ភ្នំពេញ៖ ក្រសួងទេសចរណ៍ បានរៀបចំកម្មវិធីផ្សព្វផ្សាយគោលដៅទេសចរណ៍ប្រណិតៗរបស់កម្ពុជា នៅប្រទេសហ្វីលីពីន ចាប់ពីថ្ងៃទី៣ដល់ថ្ងៃទី៧ ខែឧសភា ដើម្បីជម្រុញអាជីវកម្មទេសចរណ៍របស់ប្រទេសកម្ពុជា និងហ្វីលីពីន រួមគ្នាបង្កើនការរៀបចំកញ្ចប់ដំណើរទស្សនកិច្ច នាំភ្ញៀវទេសចរហ្វីលីពីន មកទស្សនាកម្ពុជា។

ឯកឧត្តម សុខ សង្វារ អនុរដ្ឋលេខាធិការក្រសួងទេសចរណ៍ បានថ្លែងថា កម្មវិធីផ្សព្វផ្សាយ​គោលដៅ​ទេសចរណ៍កម្ពុជា គឺមានសំដៅសំខាន់ផ្សព្វផ្សាយ​សក្តានុពល​វិស័យ​ទេសចរណ៍​កម្ពុជា និង​ជម្រុញផ្នែកឯកជនក្នុងវិស័យកម្ពុជា-ហ្វីលីពីន ​បង្កើនការលក់កញ្ចប់ទស្សនកិច្ច​ទេសចរណ៍​កម្ពុជា​លើទីផ្សារហ្វីលីពីន ​និងនាំភ្ញៀវទេសចរហ្វីលីពីន មកទស្សនាកម្ពុជា។

ឯកឧត្តម សុខ សង្វារ បន្តថា នៅក្នុងពិធីផ្សព្វផ្សាយគោលដៅទេសចរណ៍កម្ពុជានេះ មាន​បណ្តា​ក្រុមហ៊ុន​ប្រកបអាជីវកម្មលើវិស័យ​សណ្ឋាគារ ភោជនីយដ្ឋាន ​រមណីយដ្ឋានទេសចរណ៍ និង​ក្រុមហ៊ុនទីភ្នាក់ងារទេសចរណ៍ជាង១៥០ក្រុមហ៊ុន ​និងមាន​សមាជិករបស់សមាគមន៍ទេសចរណ៍​ចំនួន១២ ​នៅប្រទេសហ្វីលីពីន​ បានអញ្ជើញចូលរួម។

បើតាមលោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាហ្វិក ​ប្រចាំនៅកម្ពុជា បាន​ថ្លែង​ថា នៅខណៈដែលប្រទេសចិន និងប្រទេសផ្សេងៗដែលជាទីផ្សាទេសចរណ៍​ដ៏ធំរបស់​ពិភពលោក នៅមិនទាន់​បើកប្រទេសបានទូលំទូលាយនោះ ​បណ្តាប្រទេសអាស៊ាន ​គួរត្រូវសហការសាមគ្គីគ្នា ចលនា​ទេសចរណ៍ក្នុងតំបន់អាស៊ាន អោយបានទូលាយទូលាយឡើងវិញ ហើយសកម្មភាព​ផ្សព្វផ្សាយ​គោលដៅទេសចរណ៍កម្ពុជាលើទីផ្សារទេសចរណ៍ហ្វីលីពីនេះ​ គឺមានសារសំខាន់ ក្នុងការ​ជម្រុញចលនាទេសចរណ៍ក្នុងតំបន់មានសកម្មភាពល្អប្រសើរឡើងវិញ។

សូមបញ្ជាក់ថា ការផ្សព្វផ្សាយគោលដៅទេសចរណ៍កម្ពុជា ​នៅប្រទេសហ្វីលីពីន ត្រូវបាន​ធ្វើឡើង​ខណៈ បច្ចុប្បន្នប្រទេសកម្ពុជា ​បាននិងកំពុង ​បើកទទួលទេសចរអន្តរជាតិធម្មតាវិញ ក្នុង​សម្រាប់​អ្នកដំណើរ ពីបរទេសចូលមកកម្ពុជាតាមផ្លូវអាកាស ផ្លូវគោក​ និងផ្លូវទឹក ភាគីអ្នកដំណើរ​អន្តរជាតិ​ទាំងអស់ គឺអាចធ្វើ​ទិដ្ឋាការ​ពេលមកដល់នៅពេលមកដល់ព្រំដែន ​Visa On Arrival និងមានការ​លើកលែងធ្វើលិខិត PCR Test អវិជ្ជមាន ៧២ម៉ោងមុនធ្វើដំណើរ ការលើកលែង​ធ្វើតេស្តរហ័ស​ពេលមកដល់ ​និងការលើកលែងកាតព្វកិច្ចពាក់ម៉ាស់ ​នៅតាមទីសាធារណៈទូទាំងប្រទេស៕

អត្ថបទ ស៊ុម សុខជា