ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី២០ ឆ្នាំ២០២៦/២៧ (ថ្នាក់ខេត្ត) សប្ដាហ៍ទី៤ នៅក្នុងសប្ដាហ៍នេះ មានការប្រកួតចំនួន ៣គូប៉ុណ្ណោះ ដែលសុទ្ធសឹងជាគូជក់ចិត្ត ពិសេសការប្រកួតនាថ្ងៃទី១៤ ខែសីហាខាងមុខ។

ក្នុងចំណោមកម្មវិធីប្រកួតប្រចាំសប្ដាហ៍នេះ មាន ១គូត្រូវជួបគ្នានារសៀលថ្ងៃទី១២ ខែកញ្ញានេះ រវាងក្រុមសមាគមកីឡាបាល់ទាត់ខេត្តកែប ទល់ក្រុមសមាគមបាល់ទាត់ខេត្តព្រះសីហនុ ។ នេះជាការប្រកួតទី២ ក្នុងពូលE ដោយព្រះសីហនុ កំពុងមាន ១ពិន្ទុក្នុងដៃ ក្រោយប្រកួតដំបូងស្មើកោះកុង គ្រាដែលខេត្តកែប មិនទាន់រកបានពិន្ទុឡើយ។ ដូច្នេះជំនួបថ្ងៃនេះ គឺជាការប្រកួតដ៏សំខាន់ សម្រាប់ក្រុមទាំងពីរស្វែងរកជ័យជម្នះលើកដំបូង។

ចំណែក ២ប្រកួតទៀត នឹងត្រូវធ្វើឡើងនាថ្ងៃសុក្រ ដែលសុទ្ធតែជាជំនួបដណ្ដើមកៅអីកំពូលតារាង ក្នុងនោះក្រុមមន្ទីរអប់រំ យុវជន និងកីឡា ខេត្តកំពត ត្រូវជួបក្រុមម្ចាស់ផ្ទះខេត្តកោះកុង នៅទីលានវិទ្យាល័យចំណេះដឹងទូទៅ និងបច្ចេកទេសតេជោ សែន កោះកុង។ បច្ចុប្បន្នកំពត កំពុងមាន ៣ពិន្ទុក្នុងដៃ មានប្រៀប ២ពិន្ទុលើខេត្តកោះកុង តែក្រោយជំនួបជើងទី១ នេះ ក្រុមទទួលបានជ័យជម្នះ នឹងបានឡើងកំពូលតារាង តែបើស្មើ ខេត្តកំពត នឹងរក្សាតំណែងខ្លួនដដែល។

ដោយឡែក ១គូទៀត គឺក្រុមខ្លាំងសមាគមកីឡាបាល់ទាត់ខេត្តត្បូងឃ្មុំ ត្រូវជួបក្រុមមន្ទីរ អប់រំ យុវជន និងកីឡា ខេត្តស្វាយរៀង ក្នុងពូលD ។ បច្ចុប្បន្នក្រុមទាំងពីរ រកបាន ៣ពិន្ទុស្មើគ្នា ក្រោយយកឈ្នះគូប្រជែងរួមពូលរៀងៗខ្លួន ។ ដូច្នេះថ្ងៃសុក្រនេះ គឺជាជំនួបដ៏សំខាន់ក្រុមទាំងពីរ ដែលត្រូវការជ័យជម្នះរៀងៗខ្លួន ដើម្បីប្រជែកៅអីកំពូលតារាង ក៏ដូចជាពង្រឹងឱកាសឡើងទៅវគ្គបន្ដ នៃពានរង្វាន់សម្ដេចតេជោ ហ៊ុន សែន-ថ្នាក់ខេត្ត ឆ្នាំ២០២៦/២៧៕ អត្ថបទ លី ឈុនឡា