ភ្នំពេញ​ ៖​ ការបញ្ជាក់របស់សម្តេចតេជោ ហ៊ុន សែន បែបនេះក្នុងទំព័រហ្វេសប៊ុកផ្លូវការនៅយប់ថ្ងៃទី០៧ ខែឧសភា ឆ្នាំ២០២២នេះ រំលឹកពីការតស៊ូរបស់សម្តេចតេជោ និងបងប្រុស គឺឯកឧត្តម ហ៊ុន ណេង ដែលស្មោះត្រង់ចំពោះព្រះមហាក្សត្រ រាជបល្ល័ង្គនិងរបបរាជានិយម តាំងពីដើមមករហូតដល់បច្ចុប្បន្ន 

បន្ទាប់ពីថ្ងៃនេះ ព្រះមហាក្សត្រកម្ពុជាបានចេញព្រះរាជក្រឹត្យផ្ដល់គោរមងារ ឯកឧត្ដម ហ៊ុន ណេង ជា «សម្ដេច ឧត្ដមទេពញាណ ហ៊ុន ណេង » ។ សម្តេចតេជោ បានបញ្ជាក់ក្នុងសំណេរដែលមានខ្លឹមសារទាំងស្រុងថា ៖

«បងប្រុសទោះបីបងបានចែកឋានទៅហើយក្តីតែកេរ្តិ៍ឈ្មោះរបស់បងបានស្ថិតនៅជាមួយជាតិ សាសនានិងព្រះមហាក្សត្រជានិច្ច។

មុននេះបន្តិចព្រះមហាក្សត្រជាទីគោរពសក្ដារៈរបស់យើងបានប្រោសប្រទាននូវគោរមងារសម្រាប់បងគឺជា(សម្តេចឧត្តមទេពញាណហ៊ុន ណេង)។

តើបងនៅចាំទេគឺក្បែរកន្លែងតំកល់សពបងនេះហើយដែលបងនិងខ្ញុំចូលរួមធ្វើបាតុកម្មប្រឆាំងពួកធ្វើរដ្ឋប្រហារនិងទាមទារប្រគល់តំណែងថ្វាយសម្តេចឪយើងវិញកាលពីថ្ងៃ២៣ មិនា ១៩៧០ ដែលពេលនោះបងអាយុ២០ឆ្នាំឯខ្ញុំអាយុ១៨ឆ្នាំ។

ត្រកូលហ៊ុនរបស់យើងគ្រប់ជំនាន់តាំងពីជីដូនជីតា ឪពុកម្តាយយើងរហូតដល់ខ្លួនយើងតែងមានការស្មោះត្រង់ចំពោះ

ព្រះមហាក្សត្រចំពោះរាជបល្ល័ង្គនិងរបបរាជានិយម។

ប្អូនជឿជាក់ថាកូនចៅយើងទាំងអស់នឹងដើរតាមផ្លូវដែលយើងបានដើរកន្លងមកដោយធានាដល់កិច្ចការពាររបបរាជានិយម

ការពារព្រះមហាក្សត្រនិងព្រះរាជបល្ល័ង្កដោយការស្មោះត្រង់»៕