ភ្នំពេញ​៖ អង្គទូតនៃបណ្តាប្រទេសមួយចំនួនដែលមាននិវេសនដ្ឋានប្រចាំនៅកម្ពុជា បានផ្ញើសាររំលែកទុក្ខជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ចំពោះការបាត់បង់បងប្រុសបង្កើត គឺឯកឧត្តម ហ៊ុន ណេង អ្នកតំណាងរាស្រ្តមណ្ឌលខេត្តកំពង់ចាម និងជាសមាជិកគណៈកម្មាធិការអចិន្រ្តៃយ៍រដ្ឋសភា បានទទួលមរណភាព កាលពីល្ងាចថ្ងៃទី៥ ខែឧសភា ឆ្នាំ២០២២ ក្នុងជន្មាយុ៧២ឆ្នាំ ដោយរោគាពាធនោះ។

យោងតាមសារលិខិតគោរពផ្ញើជូនសម្តេចតេជោ ហ៊ុន សែន នៅថ្ងៃទី៧ ខែឧសភា ឆ្នាំ២០២២នេះ បណ្តាឯកអគ្គរាជទូត និងឯកអគ្គរដ្ឋទូតនៃប្រទេសជប៉ុន ចិន សហរដ្ឋអាមេរិក រុស្ស៊ី និងវៀតណាម បានសម្តែងនូវសេចក្តីក្រៀមក្រំជាទីបំផុត ចំពោះមរណភាពឯកឧត្តម ហ៊ុន ណេង។ តាមរយៈសាររំលែកទុក្ខរបស់ឯកអគ្គរាជ និងរដ្ឋទូតបានលើកឡើងថា «ឯកឧត្តម ហ៊ុន ណេង បានលះបង់កម្លាំងកាយចិត្ត បញ្ញា និងស្មារតី រយៈពេលដ៏វែងក្នុងការអភិវឌ្ឍប្រទេសកម្ពុជា។ វីរភាពរបស់ឯកឧត្តមនឹងត្រូវបានចងចាំជានិច្ច»។ ស្ថិតក្នុងវេលាដ៏សែនក្រៀមក្រំនេះ ឯកអគ្គរាជ និងរដ្ឋទូត ទាំងនោះសូមចូលរួមរំលែកមរណទុក្ខដោយសេចក្តីអាឡោះអាល័យជាទីបំផុតជាមួយ សម្តេចតេជោ នាយករដ្ឋមន្រ្តី ព្រមទាំងក្រុមគ្រួសារ។

សូមបញ្ជាក់ថាសពរបស់ឯកឧត្តម ហ៊ុន ណេង ត្រូវបានតម្កល់ធ្វើបុណ្យតាមបែបប្រពៃណីព្រះពុទ្ធសាសនា នៅគេហដ្ឋាន របស់ឯកឧត្តម នៅភូមិទី៧ សង្កាត់កំពង់ចាម ស្រុកកំពង់ចាម ខេត្តកំពង់ចាម។ នៅថ្ងៃចន្ទ ទី៩ ខែឧសភា ឆ្នាំ២០២២ សពឯកឧត្តម ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម៕