ក្នុងស្ថានភាពនៃការជាប់ដៃដាំដុះបង្កបង្កើនផល របស់បងប្អូនប្រជាពលរដ្ឋ ពួកគាត់​អាចប្រឈម​បញ្ហា​កង្វះស្បៀងអាហារដូច្នេះ ដើម្បីជួយសម្រាលនូវទុក្ខលំបាកទាំងនេះ កាកបាទក្រហមកម្ពុជា ដែលមានហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ជាប្រធាន បានឱ្យចាត់ឯកឧត្តមវេជ្ជ. អ៊ុយ សំអាត នាយក នាយកដ្ឋាន​គ្រប់គ្រង​គ្រោះ​មហន្តរាយ បន្តនាំយកអំណោយទៅចែកជូន បងប្អូនប្រជាពលរដ្ឋងាយរងគ្រោះ នៅក្នុងខេត្តក្រចេះបន្តទៀត។

ជាក់ស្តែងនៅថ្ងៃ ទី៥ ខែឧសភា ឆ្នាំ២០២២នេះ ក្រុមការងារកាកបាទក្រហមកម្ពុជា បានបន្ត​ចែក​អំណោយ​ជូនប្រជាពលរដ្ឋ មកពីភូមិចំនួន៨ នៃឃុំស្វាយជ្រះ ស្រុកស្នួល ខេត្តក្រចេះចំនួន ៨៨គ្រួសារទៀត ដើម្បីសម្រាលការលំបាកទៅដល់ពួកគាត់ ដែលកំពុង​តែត្រូវការ​ជំនួយ​ជា​ចំបាច់។ 

មានមតិសំណេះសំណាលនាពេលនោះ ឯកឧត្តមវេជ្ជ. អ៊ុយ សំអាត បានពាំនាំនូវព្រះរាជបណ្តាំ សួរសុខទុក្ខពីព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ ជាអម្ចាស់ជីវិតលើត្បូង និងហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស ជាពិសេស​សម្តេច​កិត្តិព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ដោយក្តីអាណិតស្រឡាញ់ ការគិតគូរពីសុខទុក្ខ និងជីវភាពរស់នៅប្រចាំថ្ងៃ ហើយជានិច្ចកាល សម្តេច​តែងតែយកចិត្តទុកដាក់ ពីសុខទុក្ខបងប្អូនប្រជាពលរដ្ឋយើង និងបានឱ្យអាជ្ញាធរ​គ្រប់​ជាន់​ថ្នាក់ យកចិត្តទុកដាក់ខ្ពស់ មិនត្រូវឱ្យពលរដ្ឋណាម្នាក់ ស្លាប់បាត់​បង់​ជីវិត​ដោយ​សារ​ខ្វះស្បៀ​ង​អាហារ​នោះ​ទេ។

ឯកឧត្តមវេជ្ជ. បានមានប្រសាសន៍បន្តថា សូមឱ្យបងប្អូនប្រជាពលរដ្ឋ យកចិត្តទុកដាក់​ចំពោះ​សុខភាព ព្រោះរដូវនេះភ្លៀងបានធ្លាក់មកបណ្តើរៗហើយ មានទឹកដក់ មានដង្កូវទឹក បណ្តាល​ឱ្យកើត​ជាមូស ខាំដល់កូនចៅ និងក្រុមគ្រួសារ នាំឱ្យកើតជំងឺផ្សេងៗ។ ដូច្នេះត្រូវគេងក្នុងមុង ពាក់​ខោអាវ​ឱ្យ​បានជិតល្អ រស់នៅស្អាត បរិស្ថានល្អ និងត្រូវបន្តលាងដៃនិងសាប៊ូ ជែល ឬអាល់កុល ធ្វើ​យ៉ាង​ណា ដើ​ម្បីបង្ការកុំឱ្យកើតជំងឺឆ្លងផ្សេងៗ។

ឯកឧត្តមវេជ្ជ. បញ្ជាក់ផងដែរថា នៅតាមបណ្តាខេត្តនានា នៅដើមរដូវវស្សានេះមានភ្លៀងធ្លាក់ មានខ្យល់ព្យុះ ខ្យល់កន្ត្រាក់ ផ្គររន្ទះបាញ់ ធ្វើឱ្យរលំបាក់បែកផ្ទះសំបែង គ្រោះថ្នាក់ដល់មនុស្ស និងស្លាប់គោក្របីជាច្រើនក្បាល ដូច្នេះត្រូវមានការប្រុងប្រយ័ត្នខ្ពស់ជាប់ជានិច្ច។

នាយក នាយកដ្ឋានគ្រប់គ្រងគ្រោះមហន្តរាយរូបនេះបានឱ្យដឹងទៀតថា អំណោយ​ដែល​យក​មក​ចែក​ជូន​ប្រជាពលរដ្ឋនាឱកាសនេះ គឺបានមកពីសប្បុរជននានា ដែលបានបរិច្ចាគថវិកាជូន កាកបាទក្រហមកម្ពុជា ក្នុងឱកាសទិវា៨ឧសភា ដែលធ្វើសកម្មភាពមនុស្សធម៌ដ៏ធំមួយនេះ បានបន្តសកម្មគ្រប់ទិសទី ជាពិសេសអ្នកដែលជាមុខសញ្ញាអទិភាព របស់កាកបាទក្រហម​កម្ពុជា។​

សូមជម្រាបថា បន្ទាប់ពីការចែកជូនប្រជាពលនៅតាមទីតាំងខាងលើរួច ក្រុមការងារ​បានបន្តដំណើរ​នាំយកអំណោយមនុស្សធម៌ ជូនដល់លោកយាយ លោកតាចាស់ជរា ដែលជាទុរគតជនគ្មានទីពឹង មានជំងឺប្រចាំកាយ មិនអាចធ្វើដំណើរបាន នៅតាម​ខ្នង​ផ្ទះ​មួយ​ចំនួន​ទៀត​ផងដែរ៕