ភ្នំពេញ៖ បក្សកុម្មុយនិស្តចិន បានលើកឡើងថា គណបក្សហ៊្វុនស៊ិនប៉ិច គឺជាកេរ្តិ៍ដំណែលដ៏ធំមួយរបស់អតីតព្រះមហាវីរៈក្សត្រ សម្ដេចព្រះ នរោត្តម សីហនុ ព្រះបរមរតនកោដ្ឋ ហើយគណបក្សនេះ ក៏ជាចលនាកម្លាំងនយោបាយមួយដ៏សំខាន់ក្នុងការចូលរួមថែរក្សាសុខសន្តិភាពនៅប្រទេសកម្ពុជា ហើយជាមួយគ្នានេះ បក្សកុម្មុយនិស្តចិន នៅតែបន្តលើកកម្ពស់ទំនាក់ទំនងជាមួយគណបក្សហ៊្វុនស៊ិនប៉ិចដដែល។
យោងតាមលិខិតអបអរសាទររបស់នាយកដ្ឋានអន្តរជាតិគណៈកម្មការកណ្តាលរបស់បក្សកុម្មុយនិស្តចិន ផ្ញើជូនពរខួបលើកទី៤០ឆ្នាំ នៃការបង្កើតគណបក្សហ៊្វុនស៊ិនប៉ិច នាថ្ងៃទី២១ ខែមីនា ឆ្នាំ២០២១នេះ បានលើកឡើងថា ដោយមានការបន្សល់ទុកទំនាក់ទំនងផ្នែកនយោបាយដ៏ល្អប្រពៃ ហើយគណបក្សនេះក៏ជាគណបក្សមួយបានពង្រឹងស្មារតីសាមគ្គីភាព និងជំរុញឲ្យមានការអភិវឌ្ឍនៅកម្ពុជាផងដែរ ក្រោមការដឹកនាំរបស់សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សមួយនេះ។
តាមលិខិតអបអរសាទររបស់គណបក្សកុម្មុយនិស្តចិន បានលើកឡើងផងដែរថា គណបក្សហ៊្វុនស៊ិនប៉ិច បានប្រកាន់ភ្ជាប់នយោបាយកិច្ចការបរទេសជាមួយប្រទេសចិន ហើយបានចូលរួមយ៉ាងសកម្ម ដើម្បីជំរុញឲ្យមានទំនាក់ទំនងល្អ រវាងប្រទេសកម្ពុជា និងប្រទេសចិន តាំងពីដើមរហូតដល់បច្ចុប្បន្ននេះ ផងដែរ។
លិខិតដដែល បានបញ្ជាក់ផងដែរថា «ដើម្បីលើកកម្ពស់ទំនាក់ទំនងកម្ពុជា-ចិន និងសហគមន៍ ដែលមានអនាគតរួមគ្នា ហើយក៏ដើម្បីពង្រឹងមិត្តភាព នៃប្រជាជនប្រទេសទាំងពីរ(កម្ពុជា-ចិន)ឲ្យកាន់តែល្អប្រសើរបន្ថែមទៀតផងដែរ ហើយគណបក្សកុម្មុយនិស្តចិន នៅតែបន្តពង្រឹងកិច្ចសហប្រតិបត្តិការ និងផ្លាស់ប្ដូរ បទពិសោធន៍ជាមួយគណបក្សហ៊្វុនស៊ិនប៉ិចដដែលផងដែរ»៕
អត្ថបទ ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
