ក្រុមបាល់ទាត់ខេត្តព្រះសីហនុ បន្ដរកបាន ១ពិន្ទុជាថ្មី ក្រោយប្រកួតស្មើក្រុមម្ចាស់ផ្ទះខេត្តកែប ដោយលទ្ធផល ៣-៣ ក្នុងវគ្គសន្សំពិន្ទុពូលE នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី២០ ឆ្នាំ២០២៦/២៧ (ថ្នាក់ខេត្ត) ។

ជំនួបដ៏ជក់ចិត្ត កាលពីល្ងាចថ្ងៃពុធនេះ ខេត្តកែប បានបើកការនាំមុខ ២គ្រាប់មុនលើក្រុមភ្ញៀវ ដោយកីឡាករ អេង ដេវិត នៅនាទី២៤ និងកីឡាករ ឌម ម៉ារីគី នៅនាទី៤៦ មុនកីឡាករ ឃឹម សុខា បន្ថែមគ្រាប់ទី៣ នៅនាទី៥៧ បន្ទាប់ពីកីឡាករ យូ វាយបកបាន ១គ្រាប់ឲ្យខេត្តព្រះសីហនុ នៅនាទី៥០ ខណៈនៅនាទី៦៩ និងនាទី៧៨ ម្ចាស់អាវលេខ៩៣ រូបនេះ បានបន្ថែម ២គ្រាប់ទៀត ជួយឲ្យខេត្តព្រះសីហនុ វាយបកតាមស្មើក្រុមម្ចាស់ផ្ទះ ៣-៣ តែម្ដង។

ការចែកគ្នា ១ពិន្ទុម្នាក់នេះ នាំឲ្យសមាគមកីឡាបាល់ទាត់ខេត្តព្រះសីហនុ ឡើងឈរលេខ២ ក្នុងពូលបណ្ដោះអាសន្ន ដោយរកបាន ២ពិន្ទុ ចាញ់ប្រៀបក្រុមមន្ទីរអប់រំ យុវជន និងកីឡាខេត្តកំពត ដែលមាន ៣ពិន្ទុ ខណៈខេត្តកែប បន្ដឈរបាតតារាង ក្រោយរកបាន ១ពិន្ទុដំបូងស្មើក្រុមបាល់ទាត់ខេត្តកោះកុង។ ជាមួយលទ្ធផលនេះ ក្រុមនីមួយៗ នៅតែមានឱកាសប្រជែងកៅអីវគ្គបន្ដ ដ្បិតនៅសល់ការប្រកួតជាច្រើនទៀត ដើម្បីស្វែងរកពិន្ទុបន្ថែម៕ អត្ថបទ លី ឈុនឡា