ភ្នំពេញ៖ ការនាំចេញម្រេចកំពតរបស់កម្ពុជា ដែលជាផលិតផលសម្គាល់ភូមិសាស្ត្រ (GI)ដ៏ល្បីល្បាញរបស់កម្ពុជា​ សម្រេចបានប្រមាណ ៥០តោន ទៅកាន់ទីផ្សារអន្តរជាតិ ក្នុងរយៈពេល ៧ខែឆ្នាំ២០២៦។ អឺរ៉ុបនៅតែជាទីផ្សារចម្បងជាងគេសម្រាប់​ម្រេច GI របស់កម្ពុជា​។

​លោក កាន់ ស៊ីណុច ប្រធានក្រុមប្រឹក្សាភិបាលសមាគមលើកកម្ពស់ម្រេចកំពត(GI) បានប្រាប់ BTV ថា ការប្រមូលផលម្រេចកំពតរបស់ប្រជាកសិករទទួលបានក្នុងរង្វង់ ១២០តោន សម្រាប់ធ្វើការ​នាំចេញទៅកាន់ទីផ្សារអន្តរជាតិ ដែលទិន្នផលនេះ កើនប្រមាណ២០តោន បើធៀបនឹងឆ្នាំ២០២៥កន្លងទៅ។

លោកបន្តថា ក្នុងរយៈពេល ៧ខែឆ្នាំ​២០២៦ ការនាំចេញម្រេចកំពត GI សម្រេចបានក្នុងរង្វង់​ ៥០ដោយលោករំពឹងថា ការនាំចេញម្រេច GI សម្រាប់មួយឆ្នាំ២០២៦នេះ នឹងសម្រេចបានប្រហាក់ប្រហែលទៅនឹងឆ្នាំមុនដែរគឺក្នុងរង្វង់ ១២០តោន។ សព្វថ្ងៃ ទីផ្សារអន្តរជាតិស្រូបយកម្រេច GI ប្រមាណ ៨០% និង ទីផ្សារក្នុងប្រមាណ ២០% ប៉ុណ្ណោះ​។ ទីផ្សារធំជាងគេសម្រាប់ ម្រេច GI គឺសហគមន៍អឺរ៉ុប រួមមាន ប្រទេស​បារាំង, អាល្លឹម៉ង់,ឆែក,និងហូឡង់ បន្ទាប់មកទីផ្សារសំខាន់ៗមួយចំនួនទៀត ដូចជា កាណាដា, អាមេរិក, ចិន, តៃវ៉ាន់, សាធារណៈរដ្ឋកូរ៉េ,សិង្ហុបរី,វៀតណាម, និងអូស្ត្រាលី។

លោកមានប្រសាសន៍ថា៖ «សព្វថ្ងៃប្រជាកសិករកំពុងធ្វើការពង្រីកផ្ទៃដាំដុះម្រេចកំពតជាលក្ខណៈគ្រួសារបន្ថែមទៀត ដើម្បីបំពេញតម្រូវការទីផ្សារដែលកំពុងតែកើនឡើង។ ទន្ទឹមនឹងនេះ ក៏មានវិនិយោគិនថ្មីៗជាច្រើនចាប់អារម្មណ៍មកវិនិយោគលើការដាំដុះម្រេចកំពត និងស្វែងរកដៃគូសម្រាប់នាំចេញម្រេចកំពត ផងដែរ ប៉ុន្តែទិន្នផលម្រេចមិនទាន់អាចផ្គត់ផ្គង់គ្រប់គ្រាន់តាមតម្រូវនៅឡើយទេ»។

ក្នុងឆ្នាំ២០២៦នេះ ម្រេចកំពត GI ហាក់មានតម្លៃល្អជាងបណ្តាឆ្នាំកន្លងទៅ។ ជាក់ស្តែង ម្រេចខ្មៅលក់ចេញក្នុងតម្លៃ២០ ដុល្លារអាមេរិក​ ក្នុងមួយគីឡូក្រាម​, ម្រេចក្រហម ៣០ដុល្លារអាមេរិក, និងម្រេច ស ៣៣ដុល្លារអាមេរិក ដែលតម្លៃនេះ ​កើនប្រមាណ ៣ដុល្លារក្នុង១គីឡូក្រាម បើធៀបនឹងឆ្នាំមុន។

ក្នុងឆ្នាំ២០២៥ កម្ពុជាបាន​នាំចេញម្រេច GI បានប្រមាណ ១១២តោន ទៅកាន់ទីផ្សារក្រៅប្រទេស ដោយរកចំណូលបានជាង ២លានដុល្លារអាម៉េរិក កើនឡើងទ្វេដង បើធៀបនឹងឆ្នាំ២០២៤។ ចំណែក ទិន្នផលម្រេច ទាំង GI និងម្រេចមិនមែន GI ក្នុងឆ្នាំ ២០២៦នេះ ត្រូវបានគេ​រំពឹងថា នឹងសម្រេច​ប្រមាណ ២ ម៉ឺនតោន គឺ​ប្រហាក់​ប្រហែល​ឆ្នាំ​ទៅដែរ។

របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងឆ្នាំ២០២៥ កម្ពុជាមាន​ផ្ទៃដីដាំដុះម្រេចសរុប​មានចំនួន ៧ ១០៦ហិកតា និងផ្តល់បរិមាណផលសរុប​ចំនួន១៥ ៧៥៧ តោន។ ​ក្នុងឆ្នាំ២០២៥ កម្ពុជា​រកចំណូល​បាន​ជាង ៣១ ​លានដុល្លារអាមេរិក​ ​ពីការ​នាំចេញ​ម្រេច ​ធ្លាក់ចុះជិត ១២% ធៀបនឹងឆ្នាំ២០២៤៕

អត្ថបទ៖ ធូ វិរៈ