ភ្នំពេញ៖ ស្ថាប័នរដ្ឋ និងឯកជន ពង្រឹងកិច្ចសហប្រតិបត្តិការលើវិស័យវិទ្យាសាស្ត្របច្ចេកវិទ្យា និង នវានុវត្តន៍ ក្នុងគោលលដៅជំរុញតួនាទី និងការវិនិយោគនៃវិស័យទាំងនេះ, ការពង្រឹងប្រព័ន្ធនវានុវត្តន៍ជាតិ ដើម្បីជំរុញវិស័យអភិវឌ្ឍន៍ឧស្សាហកម្ម ជីវភាពរស់នៅរបស់ប្រជាពលរដ្ឋ និងចូលរួមក្នុងការអភិវឌ្ឍជាតិ។

ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី ៦ ខែឧសភា ឆ្នាំ២០២២នេះ អញ្ជើញធ្វើជាអធិបតី និង​ជាសាក្សី​នៃការចុះហត្ថលេខាលើអនុស្សរណៈយោគយល់គ្នា ​អំពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា​ និងនវានុវត្តន៍ (STI)​ និងការវិនិយោគនៃអនាគតកម្ពុជា ​រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ​ជាមួយសភាពាណិជ្ជកម្មអន្តរជាតិនៃកម្ពុជា (IBC) និងជាមួយ Max Syndicate (តំណាងឲ្យ EZE Asia) ​ដោយមានការ​ហត្ថលេខី​នៃពិធីចុះហត្ថលេខា រវាងឯកឧត្ដម ហ៊ុល សៀងហេង អគ្គនាយកនៃអគ្គនាយកដ្ឋាន​ វិទ្យាសាស្ត្រ បច្ចេកវិទ្យា និង​នវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍ និងលោក Poul Carey Clements ប្រធានសភាពាណិជ្ជកម្មអន្តរជាតិនៃកម្ពុជា (IBC) ។

ទាក់ទងការចុះហត្ថលេខានេះ, គឺគោលបំណងពង្រឹងកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ និងការវិនិយោគនៃអនាគតកម្ពុជា ដោយផ្អែកលើគោលការណ៍សំខាន់ៗ​មួយចំនួនរួមមាន៖ ការជំរុញតួនាទីនៃវិទ្យាសាស្ត្រ ​បច្ចេកវិទ្យា​ និងនវានុវត្តន៍ ដើម្បី​ពង្រឹង​ប្រព័ន្ធនវានុវត្តន៍ជាតិ ​ការអភិវឌ្ឍឧស្សាហកម្ម ​និងជីវភាពរស់នៅរបស់ប្រជាពលរដ្ឋ និង​ជនបរទេស​ទេសចរណ៍កម្ពុជា, ការទទួលស្គាល់តួនាទីរបស់ MISTI ជាមួយ IBC និង Max Syndicate ក្នុងការ​អភិវឌ្ឍ​វិស័យវិទ្យាសាស្ត្រ បច្ចេកវិទ្យា និងនវានុវត្តន៍ (STI) ​ដែលមានផែនទីបង្ហាញផ្លូវ STI កម្ពុជាឆ្នាំ ២០៣០, និង​ការជំរុញសហការគ្នា​ ដើម្បីគាំទ្រ ​និងចូលរួមក្នុងការអភិវឌ្ឍជាតិជាដើម។

ក្នុងពិធីនេះ, ឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ ​បានចាត់ទុកការចុះហត្ថលេខានេះ មានសារៈសំខាន់មួយណាស់​ ដើម្បីពង្រឹង ​និងពង្រីកវិស័យវិទ្យាសាស្ត្រ ​បច្ចេកវិទ្យា​ និងនវានុវត្តន៍ មានភាព​ប្រទាក់ក្រឡា ​សម្រាប់ជាផែនទីចង្អុលផ្លូវ ​និងជាផ្នែកមួយយ៉ាងសំខាន់ផងដែរ សម្រាប់​ជំរុញ​វិស័យការវិនិយោគ ​ក៏ដូចជាពង្រឹងវិស័យឧស្សាហកម្ម ​និងពាណិជ្ជកម្មរបស់កម្ពុជា។

ឯកឧត្ដមកិត្តិសេដ្ឋាបណ្ឌិត សង្ឃឹមថា ​តាមរយៈកិច្ចសហប្រតិបត្តិការរវាងភាគីទាំងពីរខាងលើ នឹង​ឈានទៅពិភាក្សាលើវិស័យអាទិភាពមួយចំនួនទៀតដូចជា៖ ​ការពង្រឹងមន្ទីរពិសោធន៍ឧស្សាកម្ម, ការវិនិយោគលើវិស័យទឹកស្អាត, ​ការបង្កើតវិទ្យាស្ថានបណ្តុះបណ្តាល ​បច្ចេកវិទ្យាទឹកស្អាត, និង​ការបង្កើតសួនបច្ចេកវិទ្យា វិទ្យាសាស្ត្រជាដើម ​នឹងការទទួលបានធាតុចូល លើកិច្ចសហការ​បន្ថែម​ទៀត តាមរយៈការចូលរួមរបស់ភាគី IBC ​ក្នុងកិច្ចប្រជុំកំពូលអាស៊ាន ​ស្តីពីវិទ្យាសាស្ត្រ ​បច្ចេកវិទ្យា និង​នវានុវត្តន៍នាពេលខាងមុខ ​ដែលកម្ពុជាជាម្ចាស់ផ្ទះ ក្នុងនាមជាប្រធានអាស៊ាន​ប្តូរវេន​នៅ​ឆ្នាំ២០២២នេះ៕ អត្ថបទ៖ សុន រ៉ាឌី