ភ្នំពេញ ៖ ស្ថានទូតជប៉ុនប្រចាំកម្ពុជានៅថ្ងៃទី៦ ខែឧសភា ឆ្នាំ២០២២ បានឱ្យដឹងថា ឆ្នាំក្រោយ ឆ្នាំ២០២៣ គឺជាឆ្នាំនៃខួបលើកទី៥០នៃការបង្កើតទំនាក់ទំនងមិត្តភាព និងសហប្រតិបត្តិការអាស៊ាន-ជប៉ុន។ ចាប់តាំងពីការបង្កើតដំបូងក្នុងឆ្នាំ១៩៧៣ មកទល់នឹងពេលនេះ ទំនាក់ទំនងរវាងអាស៊ាន-ជប៉ុន មានដំណើរការល្អគួរឱ្យកត់សម្គាល់។ ការផ្លាស់ប្តូរទំនាក់ទំនងរវាងប្រជាជន និងប្រជាជននៃអាស៊ាន-ជប៉ុន បាននិងកំពុងដើរតួនាទីជាមូលដ្ឋានដៃគូដ៏ជិតស្និទ្ធ ឬអាចនិយាយទូទៅថា ទំនាក់ទំនង«ចិត្ត និង ចិត្ត»។

ប្រភពដដែលបន្តថា រដ្ឋាភិបាលនៃបណ្តាប្រទេសសមាជិកអាស៊ាន និងជប៉ុន នឹងប្រារព្ធខួបលើកទី៥០នៃការបង្កើតទំនាក់ទំនងមិត្តភាព និងសហប្រតិបត្តិការអាស៊ាន-ជប៉ុន ដោយបង្កើតកម្មវិធីនានា និងកម្មវិធីផ្លាស់ប្តូរមួយចំនួនក្នុងឆ្នាំ២០២៣ ព្រមទាំងលើកទឹកចិត្តប្រជាជនខ្លួន ដើម្បីចូលរួមអបអរសាទរក្នុងព្រឹត្តិការណ៍សំខាន់នេះ។ ក្នុងន័យនេះ រដ្ឋាភិបាលនៃបណ្តាប្រទេសសមាជិកអាស៊ាន និងជប៉ុន រួមស ហការជាមួយលេខាធិការដ្ឋានអាស៊ាន មជ្ឈមណ្ឌលកិច្ចការអាស៊ាន និងជប៉ុន សូមអញ្ជើញសាធារណជនចូលរួមប្រកួតប្រជែងការរចនាឡូហ្គោ និងពាក្យស្លោក ដែលឆ្លុះបញ្ចាំងពីទំនាក់ទំនងមិត្តភាព និងសហប្រតិបត្តិការអាស៊ាន-ជប៉ុនក្នុងរយៈពេល៥០ឆ្នាំ និងចូលរួមជាមួយយើងខ្ញុំទាំងអស់គ្នា៕ ដោយ៖ គង់ ឌិន