នៅព្រឹកថ្ងៃទី៣០ ខែកក្កដា ឆ្នាំ២០២៦ នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គ​ស្នង​ការ​សមាគមកាយឫទ្ធិនារីកម្ពុជា បានដឹកនាំគណៈប្រតិភូ ចូលគាល់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និង សុភមង្គល និង​ជា​ព្រះប្រ​ធានកិត្តិយសនៃសមាគមកាយឫទ្ធិនារីកម្ពុជា ដើម្បីថ្វាយព្រះពរ និងថ្វាយនូវ “ពាន​សមាជិក​ភាព​កិត្តិយសជើងឯក (CHAMPIONS AWARD)” ដែល សហគមន៍ Olave Baden-Powell Society (OB-PS) ថ្វាយព្រះអង្គ កាលពីពេល​ដែល​ព្រះរាជា​ណា​ចក្រ​កម្ពុជា​ទទួល​រៀប​ចំ​មហា​សន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំ​ឆ្នាំ​របស់​សហគមន៍​ OB-PS លើកទី៤២ នៅលើដែនដីអង្គរដ៏ពិសិដ្ឋ ខេត្តសៀមរាប ឆ្នាំ២០២៦ កន្លង​ទៅ​នេះ​។

ការថ្វាយនូវ “ពានសមាជិកភាពកិត្តិយសជើងឯក (CHAMPIONS AWARD)” ពីសហគមន៍ OB-PS​ នេះគឺជាសក្ខីភាពយ៉ាងពិតប្រាកដចំពោះព្រះរាជហឫទ័យ និងព្រះសកម្មភាព​ដ៏​ឧត្តុង្គ​ឧត្តម​របស់សម្តេចព្រះមហាក្សត្រី ក្នុងព្រះរាជកិច្ចសង្គម មនុស្សធម៌ ជាពិសេស​ព្រះរាជ​កិច្ច​លើក​កម្ពស់​តម្លៃ​ និង​សិទ្ធិស្ត្រីគ្រប់ៗរូប។

ក្នុងឱកាសនេះដែរ លោកជំទាវបណ្ឌិត ក៏បានទូលថ្វាយ សម្តេចព្រះមហាក្សត្រី នូវរបាយការណ៍​សង្ខេប​អំពី​វឌ្ឍនភាពរបស់សមាគមកាយឫទ្ធិនារីកម្ពុជា ក្នុងរយៈពេលកន្លងមក ជាពិសេស​ជោគ​ជ័យ​ដ៏​ត្រចះ​ត្រចង់របស់សមាគមក្នុងការរៀបចំមហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំរបស់សហគមន៍ OB-PS លើកទី៤២ ។

សូមបញ្ជាក់ផងដែរថា សហគមន៍ Olave Baden-Powell Society (OB-PS) ត្រូវ​បាន​បង្កើត​ឡើង​នៅ​ក្នុង​ឆ្នាំ១៩៨៤ ជាបណ្តាញអ្នកគាំទ្រអន្តរជាតិ ដែលគាំទ្របេសកកម្មរបស់ សមាគម​កាយ​ឫទ្ធិ​នារីពិភពលោក WAGGGS ក្នុងការជួយឱ្យកុមារី និងយុវតីអភិវឌ្ឍ​សក្តានុពល​ពេញ​លេញ​របស់​ខ្លួន ដើម្បីក្លាយជាពលរដ្ឋពិភពលោកដែលមានការទទួលខុសត្រូវ៕