ភ្នំពេញ៖ សាស្រ្តាចារ្យ បុគ្គលិកអប់រំ គរុនិស្សិត និងនិស្សិតចំនួន ២៧៥៤នាក់ បានចូលជាសមាជិកគណបក្សប្រជាជនកម្ពុជា។

ពិធីប្រកាសទទួលស្គាល់ និងបញ្ចូលសមាសភាពសមាជិកថ្មីនេះ រៀបចំឡើងនៅព្រឹកថ្ងៃទី ៧ ខែឧសភា ឆ្នាំ ២០២២ នៅទីតាំង វិមាន៧មករា ក្រោមអធិបតីភាព ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្រ្តៃយ៍ នៃគណៈកម្មាធិការកណ្ដាល និជាប្រធានយុវជនគណបក្សប្រជាជនកម្ពុជាថ្នាក់កណ្ដាល។

សមាជិកថ្មីដែលមានវត្តមាននាព្រឹកនេះ គឺមកពីគ្រឹះស្ថានឧត្តមសិក្សា ចំនួន៥ផ្សេងគ្នា ក្នុងរាជធានីភ្នំពេញ។

សម្រាប់ការចូលរួមជាសមាជិកគណបក្សប្រជាជនកម្ពុជានេះ និស្សិតឈ្មោះ ស្រ៊ុយ នារី ជាតំណាង​និស្សិតទាំងអស់លើកឡើងពីភាពដឹងគុណក្រោមការរស់នៅនៃការដឹកនាំ​របស់គណបក្ស​ប្រជាជន​កម្ពុជា។ កញ្ញា បញ្ជាក់ថា ក្នុងនាមយើងខ្ញុំជាយុវជនជំនាន់ក្រោយ​ ពិតជាមានវាសនា និង​អនាគត​ដ៏រុងរឿង​ណាស់​ ដោយបានរស់នៅក្នុងសម័យ​ដែលមានថ្នាក់ដឹកនាំ​យកចិត្តទុក​ដាក់​ចំពោះ​ប្រជាជន​ទូទាំង​ប្រទេស ជាពិសេសគឺយុវជនកម្ពុជាទាំងអស់ ​មានឱកាសសិក្សារៀនសូត្រទាំងក្នុង និងក្រៅ​ប្រទេស មានឱកាសការងារ ​និងសមិទ្ធផលជាច្រើន ​ដូចជាវិស័យសេដ្ឋកិច្ច ​កសិកម្ម ឧស្សាហកម្ម ទេសចរណ៍ ​ហេដ្ឋារចនាសម្ព័ន្ធ​ និងសំណង់អាគារខ្ពស់ៗជាច្រើន ដើម្បីលើកកម្ពស់កិត្តិនាម​ព្រះរាជា​ណា​ចក្រ​កម្ពុជា ​ក្នុងឆាកជាតិ និងអន្តរជាតិ។

សម្រាប់ការប្រកាស​ទទួលសមាជិកថ្មីនេះ ឯកឧត្តមបណ្ឌិត ហ៊ុន ម៉ាណែត លើកឡើងពីភាព​សប្បាយ​ចិត្តដែល​យុវជនកម្ពុជា ​ជា​បញ្ញវន្ត ​បានសម្រេចចិត្តត្រឹមត្រូវជឿទុកចិត្ត​លើការដឹកនាំ​របស់​គណបក្សប្រជាជនកម្ពុជា។

ឯកឧត្ត មបន្តថា បុគ្គលគ្រប់រូបមានសិទ្ធិសេរីភាព ​ក្នុងការជ្រើសរើសបក្សនយោបាយណាមួយ ដោយ​គ្មាន​ការ​បង្ខិតបង្ខំ។ ឯកឧត្តម បន្តថា គណបក្សប្រជាជនកម្ពុជា នៅតែជាគណបក្សរបស់​ប្រជាពលរដ្ឋ ដោយមានបុព្វហេតុ ​គឺបម្រើពលរដ្ឋជានិច្ច ​ដើម្បីឱ្យជាតិរីកចំរើន។

ផ្អែកលើមាត្រា ៣ នៃលក្ខន្តិកៈ បទបញ្ជាផ្ទៃក្នុងនៃគណបក្សប្រជាជនកម្ពុជា បញ្ជាក់ថា គោលបំណង​របស់​គណបក្សគឺប្រមូលកម្លាំងគ្រប់ជនជាតិកម្ពុជា​ ដែល​មានឧត្តម​គតិស្នេហាជាតិ​ មាតុភូមិ ស្រឡាញ់​លទ្ធិប្រជាធិបតេយ្យ ​និងសន្តិភាព ​ដោយមិនប្រកាន់ឋានៈជីវភាព ជនជាតិ ជំនឿសាសនា អតីតកាល ​ដើម្បីរួមកម្លាំងគ្នាការពារ​សមិទ្ធផល​សង្គមជាតិ ​និង​កសាង​ប្រទេស​កម្ពុជាមួយ ឯករាជ្យ​សន្តិភាព សេរីភាព ​ប្រជាធិបតេយ្យ អព្យាក្រឹត ​និងវឌ្ឍនភាពសង្គម ៕ អត្ថបទ៖ គឹមហុក