ប្រធានាធិបតីអាមេរិក លោក Donald Trump បានសន្យាថានឹងវាយប្រហារអ៊ីរ៉ង់យ៉ាងខ្លាំងបន្ទាប់ពីប្រទេសនេះបានវាយប្រហារមូលដ្ឋានទ័ពអាមេរិកនៅហ្ស៊កដានីកាលពីថ្ងៃពុធ ២៩ កក្កដាសប្ដាហ៍នេះ ខណៈសង្គ្រាមមជ្ឈិមបូព៌ាបានផ្ទុះឡើងម្តងទៀត ហើយបានទាក់ទាញក្រុមកងកម្លាំងប្រដាប់អាវុធតំណាងរបស់សាធារណរដ្ឋអ៊ីស្លាមជាថ្មីទៀត។

ទីបញ្ជាការកណ្ដាលសហរដ្ឋអាមេរិក CENTCOM បានបញ្ជាក់ពីការវាយប្រហារលើអ៊ីរ៉ង់ដោយការបាញ់ចេញពីប្រព័ន្ធជើងទម្រ HIMARS ចេញពីប្រទេសកូវ៉ែត ជាផ្នែកមួយនៃអ្វីដែលខ្លួនហៅថាជាការឆ្លើយតបដ៏ខ្លាំងក្លា។ចំណែកសារព័ត៌មាន Tasnim របស់អ៊ីរ៉ង់រាយការណ៍ពីការផ្ទុះជាច្រើនកន្លែងនៅលើកោះ Qeshm។

ការព្រមាននេះបានកើតឡើងបន្ទាប់ពីភាពស្ងប់ស្ងាត់នៃការប្រយុទ្ធគ្នា ដែលបានជំរុញក្តីសង្ឃឹមនៃការវិលត្រឡប់ទៅរកការចរចា ហាក់ដូចជាបានរសាត់ឆ្ងាយ ដោយធ្វើឱ្យតម្លៃប្រេងកើនឡើង ៥ ភាគរយដោយសារការព្រួយបារម្ភដល់ការផ្គត់ផ្គង់សកល។

កាលពីថ្ងៃពុធ អារ៉ាប៊ីសាអ៊ូឌីត និងសហរដ្ឋអាមេរិក បានប្រកាសវាយប្រហារលើមូលដ្ឋានទ័ពសកម្មប្រយុទ្ធនៅអ៊ីរ៉ាក់ ខណៈសម្ព័ន្ធមិត្តអាមេរិក គឺអ៊ីស្រាអែល បានចោទប្រកាន់ក្រុមហេសបូឡាគាំទ្រដោយអ៊ីរ៉ង់ពីបទរំលោភលើបទឈប់បាញ់។

អស់រយៈពេលពីរថ្ងៃមកហើយ អារ៉ាប៊ីសាអ៊ូឌីត ជាប្រទេសនាំចេញប្រេងធំជាងគេបំផុតរបស់ពិភពលោក បានរាយការណ៍ពីការវាយប្រហារដោយយានដ្រូន កំណត់គោលដៅរោងចក្រប្រេងឆៅ ដែលខ្លួនបានស្តីបន្ទោសទៅលើក្រុមប្រដាប់អាវុធអ៊ីរ៉ាក់មានសម្ព័ន្ធមិត្តជាមួយទីក្រុងតេអេរ៉ង់។

ទន្ទឹមនឹងនេះ អ៊ីរ៉ង់បានបាញ់មីស៊ីលទៅលើសម្ព័ន្ធមិត្តអាមេរិក គឺហ្ស៊កដានី ដោយប្រព័ន្ធផ្សព្វផ្សាយរដ្ឋក្រោយមកបានរាយការណ៍ពីការវាយប្រហាររបស់អាមេរិកនៅជិតព្រំដែនសាធារណរដ្ឋអ៊ីស្លាមជាមួយអ៊ីរ៉ាក់។

អ្នកឆ្លើយឆ្លងព័ត៌មានរបស់សារព័ត៌មាន Fox News បានដកស្រង់សម្តីរបស់លោក Trumpដែលនិយាយថា ពួកលោកនឹងវាយប្រហារពួកគេកាន់តែខ្លាំង។ពួកគេនឹងរងការវាយប្រហារ ដោយបន្ថែមថា ប្រធានាធិបតីអាមេរិករូបនេះ បានសន្យាថាពួកលោកនឹងផ្តួលរំលំពួកគេ៕