អ៊ីរ៉ង់បានព្រមាននៅចុងសប្តាហ៍នេះប្រឆាំងនឹងសកម្មភាពផ្សងព្រេងណាមួយរបស់សហរដ្ឋអាមេរិក ហើយបាននិយាយថា ខ្លួននឹងសងសឹកយ៉ាងម៉ឺងម៉ាត់ ប្រសិនបើកងកម្លាំងអាមេរិកធ្វើតាមការគំរាមកំហែងវាយប្រហារជាថ្មីទៀតរបស់ប្រធានាធិបតី Donald Trump លើគោលដៅអ៊ីរ៉ង់។

ការអត្ថាធិប្បាយរបស់រដ្ឋមន្ត្រីការបរទេសអ៊ីរ៉ង់ លោក Abbas Araghchi នៅក្នុងការសន្ទនាតាមទូរស័ព្ទដាច់ដោយឡែកពីគ្នាកាលពីថ្ងៃសៅរ៍១ សីហា ជាមួយមន្ត្រីជាន់ខ្ពស់ទួរគី ប៉ាគីស្ថាន និងអារ៉ាប៊ីសាអ៊ូឌីត បានកើតឡើងត្រឹមតែប៉ុន្មានម៉ោងបន្ទាប់ពីកងទ័ពកូវ៉ែតបាននិយាយថា ខ្លួនបានបំផ្លាញយានដ្រូនអរិភាពដែលបាញ់ដោយអ៊ីរ៉ង់ប្រឆាំងនឹងទីតាំងសំខាន់ៗជាច្រើន។

ថ្លែងទៅកាន់មេបញ្ជាការកងទ័ពប៉ាគីស្ថាន លោក Asim Munir និងរដ្ឋមន្ត្រីការបរទេសទួរគី លោក Hakan Fidan លោក Araghchi បាននិយាយថា អ៊ីរ៉ង់នឹងឆ្លើយតបយ៉ាងម៉ឺងម៉ាត់ចំពោះការឈ្លានពានណាមួយ និងបានពិភាក្សាអំពីផលវិបាកនៃសកម្មភាពបង្កអស្ថិរភាព ដោយសហរដ្ឋអាមេរិក ក៏ដូចជាការរំពឹងទុកសម្រាប់អសន្តិសុខក្នុងតំបន់កាន់តែកើនឡើង នេះបើយោងតាមគណនី Telegram របស់លោក Araghchi។

ក្រោយមក លោក Araghchi បានប្រាប់រដ្ឋមន្ត្រីការបរទេសអារ៉ាប៊ីសាអ៊ូឌីត ព្រះអង្គម្ចាស់ Faisal bin Farhan ថា ការវាយប្រហារណាមួយដោយសហរដ្ឋអាមេរិក និងអ៊ីស្រាអែល ឬការចូលរួមដោយប្រទេសក្នុងតំបន់ក្នុងសកម្មភាពបែបនេះ នឹងត្រូវជួបប្រទះដោយការឆ្លើយតបមានទំហំស្មើគ្នា។

សារព័ត៌មាន Nournews ជាប្រព័ន្ធផ្សព្វផ្សាយដែលមានទំនាក់ទំនងជាមួយស្ថាប័នសន្តិសុខកំពូលរបស់អ៊ីរ៉ង់ បាននិយាយកាលពីថ្ងៃសៅរ៍ថា ការវាយប្រហាររបស់សហរដ្ឋអាមេរិកលើហេដ្ឋារចនាសម្ព័ន្ធថាមពលរបស់អ៊ីរ៉ង់ នឹងជំរុញឱ្យមានការវាយប្រហាររបស់អ៊ីរ៉ង់លើរោងចក្រប្រេងនៅក្នុងប្រទេសអារ៉ាប៊ីសាអ៊ូឌីត និងអេមីរ៉ាតអារ៉ាប់រួម ក៏ដូចជារោងចក្រឧស្ម័នរបស់ប្រទេសកាតា និងអ៊ីស្រាអែល ដោយនិយាយថា ទាំងអស់នោះនឹងត្រូវឆេះក្លាយជាផេះផង់៕