បាត់ដំបង៖ ដោយមានការយកចិត្តទុកដាក់ពី ឯកឧត្តម សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង នៅថ្ងៃទី១២ ខែសីហា ឆ្នាំ២០២៦ លោក កុសុម សុភីនារ៉ា នាយកសាខា បានបន្តចាត់មន្ត្រីប្រតិបត្តិសាខាខេត្ត សហការជាមួយអនុសាខាកាកបាទក្រហមកម្ពុជាស្រុកសំពៅលូន ដឹកនាំអ្នកស្ម័គ្រចិត្តចុះផ្សព្វផ្សាយស្តីពីហានិភ័យនៃយុទ្ធភណ្ឌមិនទាន់ផ្ទុះ ឥរិយាបថសុវត្ថិភាព ការធ្វើចំណាកស្រុកប្រកបដោយសុវត្ថិភាព និងសហគមន៍មានសុខភាពល្អ ជូនដល់ប្រជាពលរដ្ឋមកពីភូមិអូរ ឃុំសន្តិភាព ស្រុកសំពៅលូន។វគ្គនេះត្រូវបានសម្របសម្រួលដោយ លោក យ៉ាន ឧត្តម នាយករងសាខាកាកបាទក្រហមកម្ពុជាខេត្តបាត់ដំបង និងមានការចូលរួមពីលោក លោកស្រី មន្ត្រីអនុសាខា អ្នកស្ម័គ្រចិត្ត និងប្រជាពលរដ្ឋសរុបប្រមាណជិត ៦០នាក់។ វគ្គផ្សព្វផ្សាយនេះឧបត្ថម្ភគាំទ្រដោយគណៈកម្មាធិការអន្តរជាតិកាកបាទក្រហម និងអឌ្ឍចន្ទក្រហម (ICRC) តាមរយៈទីស្នាក់ការកណ្តាលកាកបាទក្រហមកម្ពុជា។

បេីតាម​លោក​ យ៉ាន​ ឧត្តម​ បាន​ឱ្យ​ដឹង​ថា​ការផ្សព្វផ្សាយនេះធ្វេីឡេីងក្នុងគោលបំណងឱ្យប្រជាពលរដ្ឋមានការយល់ដឹងអំពីគ្រឿងយុទ្ធភណ្ឌមិនទាន់ផ្ទុះ​, ការធ្វើចំណាកស្រុកដោយសុវត្ថិភាព ដើម្បីកាត់បន្ថយអត្រាគ្រោះថ្នាក់​ ,ការលើកកម្ពស់សុខភាព អនាម័យ និងការបង្ការជំងឺឆ្លងនិងមិនឆ្លង​ ,សុវត្ថិភាពចរាចរណ៍ផ្លូវគោក ដើម្បីរួមចំណែកកាត់បន្ថយគ្រោះថ្នាក់ និងពិការភាព​,ការលើកកម្ពស់បរិស្ថាន និងការកាត់បន្ថយការប្រើប្រាស់ថង់ផ្លាស្ទិក​និងការយល់ដឹងអំពីជំងឺគ្រុនឈាម។

លោក យ៉ាន ឧត្តម បានលើកឡើងថា ទោះបីជាកម្ពុជាបានបញ្ចប់សង្គ្រាមស៊ីវិល និងទទួលបានសន្តិភាពពេញលេញក៏ដោយ ក៏ផលវិបាកបន្សល់ទុកពីសង្គ្រាម ដូចជាគ្រាប់មីន និងសំណល់ជាតិផ្ទុះ គឺនៅតែបន្តជាការគំរាមកំហែង និងជាហានិភ័យខ្ពស់ដល់អាយុជីវិតប្រជាពលរដ្ឋ ពិសេសអ្នកដែលរស់នៅតាមបណ្តាស្រុកជាប់ព្រំដែនកម្ពុជា-ថៃ ដែលធ្លាប់ជាទីតាំងសមរភូមិសង្គ្រាម ព្រមទាំងក្នុងបរិបទស្ថានភាពតានតឹង និងជម្លោះតាមបណ្តោយព្រំដែនរវាងកម្ពុជា និងថៃ នាពេលបច្ចុប្បន្ននេះ។

ជាមួយគ្នានេះ ក្រុមការងារបានអប់រំផ្សព្វផ្សាយអំពីការបង្ការ និងទប់ស្កាត់ជំងឺគ្រុនឈាម ដោយពង្រឹងការអនុវត្ត «៣កុំ ៣បំបាត់» ចុះពិនិត្យ និងលុបបំបាត់ជម្រកមូសខ្លា ព្រមទាំងលើកទឹកចិត្តឱ្យសហគមន៍ចូលរួមយ៉ាងសកម្មក្នុងការថែរក្សាបរិស្ថានស្អាត ដើម្បីកាត់ផ្តាច់ការចម្លងជំងឺ។

លោកបានបញ្ជាក់បន្ថែមថា ការប្រយុទ្ធប្រឆាំងនឹងជំងឺគ្រុនឈាម មិនមែនជាកាតព្វកិច្ចរបស់វិស័យសុខាភិបាលតែម្នាក់ឯងនោះទេ ប៉ុន្តែវាគឺជាការទទួលខុសត្រូវរួមគ្នារវាងអាជ្ញាធរមូលដ្ឋាន សហគមន៍ គ្រួសារ និងប្រជាពលរដ្ឋគ្រប់រូប។ ការចូលរួមរបស់មនុស្សគ្រប់គ្នា គឺជាកម្លាំងដ៏សំខាន់ក្នុងការការពារកុមារ និងសហគមន៍ឱ្យរួចផុតពីជំងឺគ្រុនឈាម៕