​គុយបា៖ ការ​ផ្ទុះ​ដ៏​ខ្លាំង​មួយ​ទំនង​បណ្ដាល​មក​ពី​ការ​លេច​ធ្លាយ​ឧស្ម័ន​ធម្មជាតិ​កាលពី​ថ្ងៃ​សុក្រ ​បាន​បណ្ដាល​ឲ្យ​មនុស្ស​យ៉ាងតិច​ ៩​នាក់​ស្លាប់ និង​រង​របួស ៤០​នាក់ ខណៈ​វា​បាន​ផ្ទុះ​បំប៉ើង​ជញ្ជាំង​មក​ខាងក្រៅពី​សណ្ឋាគារ​ប្រណីត​មួយ​នៅ​រដ្ឋធានី​ប្រទេស​គុយបា​។

​រដ្ឋមន្ត្រី​ក្រសួងទេសចរណ៍​គុយបា​បាន​និយាយ​ ទៅកាន់ក្រុម​អ្នកសារព័ត៌មាន​ក្នុង​ពេល​ទៅ​ពិនិត្យ​កន្លែង​ផ្ទុះ​ថា គ្មាន​អ្នកទេសចរ​ណា​ម្នាក់​បាន​ស្នាក់នៅ​សណ្ឋាគារ Saratoga ដែល​មាន ៩៦​បន្ទប់​នោះ​ទេដោយសារតែ​សណ្ឋាគារ​កំពុង​ដំណើរ​ការ​ជួសជុល​។​ ​ប្រធានាធិបតីលោក Miguel Díaz-Canel ដែល​បាន​ទៅ​ពិនិត្យ​ទីតាំង​កើតហេតុ​នោះ​បាន​និយាយ​នៅ​លើ​បណ្ដាញ ​Tweeter​ ថា វា​មិន​មែន​ជា​ការបំ​ផ្ទុះ​គ្រាប់បែក ឬ​ការវាយប្រហារ​នោះ​ទេ វា​គឺជា​ឧបទ្ទវហេតុ​។ ទូរទស្សន៍​រដ្ឋ​គុយបា​បាន​រាយការណ៍​ថា យ៉ាងហោចណាស់​មនុស្ស ៩​នាក់​បាន​ស្លាប់ ហើយ​រដ្ឋមន្ត្រី​សុខាភិបាល​ជាតិ​របស់​ប្រទេស​គុយបា​លោក José Ángel Portal បាន​និយាយ​ថា មន្ទីរពេទ្យបាន​ទទួល​អ្នក​រង​របួស​ប្រមាណ​ ៤០​នាក់​។

ប៉ុន្តែ​ចំនួន​អ្នករបួស​អាច​កើន​ឡើង​ ខណៈ​ការស្វែងរក​នៅតែ​បន្ត​សម្រាប់​អ្នក​ដែល​អាច​នឹង​ជាប់ ​នៅ​ក្នុង​គំនរ​បាក់បែក​នៃ​រចនាសម្ព័ន្ធ​សតវត្សរ៍​ទី​១៩ នៅ​ក្នុង​ទីក្រុង Old Havana។​ ​សិស្សសាលា​បឋមសិក្សា​មួយ​កន្លែង​នៅ​ជាប់​សណ្ឋាគារត្រូវ​បាន​ជម្លៀស​ចេញ ហើយ​ប្រព័ន្ធ​ផ្សព្វផ្សាយ​ក្នុងស្រុក​បាន​និយាយ​ថា គ្មាន​កុមារ​ណា​ម្នាក់​រងគ្រោះថ្នាក់​នោះ​ទេ​។​ នគរបាល​បាន​ព័ទ្ធជុំវិញ​តំបន់​នោះ ខណៈ​ក្រុម​អ្នក​ពន្លត់​អគ្គីភ័យ និង​ក្រុម​អ្នក​ជួយ​សង្គ្រោះ​បាន​ចូល​រុះរើ​គំនរ​បាក់បែក​នៃ​សណ្ឋាគារ Saratoga៕

អត្ថបទ៖ ប៊ុនថន