ភ្នំពេញ៖ ដើម្បីថែទាំសុខភាព កុំឱ្យឈឺក្នុងរដូវវស្សា មន្រ្តីជំនាញនៃក្រសួងសុខាភិបាល បានក្រើនរម្លឹកដល់ប្រជាពលរដ្ឋ ត្រូវរក្សាអនាម័យ និងពិសារអាហារឱ្យបានគ្រប់គ្រាន់។

ខណៈរដូវវស្សាចូលមកដល់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល នៅថ្ងៃទី០៦ ខែឧសភានេះ ​បានអំពាវនាវដល់ប្រជាពលរដ្ឋ​ ជាពិសេស​មនុស្សវ័យចាស់​ជា​ក្រុមប្រឈម ត្រូវរក្សាអនាម័យ​ ពិសារទឹកស្អាត​ និងទទួលទានអាហារឱ្យបានគ្រប់គ្រាន់ ដើម្បីបង្ការកុំឱ្យឈឺ។

ក្នុងរដូវ វស្សា ជំងឺដែលអាចកើតមានឡើង មានដូចជា៖ ជំងឺផ្លូវដង្ហើម បង្ករឡើងដោយសារជំងឺកូវីដ-១៩ និងមិនមែនកូវីដ-១៩ ជំងឺបង្ករឡើងដោយសារមូសខាំ គ្រុនឈាម និងគ្រុនឈីក ជាដើម។

សេចក្តីជូនដំណឹងរបស់ក្រសួងធនធានទឹក និងឧតុនិយម ដែលបានចេញផ្សាយថ្មីៗនេះ ​បានឱ្យ ដឹងថា ដើមរដូវវស្សាឆ្នាំនេះ នឹងចូលមកដល់នៅសប្តាហ៍ទី១ ​នៃខែឧសភា ជាមួយ​នឹង​បរិមាណ​ទឹកភ្លៀង ពី មធ្យមទៅច្រើន​ និងអាចខ្ពស់ជាងមធ្យមភាគច្រើនឆ្នាំ និងរបាយ​ទឹកភ្លៀងធ្លាក់​រាយប៉ាយបានល្អ លាយឡំ ផ្គរ រន្ទះ និងខ្យល់គួច រយៈពេលខ្លី កើតមានច្រើន។

ពាក់កណ្តាលរដូវវស្សា ​ចាប់ពីខែសីហា ​ដល់ខែតុលា ភ្លៀង នឹង​អាចធ្លាក់​រាយប៉ាយ​បានល្អលើ​ផ្ទៃប្រទេស​ ជាមួយនឹងបរិមាណ​ទឹក​ភ្លៀងពីបង្គួរទៅច្រើន​ និងអាច​ ខ្ពស់​ជាង​មធ្យមភាគច្រើនឆ្នាំ។ នៅ​ពាក់កណ្តាលរដូវវស្សានេះ​ នឹងអាចមានភ្លៀង​ លាយឡំផ្គរ រន្ទះ និង​ បណ្តុះខ្យល់គួច បន្តកើត​មានច្រើន​ ក្នុងនោះអាចបណ្តាលឱ្យបណ្តារាជធានីខេត្តមួយចំនួន​ ដែលមានភូមិ សាស្រ្តជាប់ក្បែរ​នឹង​តំបន់ភ្នំ និងទីទំនាបជាប់ផ្លូវទឹក ​ប្រឈមនឹងជំនន់ទឹកភ្លៀង។​ រីឯចុងរដូវវស្សាវិញ អាច នឹង​បញ្ចប់​នៅក្នុងសប្តាហ៍ទី៤ ​នៃខែវិច្ឆិកា ​ជាមួយនឹងបរិមាណទឹកភ្លៀងពីមធ្យមទៅបង្គួរ ​ដែលមានភ្លៀង លាយឡំផ្គរ រន្ទះ ​និងខ្យល់កន្រ្តាក់មធ្យម៕អត្ថបទ៖ ទូច សោភ័ណ