កណ្ដាល៖ ឯកឧត្តម ហេង រតនា ប្រធានក្រុមការងាររាជរដ្ឋាភិបាលចុះជួយស្រុកលើកដែក ខេត្តកណ្ដាល បានជំរុញទៅសមាជិកគណបក្សប្រជាជនកម្ពុជា ត្រូវបន្តប្ដូរឥរិយាបទបន្ទន់ខ្លួន និងចេះទទួលយកការរិះគន់របស់ពលរដ្ឋ ដើម្បីយកមកកែលម្អចំណុចខ្វះខាត ។

ក្នុងពិធីសំណេះសំណាលជាមួយសមាជិក សមាជិកាបក្ស នៅឃុំក្អមសំណរ ស្រុកលើកដែក ជាង ៤០០នាក់ នៅថ្ងៃទី៧ ខែឧសភា ឆ្នាំ២០២២ ឯកឧត្តម ហេង រតនា មានប្រសាសន៍ថា សមាជិកបក្ស​ទាំងអស់បោះឆ្នោតជូនបេក្ខជនឈរឈ្មោះគណបក្សប្រជាជនកម្ពុជា ត្រូវពង្រឹងគុណភាពបក្ស តាមរយៈគោលការណ៍ “សមាជិកម្នាក់ សន្លឹកឆ្នោតមួយសន្លឹក” ។

ឯកឧត្តម បន្តថា សមាជិកគណបក្ស ត្រូវបន្តរៀបចំកម្លាំងស្នូលគណបក្ស បន្តចុះឲ្យដល់គ្រប់​ទីកន្លែង​ក្នុងមូលដ្ឋាន ​ចុះគ្រប់តាមគ្រួសារបក្ស ​និងកែលំអររាល់សកម្មភាពអវិជ្ជមាន​ដែលខ្លួនមាន ហើយ​ត្រូវ​ពិនិត្យ​អត្តសញ្ញាណប័ណ្ណ ​និងឈ្មោះបោះឆ្នោត ​នៅទីតាំងដែលខ្លួនបោះឆ្នោតឲ្យ​បានច្បាស់លាស់ ។

ឯកឧត្តម ហេង រតនា បានណែនាំឲ្យក្រុមការងារគណបក្ស ​ត្រូវបន្តប្តូរឥរិយាបទ​ បន្ទាបខ្លួន និង​ហ៊ានទទួលយកនូវការ​តិះទៀន​ទាំងឡាយ​ ពីប្រជាពលរដ្ឋនៅមូលដ្ឋាន ​ជាពិសេសត្រូវបន្តកែលំអរ​រាល់ទង្វើអវិជ្ជមាន ​និងយកចិត្តទុកដាក់បន្ថែមចំពោះទុក្ខធុរៈ ​របស់ប្រជាពលរដ្ឋ ​សមាជិកបក្ស និង​ក្រុមគ្រួសារបក្ស។

ជាមួយគ្នានេះ ឯកឧត្តមប្រធានក្រុមការងារ បានថ្លែងអំណរគុណ និងវាយតម្លៃខ្ពស់ចំពោះក្រុមការ​ងារ និងសមាជិកគណបក្សគ្រប់ជាន់ថ្នាក់​ ដែលបានខិតខំប្រឹងប្រែង​ ពលីគ្រប់បែបយ៉ាង និងគាំទ្រ​ដល់សកម្មភាពនានា រ​បស់​គណបក្សនៅតាមមូលដ្ឋាន ​ក្នុងបុព្វហេតុដើម្បីឧត្តមប្រយោជន៍​ជាតិមាតុភូមិ ​គណបក្សប្រជាជនកម្ពុជា ​និងប្រជាពលរដ្ឋ ៕ អត្ថបទ៖ បាន សុខ​រិទ្ធ