អាល្លឺម៉ង់៖ រដ្ឋមន្ត្រីការពារជាតិអាល្លឺម៉ង់បានបញ្ជាក់កាលពីថ្ងៃសុក្រ ក្នុងអំឡុងពេលដំណើរទស្សនកិច្ចរបស់លោកស្រីទៅកាន់ប្រទេសស្លូវ៉ាគីថា ប្រទេសរបស់លោកស្រីនឹងផ្គត់ផ្គង់ទៅឲ្យអ៊ុយក្រែន នូវកាំភ្លើងធំដ៏មានឥទ្ធិពលចំនួន ៧គ្រឿងដើម្បីជួយទប់ទល់ការវាយលុករបស់រុស្ស៊ី។
លោកស្រី Christine Lambrecht និយាយថា ទាហានអ៊ុយក្រែននឹងត្រូវបានបណ្ដុះបណ្ដាលនៅប្រទេសអាល្លឺម៉ង់ ដើម្បីប្រើប្រាស់អាវុធកាំភ្លើងធំស្វ័យកម្ម Panzerhaubitze 2000 ដែលអាចបាញ់ផ្លោងយ៉ាងជាក់លាក់ក្នុងចម្ងាយរហូតដល់ ៤០គីឡូម៉ែត្រ។ ប្រទេសអាល្លឺម៉ង់បានបង្កើនការគាំទ្រផ្នែកសម្ភារៈរបស់ខ្លួន សម្រាប់អ៊ុយក្រែនក្នុងប៉ុន្មានសប្តាហ៍ថ្មីៗនេះ បន្ទាប់ពីភាពស្ទាក់ស្ទើរដំបូងរបស់រដ្ឋាភិបាលក្នុងការផ្តល់អាវុធធុនធ្ងន់ ដែលបានធ្វើឲ្យមានការរិះគន់ជាច្រើន។ អធិការបតីលោក Olaf Scholz នឹងថ្លែងសុន្ទរកថាទៅកាន់ប្រជាជាតិនៅថ្ងៃអាទិត្យស្អែកនេះ ក្នុងឱកាសនៃការបញ្ចប់សង្គ្រាមលោកលើកទី២។ ភាពបរាជ័យរបស់ណាស៊ីអាល្លឺម៉ង់ដោយសម្ព័ន្ធមិត្តកាលពី ៧៧ឆ្នាំមុនត្រូវបានបង្ហាញថាជាថ្ងៃរំដោះនៅក្នុងប្រទេស។
សុន្ទរកថារបស់លោក Scholz ត្រូវបានគេរំពឹងថានឹងបង្ហាញពីជំហររបស់រដ្ឋាភិបាលលោក ចំពោះសង្គ្រាមនៅអ៊ុយក្រែន។ ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃសុក្រថា លោកបានអញ្ជើញប្រធានាធិបតី និងអធិការបតីអាល្លឺម៉ង់មកបំពេញទស្សនកិច្ចនៅអ៊ុយក្រែននៅថ្ងៃទី៩ ខែឧសភា ជាថ្ងៃដែលរុស្ស៊ីប្រារព្ធពិធីអបអរជ័យជម្នះរបស់សហភាពសូវៀតលើណាស៊ីអាល្លឺម៉ង់ក្នុងសង្គ្រាមលោកលើកទី២។ មន្ត្រីប្រទេសលោកខាងលិចជឿថា ប្រធានាធិបតីរុស្ស៊ីលោក Vladimir Putin អាចប្រើប្រាស់ថ្ងៃទិវាជ័យជម្នះដើម្បីប្រកាសអំពីសង្គ្រាម ទាំងការប្រកាសជ័យជម្នះ ឬបង្កើនជម្លោះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
