កីឡា៖ ការប្រកួតកីឡាសិស្សបឋមសិក្សាថ្នាក់ជាតិឆ្នាំ២០២២ បានបញ្ចប់ដោយជោគជ័យក្រោយដំណើរការប្រកួតជាង ១សប្ដាហ៍នៅរាជធានីភ្នំពេញដែលទើបបញ្ចប់កាលពីចុងសប្ដាហ៍កន្លងទៅ ខណៈក្រុមកីឡាមកពីខេត្តប៉ៃលិនបានឈរកំពូលតារាងមេដាយ ដោយឈ្នះមេដាយមាសច្រើនជាងគេរហូតដល់ ៨គ្រឿង។
ថ្លែងក្នុងពិធីបិទការប្រកួត ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡាបានធ្វើការវាយតម្លៃខ្ពស់ចំពោះគណៈកម្មការរៀបចំ ពិសេសប្រតិភូ និងកីឡាករ-កីឡាការិនីមកពីគ្រប់រាជធានី-ខេត្តដែលបានចូលរួមការប្រកួត ធ្វើឲ្យព្រឹត្តិការណ៍កីឡាបឋមសិក្សាថ្នាក់ជាតិនេះបញ្ចប់ដោយរលូន និងផ្លែផ្កា។ ឯកឧត្ដមបានគូសបញ្ជាក់ថា នេះគឺជារបតថ្មីមួយទៀតដែលក្រសួងអប់រំ យុវជន និងកីឡាបានធ្វើកំណែទម្រង់ពីការប្រកួតកីឡាសិស្សបឋមសិក្សាប្រចាំឆ្នាំ មកជាការប្រកួតថ្នាក់ជាតិដែលនឹងត្រូវរៀបចំ ២ឆ្នាំម្ដង ជាមួយការរៀបចំកម្មវិធីប្រកួតរហូតដល់ ៨ប្រភេទកីឡាក្នុងន័យផ្ដល់ឱកាស និងជំរុញការអភិវឌ្ឍវិស័យកីឡាតាមគ្រឹះស្ថានអប់រំ ក៏ដូចជាវិស័យកីឡាជាតិឲ្យកាន់តែរីកចម្រើន។
គួរបញ្ជាក់ថា ការប្រកួតកីឡាសិស្សបឋមសិក្សាថ្នាក់ជាតិឆ្នាំនេះ បានចាប់ផ្ដើមការប្រកួតពីថ្ងៃទី២៩ ខែមេសា និងបញ្ចប់នៅថ្ងៃទី០៧ ខែឧសភាដោយមានប្រតិភូ និងកីឡាករ-កីឡាការិនីចូលរួមសរុប ១,៦៧៧នាក់មកពីទូទាំងរាជធានី-ខេត្តដែលបានធ្វើការប្រកួតលើ ៨ប្រភេទកីឡារួមមានកីឡាបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT និងកីឡាតេក្វាន់ដូ ITF។ សរុបលទ្ធផលការប្រកួតជារួម គេឃើញក្រុមកីឡាខេត្តប៉ៃលិនឈ្នះមេដាយច្រើនជាងគេរួមមានមេដាយមាស ៨ និងសំរឹទ្ធ ៣ តាមពីក្រោយដោយក្រុមកីឡាម្ចាស់ផ្ទះរាជធានីភ្នំពេញឈរលេខ២ ឈ្នះមេដាយមាស ៤, ប្រាក់ ៥ និងសំរឹទ្ធ ៣។ រីឯខេត្តស្ទឹងត្រែងឈរលេខ៣ ឈ្នះមេដាយមាស ៣ ប្រាក់ ៦ និងសំរឹទ្ធ ៤។ ខេត្តត្បូងឃ្មុំឈរលេខ៤ ឈ្នះមេដាយមាស ៣ និងប្រាក់ ២។ ខេត្តបាត់ដំបងឈរលេខ៥ ឈ្នះមេដាយមាស ៣ និងសំរឹទ្ធ ១។ ចំណែកខេត្តដែលមិនទទួលបានមេដាយសោះគឺខេត្តកោះកុង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
