សៀមរាប៖ នារសៀលថ្ងៃទី៥ ខែសីហា ឆ្នាំ២០២៦ ក្រសួងមុខងារសាធារណៈ រៀបចំសន្និសីទសារព័ត៌មាន ដើម្បីបង្ហាញលទ្ធផលក្នុងនាមជាប្រធានប្តូរវេននៃកិច្ចប្រជុំរដ្ឋមន្ត្រីមុខងារសាធារណៈអាស៊ានលើកទី២៣ (23rd ACCSM) និងអាស៊ានបូកបីលើកទី៨ (8th ACCSM+3) ក្រោយកិច្ចប្រជុំ និងព្រឹត្តិការណ៍ពាក់ព័ន្ធបានចប់សព្វគ្រប់។

ថ្លែងក្នុងសន្និសីទសារព័ត៌មាន ឯកឧត្តមឧបនាយករដ្ឋមន្ត្រី បានគូសបញ្ជាក់ថា ក្រោមការសម្របសម្រួលរបស់កម្ពុជា ក្នុងនាមជាប្រធានឯកសារជាច្រើនបានសម្រេច និងបានដាក់ចេញជាបន្តបន្ទាប់។ ដោយឡែក សម្រាប់កិច្ចប្រជុំរយៈពេល៣ថ្ងៃនេះ សម្រេចអនុម័តនូវឯកសារសំខាន់ៗចំនួន ៤ រួមមាន៖ (១)«ផែនការការងារ ACCSM និង ACCSM+3 ឆ្នាំ២០២៦-២០៣០ (ACCSM and ACCSM+3 Work Plans 2026-2030 and Related Documents)» (២)«សេចក្តីថ្លែងការណ៍អាស៊ាន ស្តីពីការជំរុញនវានុវត្តន៍សម្រាប់ការផ្តល់សេវាសាធារណៈ ឱ្យកាន់តែប្រសើរឡើង (ASEAN Statement on Promoting Innovation for Better Public Service Delivery)» (៣)លក្ខខណ្ឌយោងនៃកិច្ចសហប្រតិបត្តិការអាស៊ានស្តីពីកិច្ចការមុខងារសាធារណៈ (Terms of Reference of the ACCSM) និង(៤) វិធាននីតិវិធីនៃកិច្ចប្រជុំមន្រ្តីជាន់ខ្ពស់ នៃកិច្ចសហប្រតិបត្តិការអាស៊ានបូកបីស្តីពីកិច្ចការមុខងារសាធារណៈ (Rules of Procedure of ACCSM+3 SOM)។ ក្នុងនោះ កិច្ចប្រជុំបានទទួលស្គាល់តួនាទីសំខាន់របស់ បណ្តាញវិទ្យាស្ថានបណ្តុះបណ្តាលសេវាសាធារណៈអាស៊ាន (Public Service Training Institutes /PSTI) និងមជ្ឈមណ្ឌលធនធានអាស៊ាន (ASEAN Resource Centres/ARC) ក្នុងការបណ្តុះបណ្តាលមន្ត្រី ការសិក្សាស្រាវជ្រាវ ការចែករំលែកបទពិសោធ និងការផ្ទេរឧត្តមានុវត្តន៍ពីប្រទេសមួយទៅប្រទេសមួយ។ ក្នុងនោះជាកិត្តិយសរបស់កម្ពុជាផងដែរ​ ដែលសាលាភូមិន្ទរដ្ឋបាល នឹងធ្វើជាប្រធានប្តូរវេននៃបណ្តាញ PSTI សម្រាប់អាណត្តិឆ្នាំ២០២៧-២០២៨។

ទន្ទឹមនោះ ក្នុងក្របខ័ណ្ឌអាស៊ានបូកបី ប្រមុខមុខងារសាធារណៈអាស៊ាន ចិន ជប៉ុន និងសាធារណរដ្ឋកូរ៉េ បានផ្លាស់ប្តូរទស្សនៈ និងបទពិសោធលើនវានុវត្តន៍សម្រាប់សេវាសាធារណៈ និងបានបញ្ជាក់ការបន្តកិច្ចសហប្រតិបត្តិការលើការផ្លាស់ប្តូរឌីជីថល បញ្ញាសិប្បនិម្មិត ការអភិវឌ្ឍធនធានមនុស្ស ការពង្រឹងផលិតភាព និងការរៀបចំស្ថាប័នដែលត្រៀមខ្លួនរួចជាស្រេចសម្រាប់អនាគត។

ឯកឧត្តម ហ៊ុន ម៉ានី បានសង្កត់ធ្ងន់ជាចុងក្រោយថា ឯកសារដែលបានអនុម័តទាំងអស់នេះ គឺជាផែនទីបង្ហាញផ្លូវដ៏ច្បាស់លាស់មួយសម្រាប់កិច្ចសហប្រតិបត្តិការតំបន់ដ៏វែងឆ្ងាយទៅមុខ។ សមិទ្ធផលទាំងនេះ មិនត្រឹមតែបង្ហាញពីភាពម្ចាស់ការ និងការទទួលខុសត្រូវខ្ពស់របស់កម្ពុជាប៉ុណ្ណោះទេ តែថែមទាំងចូលរួមគាំទ្រយ៉ាងពេញទំហឹងដល់ការសម្រេចឱ្យបាននូវចក្ខុវិស័យសហគមន៍អាស៊ានឆ្នាំ២០៤៥ ផងដែរ៕