អាមេរិក៖ កាលពីថ្ងៃអាទិត្យម្សិលមិញ ប្រធានាធិបតីសហរដ្ឋអាមេរិក លោក Joe Biden បាននិយាយពីការបំពុលដ៏អាក្រក់ នៃការប្រកាន់ជាតិសាសន៍ជាប្រព័ន្ធ និងស្បែកសនិយម ដែលបានយាយីដល់សហរដ្ឋអាមេរិកជាយូរមកហើយៗ លោកបានសន្យាថា នឹងផ្លាស់ប្ដូរច្បាប់ដែលជំរុញឲ្យមានការរើសអើងបែបនេះ។
ប្រធានាធិបតីមកពីគណបក្សប្រជាធិបតេយ្យរូបនេះបាននិយាយថា ប្រទេសរបស់លោកបានប្រឈមការប្រកាន់ជាតិសាសន៍ ការស្អប់ខ្ពើមជនបរទេស និងជាតិនិយមជាយូរមកហើយ។ លោក Biden និយាយថា ការស្អប់ខ្ពើមមិនអាចមានសុវត្ថិភាពនៅអាមេរិកនោះទេ។ វាគួរតែគ្មានសុវត្ថិភាពនៅគ្រប់ទីកន្លែងទាំងអស់នៅលើពិភពលោក។ ពួកយើងត្រូវតែរួមគ្នាបញ្ឈប់វា ។ រដ្ឋបាលរបស់លោកនឹងប្រឆាំងការរើសអើង នៅជុំវិញពិភពលោក ដែលរួមទាំងការធ្វើបាបដ៏គួរឱ្យរន្ធត់ មកលើជនជាតិភាគតិចរ៉ូហ៊ីងយ៉ា នៅក្នុងសហភាពមីយ៉ាន់ម៉ា និងជនជាតិអ៊ូហ្គួរនៅក្នុងប្រទេសចិនផងដែរ។
ការលើកឡើងរបស់លោក Biden ស្រដៀងគ្នានឹងការលើកឡើងរបស់លោកស្រីអនុប្រធានាធិបតី Kamala Harris ផងដែរ ដែលបាននិយាយលម្អិតនៅទីក្រុងអាត្លាន់តា ពីប្រវត្តិរើសអើងរបស់អាមេរិកមកលើជនជាតិអាមេរិកកាត់អាស៊ី កាលពីថ្ងៃសុក្រសប្ដាហ៍មុន។ លោកស្រី Harris ដែលជាកូនកាត់អាមេរិក-អាស៊ីដំបូងគេ គឺជាអនុប្រធានាធិបតីស្ត្រីស្បែកខ្មៅលើកដំបូងគេ របស់អាមេរិកបាននិយាយថា ការប្រកាន់ជាតិសាសន៍មានពិតប្រាកដនៅអាមេរិក និងវាតែងតែកើតមាន។ លោកស្រីបញ្ជាក់ថា ការស្អប់ខ្ពើមជនបរទេស មានពិតប្រាកដនៅអាមេរិក វាតែងតែកើតមាន ហើយភេទនិយមក៏ដូចគ្នាដែរ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
