កែប៖ រដ្ឋមន្ត្រីក្រសួងបរិស្ថាន បានបញ្ជាក់ថា ក្រសួងបាននឹងកំពុងចុះបញ្ជីតំបន់ឧទ្យានជាតិ ដែនជម្រកសត្វព្រៃ និងតំបន់ការពារទេសភាព ចំនួន៧៤កន្លែងទូទាំងប្រទេសហើយ ប៉ុន្តែការងារបរិស្ថាន មិនអាចយកកម្លាំង ឬធ្វើរបងការពារឲ្យនៅស្ថិតស្ថេរយូរអង្វែងបានទេ ដូច្នេះក្រសួងនឹងកែច្នៃតំបន់ទាំងនោះ ដើម្បីផ្តល់ផលប្រយោជន៍ដល់ប្រជាពលរដ្ឋ ព្រោះក្រសួងគិតថា មានតែជីវភាពពលរដ្ឋក្នុងមូលដ្ឋានរីកចម្រើនទេ ទើប ជារបងការពារធនធានធម្មជាតិមានប្រសិទ្ធភាពស្ថិតស្ថេរយូរអង្វែង។

ក្នុងពិធីសម្ពោធដាក់ឲ្យប្រើប្រាស់រុក្ខវិថី បុប្ផា ប្រសិទ្ធ ប្រវែង៦គឺឡូម៉ែត្រ ជុំវិញភ្នំកែបធំ នៃឧទ្យាន ជាតិកែប នាពេលថ្មីៗនេះ ឯកឧត្តម សាយ សំអាល រដ្ឋមន្ត្រីក្រសួងបរិស្ថាន បានលើកឡើងថា បច្ចុប្បន្នក្រសួងបរិស្ថាន បានកំណត់តំបន់ឧទ្យានជាតិ តំបន់ដែលជម្រកសត្វព្រៃ និងតំបន់ការពារ​ទេសភាព សរុបមាន៧៤កន្លែង ហើយដើម្បីការពារ និងអភិរក្សតំបន់ទាំងអស់នេះ ក្រសួងចាប់ផ្តើម​ចុះ​បញ្ជីដីធ្លី និងបោះព្រំឲ្យបានគ្រប់កន្លែង ។

ឯកឧត្តម បានបញ្ជាក់ថា ដើម្បីមានរបងការពារឲ្យនៅស្ថិតស្ថេរយូរអង្វែង ​ក្រសួងប្រើយុទ្ធសាស្ត្រ ច្នៃប្រឌិតបង្កើត ​ឬធ្វើអ្វីម្យ៉ាងដើម្បីឲ្យតំបន់ឧទ្យាជាតិ ​តំបន់ការពារដែនជម្រកសត្វព្រៃ និង​តំបន់​ការពារធម្មជាតិផ្តល់ផលប្រយោជន៍ដល់ប្រជាពលរដ្ឋ ​ព្រោះក្រសួងជឿថា មានតែជីវភាព​ពលរដ្ឋ​ក្នុងមូលដ្ឋានរីក ​ចម្រើនទេ​ ទើបជារបងការពារធនធានធម្មជាតិ​មានប្រសិទ្ធភាព និង​នៅ​ស្ថិតស្ថេរ​យូរអង្វែង។

ឯកឧត្តម សោម ពិសិដ្ឋ អភិបាលខេត្តកែប បានឲ្យដឹងដែរថា ខេត្តកែប ​មាន​សក្ដានុពល​ធម្មជាតិ ល្អ មិនអាចកាត់ថ្លៃបាន ​ក្នុងនោះមានកោះចំនួន១២​ និងថ្មប៉ប្រះទឹកមួយកន្លែង ​មានផ្កាថ្ម ស្មៅសមុទ្រ ព្រៃកោងកាង ​តំបន់អភិវឌ្ឍន៍ភ្នំវល្លិ៍ ​និងឧទ្យានជាតិមួយកន្លែង ​នៅចំកណ្តាលទីក្រុងកែប៕

អត្ថបទ៖ អន សារឹម