោះយោបល់​អាយប៉ាស្តីពី"គ្រឿងញៀន" ​ឲ្យមានដំណើការទៅដោយរលូន។

ឯកឧត្តមកិត្តិសេដ្ឋាបណ្ឌិត ជាម យៀប​ បានថ្លែងអំណរ​គុណដល់​ឯកឧត្តម ​លោកជំទាវ ​និង​បណ្តា​ក្រសួង​ស្ថាប័នពាក់ព័ន្ធ​ដែលបានចូលរួមប្រជុំ​ចែក​រំលែក​នូវ​បទ​ពិសោធន៍​ល្អៗ​ពាក់ព័ន្ធ​នឹង​ការ​ត្រៀម​រៀបចំ​កិច្ចប្រជុំប្រចាំឆ្នាំលើកទី៥ ​នៃ​ក្រុមប្រឹក្សាពិគ្រោះយោបល់​អាយប៉ាស្តីពី"គ្រឿងញៀន" ឲ្យមាន​ដំណើរការល្អ ​និងសង្ឃឹមថា ​កិច្ចប្រជុំខាងមុខនោះ ​សភាកម្ពុជា​ពិតជាទទួលបានជោគជ័យជាក់​ជា​មិនខាន។

ដោយឡែកឯកឧត្តម សួស យ៉ារ៉ា អនុគណៈកម្មការខ្លឹមសារ ​បានឲ្យដឹងថា ​ការងារ​ប្រជុំ​តាមប្រព័ន្ធ​និម្មិត​ខ្លឹមសារនៃកិច្ចប្រជុំប្រចាំឆ្នាំលើកទី៥ នៃក្រុមប្រឹក្សាពិគ្រោះយោបល់អាយ​ប៉ាស្តីពី "គ្រឿងញៀន" ​មានសារៈសំខាន់ណាស់គឺប្រធានបទខ្លឹមសារនៃកិច្ចប្រជុំ​ត្រូវបញ្ជូនអោយបណ្តា​ប្រទេស​ដែល​ចូលរួម​បានដឹងមុន និងអាចឲ្យអគ្គលេខាធិការដ្ឋានអាយប៉ាកម្ពុជា​ធ្វើការ​សម្របសម្រួល​អោយ​ប្រទេស​ដែល​ចូលរួម​យល់​ពី​គោលបំណង​នៃ​កិច្ច​ប្រជុំធ្វើ​យ៉ាង​ណា​អោយកិច្ចប្រជុំទទួលបានជោគជ័យ៕អត្ថបទ៖ ឧត្តម