ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញចុះហត្ថលេខាលើអនុស្សរណៈនៃការយោគយល់គ្នាស្តីពី «កិច្ចសហប្រតិបត្តិការជំរុញខ្សែក្រវ៉ាត់បៃតងនៅតាមតំបន់ទេសចរណ៍» នៅសួនអាស៊ាន-កូរ៉េកម្ពុជា ខេត្តសៀមរាប​។

ប្រភពក្រសួងកសិកម្ម រុក្ខាប្រមាញ់ និងនេសាទ បានឱ្យដឹងក្រោយកម្មវិធី កាលព្រឹកថ្ងៃទី១ ខែសីហា ឆ្នាំ២០២៦នេះថា កិច្ចសហប្រតិបត្តិការនេះនឹងជួយបង្កើននូវខ្សែច្រវាក់ផ្គត់ផ្គង់ តាមរយៈសហគមន៍កសិកម្ម សំដៅលើកកម្ពស់ជីវភាពប្រជាពលរដ្ឋ បង្កើនតម្លៃបន្ថែមសម្រាប់វិស័យកសិ-ទេសចរណ៍នៅតំបន់ជុំវិញ ជាពិសេសនៅតំបន់ទេសចរណ៍សំខាន់ៗដូចខេត្តសៀមរាបជាដើម។

កសិករ និងសហគមន៍មូលដ្ឋាន នឹងទទួលបានប្រភពចំណូលផង ហើយវិស័យទេសចរណ៍នឹងមានការកើនឡើង ប្រកបដោយលទ្ធផលឈ្នះៗទាំងអស់គ្នា ស្តែងចេញជាការនាំចេញនៅនឹងកន្លែង។ ក្នុងន័យនេះ កសិករ និងសហគមន៍កសិកម្ម នឹងដើរតួនាទីក្នុងការផ្គត់ផ្គង់ផលិតផលកសិកម្ម ធានាបានទាំងនិរន្តរភាពនៃការផ្គត់ផ្គង់ តម្លៃ និងបរិមាណ តាមការតភ្ជាប់ទៅកាន់ទីផ្សារកសិ-ទេសចរណ៍ ហើយភ្ញៀវជាតិ និងអន្តរជាតិក៏អាចទទួលបាននូវអារម្មណ៍ប្លែកៗមួយបែបទៀតក្នុងការទស្សនាខ្សែច្រវាក់ផលិតកម្មនៃកសិផលសក្តានុពលកម្ពុជា។

បេីតាមក្រសួងកសិកម្ម ការនាំចេញនៅនឹងកន្លែង និងការបំពេញឱ្យគ្នាទៅវិញទៅមក គឺជាកត្តាសំខាន់ចាំបាច់សម្រាប់វិស័យកសិ-ទេសចរណ៍ ពោលគឺតំបន់ទេសចរណ៍នៅទីណា ប្រភពនៃការផ្គត់ផ្គង់គឺនៅទីនោះ ហេីយមានលក្ខណៈពេញលេញរួមមាន៖ បន្លែ ត្រី សាច់ សំដៅពង្រីកវិសាលភាពផលិតកម្ម បង្កើនប្រាក់ចំណូលជូនសហគមន៍មូលដ្ឋានតាមរយៈវិស័យកសិកម្ម និងភាគលាភបន្ថែមនៃវិស័យទេសចរណ៍៕