នៅរសៀលថ្ងៃទី១ ខែសីហា ឆ្នាំ២០២៦ ឯកឧត្តម អ៊ុំ រាត្រី អភិបាល នៃគណៈ​អភិបាល​ខេត្ត​បន្ទាយ​មានជ័យ អមដំណើរដោយលោក ហ៊ឹល រ៉ាយ៉ា អភិបាលរងខេត្ត រួមនឹងក្រុមការងារខេត្ត មក​ពី​តាមក្រុងស្រុក បានអញ្ជើញជាអធិបតីក្នុងពិធីចាប់ឆ្នោត ជ្រើសរើសតូបលក់ដូរ សម្រាប់​បង​ប្អូន​អាជីវករដែលរងគ្រោះដោយសារសង្គ្រាមឈ្លានពាន ពីសំណាក់យោធាថៃ រំលោភ​មក​លើ​អធិប​តេយ្យ​ភាព​របស់កម្ពុជា ខណៈ ផ្ទះសំបែងរបស់ពួកគាត់ត្រូវបានភាគីថៃគ្រប់គ្រងទាំងកម្រោល មិន​ទាន់​អាច​វិលត្រលប់ទៅលំនៅឋានបាន។

ដោយមានការគិតគូរខ្ពស់ពីសម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រី នៃកម្ពុជា តាម​រយៈ​ក្រុម​ការងារដែលមានឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រីអនុប្រធាន និង​ជា​អគ្គ​លេខាធិការ សមាគមអតីតយុទ្ធជន និងនិវត្តជនកម្ពុជា និងឯកឧត្តម ឌិត ទីណា រដ្ឋមន្រ្តី​ក្រសួង​កសិកម្ម រុក្ខាប្រមាញ់ និងនេសាទ និងជាប្រធានក្រុម​ការងារ​រាជ​រដ្ឋាភិបាល​ចុះ​មូល​ដ្ឋាន​ខេត្ត​បន្ទាយ​មានជ័យ ឯកឧត្ដម អ៊ុំ រាត្រី អភិបាល ខេត្ត ជាពិសេស ឯកឧត្ដម កែ គឹមយ៉ាន ឧត្តម​ក្រុម​ប្រឹក្សា​ព្រះមហាក្សត្រ និងលោកជំទាវ បានផ្តល់ដីចំនួន ៤០០ហិកតា ជូនរាជរដ្ឋាភិបាល សម្រាប់​រៀបចំ​សាង​សង់​ជម្រក​សមរម្យ​សម្រា​ប់​បង​ប្អូន​ភៀសសឹ​កដែល​មិន​ទាន់​អាច​វិល​ត្រឡប់​ទៅលំ​នៅឋា​នវិញបានតាមរយៈអាជ្ញាធរដោយបានផ្ដល់ ដី និងផ្ទះ ជូនដល់ពួក​គាត់​រស់​នៅ​ប្រកប​រប​នៅ​ក្នុងភូមិរង់ចាំ ស្ថិតនៅ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ជាមួយ​គ្នា​នោះដែរសម្រាប់បងប្អូនអាជីវករ ភៀសសឹក រាជរដ្ឋាភិបាលកម្ពុជា​បា​ន​រៀប​ចំ​ឱ្យ​មាន​ផ្សារ​សម្រាប់លក់ដូរទំនិញផងដែរ ក្រោយមានការរៀបចំរួច រាល់ អាជ្ញាធរខេត្តបន្ទាយមានជ័យ បាន​រៀបចំពិធីចាប់ឆ្នោត ដើម្បីឱ្យបងប្អូនអាជីវករជនភៀសសឹកទាំងអស់ទទួលបានតូបលក់ដូរ សមរម្យ សម្រាប់លក់ដូរប្រកបរបរចិញ្ចឹមជីវិតប្រចាំថ្ងៃក្នុងពេលភៀសសឹកផងដែរ។

ក្នុង​នោះដែរចំពោះបងប្អូនអាជីវករដែលបានដាក់ពាក្យស្នើសុំ អាជ្ញាធរខេត្ត ស្រុក និងមូលដ្ឋាន បាន​ធ្វើការត្រួតពិនិត្យ និងវាយតម្លៃយ៉ាងម៉ត់ចត់ មុនឈានដល់ការបោះឆ្នោត ដែល​ដំណាក់​កាលទី១ មានចំនួនជាង៣០០តូប ជំហាន​បន្ទាប់​អាជ្ញាធរ និង​រៀប​ចំ​ការ​ចាប់​ឆ្នោត​ចំពោះ​បងប្អូន​អាជីវករ​ដែល​នៅសល់បន្តទៀត។

ក្នុងនោះអាជ្ញាធរខេត្តបន្ទាយមានជ័យ បានសំណូមពរទៅដល់បងប្អូនអាជីវករ នៅពេ​ល​ផ្សារ​ចាប់​ផ្តើម​ដំណើរ​កា​រលក់ដូរហើយនោះ សូមចូលរួមធ្វើការ​ថែរក្សា​នូវ​បរិស្ថាន​អនាម័យ​ទាំង​អស់​គ្នា​ឲ្យ​ល្អ​ប្រសើរ​ដើម្បី​សោភ័ណភាព ទន្ទឹមគ្នានោះដែរក្រុម​ការងារបាន​បែង​ចែក​ទៅ​តាម​ប្រភេទ​នៃ​ការ​លក់​ដូរ​ដោយ​ឡែកពីគ្នា ដូចជា ឥវ៉ាន់ ចាប់ហួយ សម្លៀកបំពាក់មួយឡែក លក់ម្ហូបអាហារ គ្រឿង​សមុទ្រ ត្រី សាច់មួយឡែកផងដែរ៕