ស៊ីរី៖ ក្រុមជួយសង្គ្រោះ និងក្រុមសកម្មជនបានរាយការណ៍ថា ការផ្លោងគ្រាប់កាំភ្លើងធំកាលពីថ្ងៃអាទិត្យ ចេញពីតំបន់គ្រប់គ្រងដោយរដ្ឋាភិបាល មកលើមន្ទីរពេទ្យមួយកន្លែងគ្រប់គ្រងដោយក្រុមឧទ្ទាម ស្ថិតនៅតំបន់ភាគពាយព្យប្រទេសស៊ីរី បានសម្លាប់ជនស៊ីវិលយ៉ាងហោច ៥នាក់ និងបណ្ដាលឲ្យបុគ្គលិកសុខាភិបាលជាច្រើននាក់រងរបួស។
យោងតាមការអះអាង របស់ក្រុមអង្កេតការណ៍សិទ្ធិមនុស្សស៊ីរីបានឲ្យដឹងថា គ្រាប់កាំភ្លើងធំបានធ្លាក់ចំច្រកចូល និងទីធ្លារមន្ទីរពេទ្យស្ថិតក្នុងទីក្រុងអាតារ៉េប នៅតំបន់ជាយក្រុងភាគខាងលិចទីក្រុងអាឡេប៉ូ។ រូបភាពវីដេអូដែលទទួលបាន បង្ហាញឲ្យឃើញពីគំនរបាក់បែក និងស្នាមប្រឡាក់ឈាមនៅច្រកចូលមន្ទីរពេទ្យ និងនៅក្នុងបរិវេណមន្ទីរពេទ្យ។ ទីតាំងមន្ទីរពេទ្យស្ថិតនៅក្រោមដី គឺជាតាក់ទិកមួយប្រើប្រាស់ដោយក្រុមប្រឆាំង ដើម្បីបញ្ចៀសផុតពីគោលដៅវាយប្រហារ នៅតំបន់ងាយនឹងប៉ះទង្គិចមួយនេះ។ ដោយឡែកក្រុមមួកស ដែលជាក្រុមការងារស្ម័គ្រចិត្តការពារជនស៊ីវិលស៊ីរី បាននិយាយថា ជនស៊ីវិលដែលបានបាត់បង់ជីវិតទាំងអស់ រួមទាំងកុមារម្នាក់ និងស្ត្រីម្នាក់ផងដែរ។
លោក អូម៉ា ហាឡាក់ ប្រធានមន្ទីរពេទ្យក្រុងអាតារ៉េបបាននិយាយថា បុគ្គលិកសុខាភិបាល ៥នាក់បានរងរបួស ហើយមនុស្សក្នុងមន្ទីរពេទ្យត្រូវបានជម្លៀសចេញ និងមន្ទីរពេទ្យបានបិទទ្វារចោល។ សូមបញ្ជាក់ថា ការវាយប្រហារមកលើមន្ទីរពេទ្យ បានក្លាយជារឿងធម្មតាទៅហើយនៅក្នុងសង្គ្រាមស៊ីវិលស៊ីរី ហើយភាគច្រើននៃការវាយប្រហារ ធ្វើឡើងដោយកងកម្លាំងរដ្ឋាភិបាល និងក្រុមសម្ព័ន្ធភាពរបស់ពួកគេ។ ការវាយប្រហារកាលពីថ្ងៃអាទិត្យនេះដែរ គឺជាការវាយប្រហារមលើកដំបូងគេមកលើទីតាំងសុខភាព នៅក្នុងតំបន់គ្រប់គ្រងដោយក្រុមឧទ្ទាមមួយនេះ ចាប់តាំងពីខែកុម្ភៈ ឆ្នាំ២០២០ រហូតមក៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
