ប្រធានសហព័ន្ធអត្តពលកម្មរុស្ស៊ី លោក Boris Yaryshevsky បានទទួលស្គាល់ថា ការត្រូវបានហាមឃាត់ពីការប្រកួតអន្តរជាតិអស់រយៈពេលជាងមួយទសវត្សរ៍ បានធ្វើឱ្យអត្តពលិករុស្ស៊ីបាត់បង់ការលើកទឹកចិត្ត និងកម្រិតសមត្ថភាពរបស់ពួកគេធ្លាក់ចុះ បើប្រៀបធៀបទៅនឹងគូប្រជែងនៅលើឆាកពិភពលោក។

ការផ្អាកសមាជិកភាពរបស់សហព័ន្ធអត្តពលកម្មរុស្ស៊ីបានចាប់ផ្តើមតាំងពីឆ្នាំ ២០១៥ បន្ទាប់ពីមានការបង្ហាញអំពីកម្មវិធីប្រើប្រាស់សារធាតុហាមឃាត់ដែលគាំទ្រដោយរដ្ឋ។ បន្ទាប់មក ការឈ្លានពានអ៊ុយក្រែននៅឆ្នាំ ២០២២ ក៏បាននាំឱ្យស្ថាប័នកីឡាអន្តរជាតិជាច្រើន បន្តដាក់ទណ្ឌកម្ម និងហាមឃាត់ក្រុមជម្រើសជាតិ និងអត្តពលិករុស្ស៊ីមិនឱ្យចូលរួមការប្រកួតអន្តរជាតិ។

ថ្លែងប្រាប់ Reuters អំឡុងការប្រកួតជើងឯកអត្តពលកម្មជាតិរុស្ស៊ីកាលពីសប្ដាហ៍មុន លោក Yaryshevsky បាននិយាយថា៖ «ការខ្វះឱកាសប្រកួតជាមួយកីឡាករលំដាប់ពិភពលោក បានធ្វើឱ្យអត្តពលិកមួយចំនួនបាត់បង់កម្លាំងចិត្ត ខណៈអ្នកផ្សេងទៀតនៅតែស្ថិតនៅកម្រិតដដែល ដោយមិនអាចអភិវឌ្ឍសមត្ថភាពបន្ថែមបាន។ ជារួម វាបានធ្វើឱ្យកម្រិតអត្តពលកម្មរបស់យើងធ្លាក់ចុះដោយជៀសមិនរួច»។

ទោះបីជាយ៉ាងណា លោកនៅតែមានទំនុកចិត្តថា អត្តពលិករុស្ស៊ីនឹងអាចវិលត្រឡប់ទៅប្រកួតក្នុងព្រឹត្តិការណ៍ អូឡាំពិកទីក្រុង Los Angeles ឆ្នាំ ២០២៨ បាន។

លោកបានបន្ថែមថា៖ «ខ្ញុំជឿជាក់ថា សហព័ន្ធកំពុងខិតខំយ៉ាងខ្លាំង ដើម្បីធានាថាអត្តពលិករបស់យើងនឹងមានឱកាសចូលរួមអូឡាំពិកនៅ Los Angeles។ បច្ចុប្បន្ន អត្តពលិកជម្រើសជាតិរបស់យើង ៦ នាក់ កំពុងឈរនៅចំណាត់ថ្នាក់លេខ ១ ពិភពលោកក្នុងវិញ្ញាសារបស់ពួកគេ ហើយខ្ញុំជឿថា ពួកគេមានសមត្ថភាពដណ្ដើមមេដាយជូនប្រទេសរុស្ស៊ី ប្រសិនបើបានចូលរួមប្រកួត»។

ទោះជាយ៉ាងណាស្ថាប័នគ្រប់គ្រងកីឡាអត្តពលកម្មពិភពលោក World Athletic នៅតែរក្សាការដាក់ទណ្ឌកម្មលើរុស្ស៊ី។ ប្រធានស្ថាប័ន លោក Sebastian Coe បានបញ្ជាក់ថា ការហាមឃាត់នេះនៅតែចាំបាច់ ដើម្បីការពារយុត្តិធម៌ និងសុចរិតភាពនៃការប្រកួត។

គួរបញ្ជាក់ថា រុស្ស៊ីបានចូលរួមការប្រកួតអូឡាំពិកក្រោមទង់ជាតិរបស់ខ្លួនជាលើកចុងក្រោយនៅទីក្រុង Rio ២០១៦ ប៉ុន្តែអត្តពលិកផ្នែកអត្តពលកម្មនៅពេលនោះ ក៏ត្រូវបានហាមឃាត់មិនឱ្យចូលរួមផងដែរ ដោយសារករណីសារធាតុហាមឃាត់៕ អត្ថបទ៖នាង សុភាវុធ