ថាសហោះ៖ សហភាពសហព័ន្ធយុវជនកម្ពុជារាជធានីភ្នំពេញកាលពីថ្ងៃទី០៨ ខែឧសភា ឆ្នាំ២០២២ បានរៀបចំការប្រកួតពានរង្វាន់កីឡាថាសហោះរយៈពេល ១ថ្ងៃពេញនៅទីលានបាល់ទាត់នៃសហភាពសហព័ន្ធយុវជនកម្ពុជា រាជធានីភ្នំពេញផ្ទាល់ ដើម្បីបំផុតសកម្មភាពយុវជនចូលរួមលេងកីឡាកាន់តែច្រើនបន្ថែមទៀត។
លោក បែ មករា នាយកកម្មវិធីកីឡាភ្នំពេញនៃសហភាពសហព័ន្ធយុវជនកម្ពុជា រាជធានីភ្នំពេញបានបញ្ជាក់ថា ការប្រកួតនេះមាន ៨ក្រុមចូលរួមដែលធ្វើឡើងក្នុងគោលបំណងបំផុសយុវជន ឲ្យចូលរួមលេងកីឡាកាន់តែសម្បូរបែបបន្ថែមទៀត ជាក់ស្ដែងកីឡាថាសហោះដែលជាប្រភេទកីឡាថ្មី ដើម្បីចូលរួមយុទ្ធនាការឆ្ពោះទៅស៊ីហ្គេមឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។ ដោយមើលឃើញពីផលល្អនៃកីឡាមួយនេះដែលមានគោលការណ៍ Fair-Play ត្រឹមត្រូវ ពោលគឺលេងដោយអត់មានអាជ្ញាកណ្ដាល ដោយផ្ដោតសំខាន់លើភាពស្មោះត្រង់ជាគោលនោះ លោកបានជំរុញយុវជន និងប្រជាពលរដ្ឋកម្ពុជាចូលរួមលេងកីឡាថាសហោះឲ្យបានច្រើន ដើម្បីអភិវឌ្ឍន៍កីឡានេះឲ្យកាន់តែរីកចម្រើនឈានទៅរកការប្រកួតទាំងថ្នាក់ជាតិ និងអន្ដរជាតិនាពេលអនាគត។
ចំពោះលទ្ធផលក្រោយបញ្ចប់ការប្រកួត ១ថ្ងៃពេញ សម្រាប់ក្រុមដណ្ដើមបានជ័យលាភីរួមមានក្រុមកីឡាករ-កីឡាការិនីថាសហោះភ្នំដារបានទទួលចំណាត់ថ្នាក់លេខ១ ខណៈក្រុមកីឡាករ-កីឡាការិនីថាយហោះកោះកេរ្ដិ៍ទទួលបានចំណាត់ថ្នាក់លេខ២ និងក្រុមកីឡាករ-កីឡាករីថាយហោះសំបូរព្រៃគុកទទួលបានចំណាត់ថ្នាក់លេខ៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
