ប្រធានគណបក្សនយោបាយនានាមានសុទិដ្ឋិនិយមដែលប្រទេសកម្ពុជានឹងធ្វើជាម្ចាស់ផ្ទះរៀបចំសន្និសីទ​ប្រធានសភានៃអន្តរសភាជាលើកទី២ នៅចុងខែសីហានេះ។ តាមរយៈសន្និសីទនេះ ប្រទេស​កម្ពុជានឹងទទួលបានផលវិជ្ជមានជាច្រើន។

លោក អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ នៅថ្ងៃទី០៦ខែសីហានេះ បាន​ប្រាប់​BTV​ថា«សម្រាប់ខ្ញុំយល់ឃើញថា មានកក្តាចំនួន៤ចំណុច ដែលជំរុញឱ្យប្រទេស​កម្ពុ​ជា​ទទួល​បាន​នូវ​ការ​រៀបចំធ្វើជាម្ចាស់ផ្ទះ សន្និសីទប្រធានសភានៃអន្តរសភាលើកទី២ ដែលក្នុង​នោះ​រួម​មាន​៖ ទី១.ប្រទេសកម្ពុជាមានសន្តិភាព ស្ថេរភាពនយោបាយ និងសន្តិសុខល្អពេញលេញ ទី២.​ភាព​រីក​ចម្រើន ​និងភាពសកម្មផ្នែកការទូតសភា ទី៣.បទពិសោធខ្ពស់លើការបញ្ចប់ជម្លោះ និងការ​កសាង​សន្តិភាព និងទី៤.មានសមត្ថភាពខ្ពស់ក្នុងការរៀបចំឱ្យមានសុខសុវត្ថិភាពក្នុងដំណើរសន្និសីទ»។ លោកបន្តថា«ទាំង៤ចំណុចនេះ គឺជាទំនុកចិត្ត និងសុវត្ថិភាព​ដ៏​ខ្ពស់​បំផុត​របស់​ឥស្សរជន​ជាន់​ខ្ពស់​ក៏​ដូចជាស្ថាបនិកនីតិប្បញ្ញាត្តិ ដែលអញ្ជើញមកចូលរួមក្នុងសន្និសីទដែលប្រទេសកម្ពុជារៀបចំ ហើយ តាមរយៈសន្និសទីនេះ ប្រទេសកម្ពុជា​នឹង​មានកិត្យា​នុ​ភាព​កាន់​តែ​ខ្លាំង​ទៅ​លើ​ឆាក​អន្តរជាតិ»​។

លោក អ៊ិត សារម្យ ប្រធានគណបក្សបំណងពលរដ្ឋ បានលើកឡើងថា «នៅពេលខាងមុខនេះ ប្រទេសកម្ពុជាយើង នឹងធ្វើជាម្ចាស់ផ្ទះរៀបចំសន្និសីទប្រធានសភា នៃអន្តរសភា ដែលបានឆ្លុះបញ្ចាំថា ប្រទេសកម្ពុជាមានភាពស្មើមុខស្មើមាត់ក្នុងឆាកអន្តរជាតិ ក្នុងនាមប្រទេសមួយជាសមាជិកនៃអង្គការសហប្រជាជាតិ ជាពិសេសទាក់ទងនឹងយន្តការច្បាប់»។

 លោកបានបន្តថា «យន្តការច្បាប់ជាទូទៅបណ្តាប្រទេសមួយចំនួនតែងតែគិតថា បណ្តាប្រទេសខ្លះ ក្រីក្រហ្នឹង គឺយន្តការច្បាប់មានការទន់ខ្សោយ មានការខ្វះខាត តែការពិតយន្តការច្បាប់នៅក្នុងពិភពលោកក៍ដូចជាប្រទេសកម្ពុជាវាមិនមែនជាការខ្វះខាតអីទេ មានន័យថា ការធានានៃការអនុវត្តច្បាប់នៃនិរន្តរភាពច្បាប់ តាមរយៈយើងរៀបចំសន្និសីទអន្តរជាតិនេះ បង្ហាញថាប្រព័ន្ធច្បាប់នៅប្រទេសកម្ពុជាយើងចាប់ផ្តើមពង្រឹងទៅមុខបន្តទៀត ដើម្បីទទួលបានការគាំទ្រជាអន្តរជាតិ»។

ប្រទេសកម្ពុជានឹងរៀបចំធ្វើជាម្ចាស់ផ្ទះសន្និសីទប្រធានសភា នៃអន្តរសភាលើកទី២ ដែលនឹងប្រព្រឹត្តទៅចាប់ពីថ្ងៃទី២៦-២៨ ខែសីហា ឆ្នាំ២០២៦ ដោយមានបណ្តាមេដឹកនាំប្រទេសជាច្រើន និងអង្គការអន្តរជាតិនានា នឹងអញ្ជើញមកចូលរួមក្នុងសន្និសីទនេះ។ មូលបទដែលបានកំណត់គឺ “សាមគ្គីភាពដើម្បីសន្តិភាព និងវិបុលភាពរួម ពង្រឹងនៅការអនុវត្តច្បាប់អន្តរជាតិ និងការដោះស្រាយបញ្ហាដោយសន្តិវិធី” ដែលនេះគឺជាមូលបទដ៏មានសារសំខាន់ និងមានការប្រទាក់ក្រឡាគ្នាស្របទៅនឹងស្ថានការណ៍ពិភពលោកនាពេលបច្ចុប្បន្ន មានភាពមិនគោរពច្បាប់អន្តរជាតិ និងការដើរចេញពហុភាគីនិយម។

គួរបញ្ជាក់ដែរថា សន្និសីទប្រធានសភានៃអន្តរសភាគឺជាវេទិកាការទូតសភាកម្រិតខ្ពស់លក្ខណៈអន្តរជាតិ ដែលបង្កើតឡើងក្នុងគោលបំណងប្រមូលផ្តុំថ្នាក់ដឹកនាំស្ថាប័ននីតិប្បញ្ញត្តិមកពីបណ្តាប្រទេសនានា ដើម្បីជជែកពិភាក្សា និងស្វែងរកដំណោះស្រាយរួមលើបញ្ហាប្រឈមជាសកល៕ អត្ថបទ៖ទូច សោភ័ណ