កំពង់ចាម​៖​ អាជ្ញាធរ ​​និងមន្ត្រី​ជំនាញខេត្តកំពង់ចាម​ បានសម្រេច​ផ្អាកចរាចរបណ្តោះអាសន្ន ចំពោះ​រថយន្តធុនធំដែលបើកឆ្លងកាត់ទំនប់កែប្រែ​ ស្ថិតនៅភូមិល្ពាក ឃុំស្រក ស្រុកកំពង់សៀម ដែល​​បានរងការស្រុតបាក់មុខឈ្នាងទ្វារទឹក និងជើងទេរទំនប់មួយចំហៀង។

លោក​ អ៊ឹង​ វិសុទ្ធ​ ប្រធាន​មន្ទីរ​អភិវឌ្ឍ​ជនបទខេត្តកំពង់ចាមឲ្យបានដឹង​ ផ្លូវបេតុងមួយខ្សែ​ ក្នុង​ស្រុក​កំពង់​សៀម​ ដែលកំពុងរងការបាក់ស្រុតជើងទេរទំនប់មួយចំហៀង​ ដោយសារគ្រោះធម្មជាតិ​។ បច្ចប្បន្ន​មន្ត្រី​ជំនាញ​ និងអាជ្ញាធរខេត្តបានធ្វើការជូនដំណឹងដល់បងប្អូនប្រជាពលរដ្ឋ ដែល​មាន​បំណង​ធ្វើដំណើរតាមផ្លូវទ្វារទឹក "ទំនប់កែប្រែ" ស្ថិតនៅភូមិល្ពាក ឃុំស្រក ស្រុកកំពង់សៀម បាន​រង​ការ​ស្រុតបាក់មុខឈ្នាងទ្វារទឹក និងជើងទេរទំនប់មួយចំហៀងនេះ និង​ដើម្បី​រក្សា​នូវ​សុវត្ថិភាព​ក្នុង​ការ​ធ្វើ​ដំណើរ​របស់បងប្អូនប្រជាពលរដ្ឋ មន្ត្រីជំនាញសូមធ្វើការផ្អាកចរាចរបណ្តោះអាសន្ន ចំពោះ​រថយន្តធន់ធំ។

ទន្ទឹម​នឹង​នេះ​ ចំពោះមុខ​ មន្ត្រី​ជំនាញ​នៃក្រសួងអភិវឌ្ឍន៍ជនបទ​ និង​បន្ត​ជួស​ជុល​ស្ថាបនា​ឡើង​វិញ​​​។ អាជ្ញាធរ​បានជូនដំណឹងបន្ថែម​ ចំពោះផ្លូវវៀង​ សូមឲ្យបង​ប្អូន​ប្រជា​ពលរដ្ឋ​ធ្វើដំណើរ​ទៅ​តាម​ផ្លូវ​​ភ្នំហាន់ជ័យ​ ឃុំហាន់ជ័យជំនួសវិញ។ ដោយឡែក​ សម្រាប់រថយន្តធន់តូច និង​ម៉ូតូ​អាច​ចរាចរ​​ជា​ធ​ម្មតា​ និងបង្កើនការប្រុងប្រយ័ត្នផង៕