ក្រចេះ៖ ប្រជាពលរដ្ឋងាយរងគ្រោះបំផុត ដែលជាមុខសញ្ញាអាទិភាព របស់កាកបាទក្រហម​កម្ពុជា ក្នុងការផ្តល់អំណោយសម្រាលការលំបាកដល់ពួកគាត់ចំនួន ១០៣១ គ្រួសារ ស្ថិត​ក្នុង​ស្រុកឆ្លូង, ស្រុកចិត្របុរី, ស្រុកស្នួល, និងស្រុកសំបូរ ខេត្តក្រចេះទទួលអំណោយសង្គ្រោះ ពីកាក​បាទ​ក្រហមកម្ពុជា ដែលប្រគល់ជូនដោយឯកឧត្តមវេជ្ជ. អ៊ុយ សំអាត នាយក នាយកដ្ឋាន​គ្រប់គ្រង​គ្រោះមហន្តរាយ កាកបាទក្រហមកម្ពុជា ចាប់ពីថ្ងៃទី១-៧ ខែ ឧសភា ២០២២នេះ។

ឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា បានឱ្យដឹងថា «ក្នុងបេសកកម្មមនុស្សធម៌រយៈពេល៧ថ្ងៃ នៅលើទឹកដីខេត្តក្រចេះនេះ គឺអនុវត្ត​តាម​អនុសាសន៍ណែនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាក​បាទ​ក្រហម​កម្ពុជា បានចាត់ឱ្យឯកឧត្តមផ្ទាល់ នាំយកអំណោយទាំងនេះ មកផ្តល់​ជូនប្រជាពលរដ្ឋ​ងាយរង​គ្រោះ​បំផុតរួមមាន ជនចាស់ជរាគ្មានទីពឹង ស្រ្តីមេម៉ាកូនច្រើន និងជនមានពិការភាពជាដើម។

មានមតិសំណេះសំណាលជាមួយប្រជាពលរដ្ឋ ដែលមកទទួលអំណោយនៅតាមទីតាំងនីមួយៗ ឯកឧត្តមតែងតែពាំនាំនូវព្រះរាជបណ្តាំផ្ញើសួរសុខទុក្ខ ពីសំណាក់ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូន​ដល់​បងប្អូន​ប្រជាពលរដ្ឋ ដោយក្តីអាណិតអាសូរ មនោសញ្ជេតនាយ៉ាងជ្រាលជ្រៅ ដោយ​សម្តេច​តែង​តែ​គិតគូរ ពីជីវភាពរស់នៅជាប្រចាំថ្ងៃរបស់ប្រជាពលរដ្ឋ ថ្វីបើសម្តេចកិត្តិព្រឹទ្ធបណ្ឌិតប្រធាន មាន​ទុក្ខ​ដ៏​ក្រៀមក្រំបំផុតក្នុងក្រុមគ្រួសារក៏ដោយ។

 ក្នុងឱកាសនោះដែរឯកឧត្តម ក៏បានថ្លែងអំណរព្រះគុណយ៉ាងជ្រាលជ្រៅបំផុតចំពោះ ព្រះរាជូបត្ថម្ភ​ដ៏ឧត្តុង្គឧត្តមរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ ជាអម្ចាស់ជីវិតលើត្បូង និងហ្លួងម៉ែ នរោត្តម មុនិនាថ សីហនុ ជាទីគោរព​សក្ការៈ​ដ៏ខ្ពង់ខ្ពស់បំផុត ដែលព្រះអង្គទាំងទ្វេបានប្រោសប្រទាន ព្រះរាជទ្រព្យជារៀងរាល់ខែ រៀលរាល់​ត្រីមាស និងក្នុងឱកាសផ្សេងៗជាបន្តបន្ទាប់ ព្រមទាំងសប្បុរសជនគ្រប់មជ្ឈដ្ឋាន ដែលបាន​ចូល​រួម​បរិច្ចាគធនធានថវិកាជូនកាកបាទក្រហមកម្ពុជា ក្នុងឱកាសទិវាពិភពលោកកាកបាទក្រហម និង​អឌ្ឍចន្ទក្រហម ៨ឧសភា ដើម្បីឱ្យកាកបាទក្រហមកម្ពុជា មានលទ្ធភាព​ក្នុង​ការ​បំពេញ​សកម្មភាព​មនុស្សធម៌ជូនជនរងគ្រោះបន្តទៀត។

សូមបញ្ជាក់ថាការចែកជូនអំណោយនៅក្នុងខេត្តក្រចេះនេះក្រៅពីប្រគល់នៅតាមទីតាំងនីមួយៗ ឯកឧត្តមវេជ្ជ. អ៊ុយ សំអាត និងក្រុមការងារ សាខា អនុសាខា គឺបានចុះទៅតាមខ្នងផ្ទះ និងបាននាំយកអំណោយ ជូនដល់លោកយាយ លោកតា ដែលជាជនចាស់ជរា គ្មានទីពឹង មិនអាចធ្វើដំណើរបានមួយចំនួនទៀតផងដែរ។ ក្នុងនោះដែរមានគ្រួសារជនពិការចំនួន៣គ្រួសារ ដែល១គ្រួសារធ្លាប់បានទទួលអំណោយផ្ទះទេវតាមួយខ្នងនៅឆ្នាំ២០១៣ ស្ថិតនៅភូមិប្រវ៉ាញ ឃុំ២ធ្នូ ស្រុកស្នួល។ គ្រួសារទី២ ជាស្ត្រីមេម៉ាយពិការភ្នែក រស់នៅជាមួយកូនប្រុសម្នាក់ ធ្លាប់បានទទួលផ្ទះមួយខ្នងពីក្រុមការងារថ្នាក់ស្រុក និងគ្រួសារទី៣ ស្ថិតក្នុង​វ័យ​២៥​ឆ្នាំ​ពិការ​ភ្នែកដូចគ្នា កន្លងមកក៏បានទទួលផ្ទះ១ខ្នងពីមេបញ្ជាការវរសេនាតូចលេខ៤ផងដែរ។ 

ប្រជាពលរដ្ឋទាំង ១,០៣១ គ្រួសារ ដែលបានទទួលអំណោយទាំងនេះ បាន​សម្តែង​នូវភាព​សប្បាយ​រីករាយ និងថ្លែងអំណរគុណចំពោះទឹកចិត្តសប្បុរធម៌ របស់សម្តេចកិត្តិព្រឹទ្ឋបណ្ឌិត ប៊ុនរ៉ានី ហ៊ុនសែន តែងតែគិតគូរជានិច្ច ដល់ប្រជាពលរដ្ឋដែលជួបការលំបាកក្នុងជីវភាព។ សូមជម្រាបថាក្រុមការងារកាកបាទក្រហមកម្ពុជា បន្ទាប់ពីបញ្ចប់បេសកកម្មនៅក្នុងខេត្តក្រចេះ និងបន្តប្រតិបត្តិការទៅខេត្តស្ទឹងត្រែង, ខេត្តរតនគិរី និងខេត្តមណ្ឌលគិរី ជាបន្តបន្ទាប់ទៀត៕