កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បាន​ប្រគល់​វិញ្ញាបនបត្រ​សម្គាល់​ម្ចាស់​អចលន​វត្ថុ (បណ្ណកម្មសិទ្ធិដីធ្លី) ជូនប្រជាពលរដ្ឋចំនួន ២៥០០បណ្ណ ចំនួន៩ភូមិ ស្ថិត​ក្នុង​ស្រុកភ្នំស្រួច ខេត្តកំពង់ស្ពឺ ។

លោក តាប់ ម៉ាឡៃ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ស្ពឺ បាន​ឲ្យ​ដឹងថា រាជរដ្ឋាភិបាលកម្ពុជា បានជំរុញឱ្យកាន់តែសកម្មបន្ថែមទៀត ដល់ក្រុម​ការ​ងារ​ជំនាញ​ចុះ​បញ្ជី​បង្ហើយ​ទាំង១២ក្រុម នៅតាមស្រុក ក្រុង ដែលសេសសល់ លើការវាស់វែងដីធ្លីឱ្យ​បាន​ចប់​សព្វ​គ្រប់ និងប្រគល់ជូនពលរដ្ឋឱ្យបានដល់ដៃគ្រប់គ្នា ដែលការណ៍នេះ គឺដើម្បី​ដោះ​ស្រាយបញ្ចប់​បញ្ហាជម្លោះព្រំដី ជាពិសេស បង្កើតឱ្យមានសុវត្ថិភាពដីធ្លី ប្រជាពលរដ្ឋកាន់​កាប់​ស្រប​ច្បាប់​។

លោកប្រធានមន្ទីរ បានបន្ថែមថា ការងារវាស់វែងដីធ្លី រហូតចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ គឺមិនមែនជាការងារងាយស្រួលនោះទេ ប៉ុន្តែត្រូវការភាពច្បាស់លាស់ ត្រឹមត្រូវ ការអត់ធ្មត់ និងកិច្ចសហការយ៉ាងជិតស្និទ្ធរវាងមន្ត្រីជំនាញ ជាមួយប្រជាពលរដ្ឋ ។ ដូច្នេះលទ្ធផលដែលផ្តល់ជូនប្រជាពលរដ្ឋនាពេលនេះ ជាផ្លែផ្កាកើតចេញពីកិច្ចខិតខំប្រឹងប្រែងរួមគ្នារវាងអាជ្ញាធរមូលដ្ឋាន មន្ត្រីជំនាញនិងប្រជាពលរដ្ឋ ។

ក្នុងឱកាសនោះ ឯកឧត្តមបណ្ឌិត ជាម ចន្ទ័សោភ័ណ មានប្រសាសន៍ថា ដីធ្លីគឺជាទ្រព្យសម្បត្តិដ៏មានតម្លៃបំផុតរបស់ប្រជាពលរដ្ឋ ហើយសម្រាប់គ្រួសារខ្មែរភាគច្រើន ដីមួយកន្លែង ផ្ទះ មួយខ្នង ឬដីចម្ការ មួយប្លង់ គឺជាមូលដ្ឋានសេដ្ឋកិច្ច របស់គ្រួសារ ជាកន្លែងរស់នៅ ជាកន្លែងប្រកបរបរកស៊ី ជាកន្លែងបង្កើតចំណូល និងជាទ្រ្យសម្បត្តិសម្រាប់បន្សល់ទុក ឱ្យកូនចៅជំនាន់ក្រោយ ។

ឯកឧត្តមបន្តថា ដោយសារដីធ្លីមានតម្លៃខ្ពស់បែបនេះ ការគ្រប់គ្រងដីធ្លីឱ្យមានសណ្តាប់ធ្នាប់ ត្រឹមត្រូវ តម្លាភាព និងយុត្តិធម៌ គឺជាកិច្ចការងារសំខាន់របស់រាជរដ្ឋាភិបាល ហើយនៅគ្រប់អាណត្តិ នៃរាជរដ្ឋាភិបាលបានយកចិត្តទុកដាក់ខ្ពស់ លើការងារកែទម្រង់វិស័យដីធ្លី ដោយចាត់ទុកថាការធានាសិទ្ធិលើដីធ្លីរបស់ប្រជាពលរដ្ឋ គឺជាការធានាផ្នែកសង្គម-សេដ្ឋកិច្ច និងច្បាប់ ។

ឯកឧត្តមអភិបាលខេត្ត បានគូសបញ្ជាក់ថា គោលនយោបាយដីធ្លីរបស់រាជរដ្ឋាភិបាលមានគោលបំណងសំខាន់តែមួយគត់ គឺធានាបាននូវសុវត្ថិភាពនៃការកាន់កាប់ដីធ្លី និយាយជារួមគឺកាត់បន្ថយជម្លោះដីធ្លី លើកកម្ពស់ដល់ការប្រើប្រាស់ឱ្យមានប្រសិទ្ធភាព ជំរុញការអភិវឌ្ឍសេដ្ឋកិច្ច ធានាថាពលរដ្ឋអាចរស់នៅ និងអភិវឌ្ឍន៍ជីវភាពរបស់ខ្លួនដោយមានទំនុកចិត្ត ។

ជាមួយគ្នានេះ ឯកឧត្តមបណ្ឌិត ជាម ចន្ទ័សោភ័ណ ក៏បានថ្លែងអំណរគុណ និងកោតសរសើរដល់ក្រុមការងារចុះបញ្ជីដីធ្លី ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងការសម្រេចកិច្ចការចុះបញ្ជីដីធ្លី និងចេញវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋដោយស្មារតីទទួលខុសត្រូវ និងមានតម្លាភាព និងបានកោតសរសើរនូវការចូលរួមរបស់ប្រជាពលរដ្ឋក្នុងគ្រប់ជំហាននៃការចុះបញ្ជីដីធ្លី រហូតដល់បានទទួលបណ្ណកម្មសិទ្ធិដីធ្លីនាពេលនេះ ។ ដោយឡែក ចំពោះបណ្ណដែលត្រូវបង់ពន្ធប្រែប្រួលកម្មសិទ្ធិ ៤ភាគរយ សូមពលរដ្ឋចូលរួមបំពេញកាតព្វកិច្ចបង់ពន្ធជូនរដ្ឋ ឱ្យបានត្រឹមត្រូវ ដើម្បីអាចដកយកបណ្ណកម្មសិទ្ធិទៅប្រើប្រាស់ និងអាស្រ័យផលបានតាមផ្លូវច្បាប់៕ អត្ថបទ បាន សុខរិទ្ធិ