ភ្នំពេញ៖ ក្រុមហ៊ុនទេសចរណ៍ប្រមាណជាង១៥០ក្រុមហ៊ុន នៅថ្ងៃទី៧ ខែឧសភានេះ បានសហការបើកអង្គសិក្ខាសាលាស្តីពី ការបើកច្រករបៀងសេដ្ឋកិច្ចកម្ពុជា វៀតណាម ថៃ នៅទីក្រុងបាងកកប្រទេសថៃ ។

នៅក្នុងអង្គសិក្ខាសាលានេះ មានបំណងជម្រុញការរួមសហការគ្នារៀបចំកញ្ចប់ខ្សែ​ទស្សនកិច្ច​ខេត្តតាមតំបន់ឆ្នេរសមុទ្រ ដើម្បីជម្រុញចលនាទេសចរណ៍ខេត្ត ​នៅតាមតំបន់ឆ្នេរសមុទ្ររបស់កម្ពុជា វៀតណាម ថៃ មានភាពល្អប្រសើរឡើងវិញ។

បើតាមលោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីភិច ប្រចាំនៅកម្ពុជា បាន​ថ្លែងថា នៅក្នុងអង្គសិក្ខាសាលាច្រករបៀងសេដ្ឋកិច្ចកម្ពុជា​ វៀតណាម ថៃ នេះ គឺភាគីក្រុមហ៊ុន​ទេសចរណ៍នានា​បានប្តេជ្ញាថា​នឹងជម្រុញអោយមានភ្ញៀវទេសចរជាតិអន្តរជាតិ​ចេញដើរកម្សាន្ត​ខេត្តតាម​តំបន់ឆ្នេរសមុទ្រកម្ពុជា ​វៀតណាម ថៃ ​ចាប់ពីខែកក្តដានេះតទៅ ​ដោយសម្រាប់កម្ពុជា ខេត្តដែលទទួលបានអត្ថប្រយោជន៍ពីការជម្រុញទេសចរណ៍នេះរួមមាន៖ ខេត្តកោះកុង ខេត្តព្រះសីហនុ កំពត និងខេត្តកែប៕ អត្ថបទ៖ ស៊ុម សុខជា