ខណៈដំណើរការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) បាន​ចាប់​ផ្តើម​ដំណើរ​ការ​ហើយ​ ​នៅព្រឹកថ្ងៃទី១០ ខែសីហានេះ ក្រុមអាណា​ព្យាបាល​សិស្ស​បាន​បង្ហាញ​ទឹក​មុខ​សប្បាយ​រីករា​យ ​នៅពេលដែលឃើញកូនខិតខំរៀនសូត្រ រហូតបានឈានដល់ការប្រឡងថ្ងៃនេះ។

អ្នកស្រី ស៊ុំ ស្រីស្រស់ ប្រជាពលរដ្ឋមកពីខេត្តតាកែវ ដែលបានជូនកូនរបស់ខ្លួនមកប្រឡងបាក់ឌុប នា​មណ្ឌល​ប្រឡងវិទ្យាល័យ ជាស៊ីម សាមគ្គី បានឱ្យព័ត៌មាន ប៊ីធីវី ដឹងថា នេះជា​លើក​ទី​មួយ​ហើយ ​ដែលបានជូនកូនមកប្រឡងបាក់ឌុប។ អ្នកស្រីបានបន្តថា ពិតជាសប្បាយរីករាយជាខ្លាំង ព្រោះ​ការ​ទន្ទឹងរង់ចាំជាយូរឆ្នាំមកហើយ។

ក្រុម​អាណាព្យាបាលដទៃផ្សេងទៀត ដែលកំពុងរង់ចាំកូនពីចម្ងាយបន្ទប់ប្រឡង បាន​និយាយ​ឱ្យ​ដឹង​ស្រដៀង​គ្នា​ថា តាមការសង្កេតការសិក្សារបស់កូន គឺសង្ឃឹមច្រើនក្នុងការប្រឡងជាប់ ដោយ​សារ​តាំង​ពី​ដើម​ឆ្នាំ រហូតមកដល់ពេលនេះមើលឃើញថា កូនៗបានខិតខំប្រឹងប្រែងរៀនសូត្រ និង​មើល​មេ​រៀន​ជាប់​ជាប្រចាំ។

ទាក់​ទិន​មណ្ឌលប្រឡងនៅវិទ្យាល័យ ជាស៊ីម សាមគ្គីនេះ ក្រុមអាណាព្យាបាលសិស្ស បាន​បញ្ជាក់​ថា​ ការរៀបចំដំណើរការប្រឡងពិតជាមានលក្ខណៈល្អប្រសើ និងមានតម្លាភាពត្រឹមត្រូវ ដែល​ធ្វើ​ឱ្យ​មាតា​បិតាសិស្សអាចទទួលយកបាន។ ពួកគាត់ បានជូនពរ​ទៅ​ដល់​បេក្ខ​ជន​ប្រឡង​ថ្នាក់​បាក់​ឌុប​ទាំង​អស់ ត្រូវខិតខំប្រឹងប្រែងយកចិត្តទុកដាក់ ក្នុងការប្រឡងឱ្យទទួលបានជោគជ័យគ្រប់ៗគ្នា និង​ត្រូវ​ខិតខំរៀនសូត្រឱ្យបានច្រើន និងខ្ពង់ខ្ពស់ ដើម្បីជា​ប្រយោជន៍​ជូន​ដល់​ប្រទេស​ជាតិ​ទៅ​ថ្ងៃ​អនាគត​ខាង​មុខ ធ្វើយ៉ាងណាចូលរួមអភិវឌ្ឍន៍ប្រទេសកម្ពុជាកាន់តែរីកចម្រើនបន្ថែមទៀត។

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មានរយៈពេល ២ថ្ងៃ គឺ​ថ្ងៃ​ទី​១០ និង១១ ខែសីហា ឆ្នាំ២០២៦។ ឆ្នាំនេះ បេក្ខជនដែលមានឈ្មោះប្រឡងសរុបចំនួនជាង ១៥​ម៉ឺននាក់ ក្នុងនោះស្រីជាង ៨ម៉ឺននាក់។ ក្រសួងអប់រំ យុវជន និងកីឡា បានកំណត់យកថ្ងៃទី២ ខែ​កញ្ញា ឆ្នាំ២០២៦ ដើម្បីប្រកាសលទ្ធផលប្រឡងមណ្ឌលសំណេរ នៃរាជធានី ខេត្តទាំង២៥ នៅ​ទូទាំង​ប្រទេស៕ អត្ថប៖ ឈិត បូរ៉ាវី